Nduang jay rot ƀon Ia Gri, xã Biển Hồ khuh n’gôr nuĭh ƀon lan n’hanh năch pâl nđaih. Nău nteh chĭng gong n’gôr gră, rlai lăp nsum đah nău nteh bah ăp ndơ uh goh rnoi mpôl đê̆. Bu hăr blău Rơ Châm Chốt, tât bah ƀon Mrông Yố, xã Ia Phí, n’gor Gia Lai, rhơn nkoch:

“Gâp tât ta aơ ndjôt nkre du mblâm đơn ting ning, du ntil ndơ nkrêh rnoi mpôl đê̆, gay rgop an rhơn mƀak, nchreng an kônh wa n’hanh năch djăt uănh. Nău ƀư an gâp nđơr lơn lah dơi uănh saơ jay rot hŏ lôch jêh ndrel mprang uĕh êr kao tăng”.

Đah yuh Mơ Ly, tât bah Đức Cơ, n’gor Gia Lai, aơ lah rnôk gay yuh rgop nău mprơ, ndrel ăp nuĭh rlai lăp n’hanh tâm pă nău rhơn tâm nar rgum pâl.

“He dŭt ŭch yor dơi râng du nău mprơ mpeh Tây Nguyên, mpeh Đảng. He rhơn yor dơi xã Biển Hồ nta trong dơh gay tât râng Festival chĭng gong năm aơ đŏng. Kao tăng dŭt uĕh, he ŭch ăp nuĭh hăn tât ta aơ rlong uănh saơ lễ hội”.

Geh nuĭh hăn tât Chư Đang Ya yor ŭch rŏng rup uĕh bah kao tăng, geh nuĭh ŭch joi gĭt ăp nău kan văn hóa, geh nuĭh ŭch măt uănh saơ ăp ntil nău ntơm nơh dơn gĭt saơ bah rup gui dơm. Yuh Y Nư bah Kon Tum hŏ ơm hăn tât Chư Đang Ya bah năp mông ntơm pơk pâl rlưn. Yuh an gĭt, ăp nău lư mpeh lễ hội lam mạng xã hội n’hanh nhih pah kan nkoch trêng nău lư hŏ nkah nău ŭch gĭt saơ, ƀư yuh ŭch hăn rlong uănh saơ na nê̆.

“Aơ lah lor bôk năp gâp hăn tât Chư Đang Ya. Saơ bu nchih nkoch ta mạng ta aơ geh lễ hội uĕh ngăn jêng gâp ŭch hăn tât gay rgâl n’hâm sial. Gâp ŭch uănh ăp nău kan lễ hội, djăt mpât mprơ, uănh ndăch rvăch, uănh bu chanh tanh bok brai n’hanh hăn uănh pâl ăp ndrơng ndơ ta aơ.”

Hôm đah yuh Lan, lễ hội kao tăng n’hanh chĭng gong Chư Đang Ya hôm lah du rlong uănh saơ mha êng hŏ geh mông nar gŭ rêh ta Gia Lai.

“He rêh ta Gia Lai hŏ 5 năm hôm yơn aơ lah lor bôk năp he dơi râng lễ hội kao tăng, lễ hội chĭng gong Chư Đang Ya. He dŭt nđơr. Lơn lah, kao tăng dŭt âk, njêng bri dak rup uĕh lhêt lhơt. Lah nuĭh I mô hŏ hăn tât lễ hội kao tăng ri ân hăn rlong tât du tơ̆”.

Mô dơn wăch rgum ăp nuĭh tât uănh pâl, rlong gĭt saơ, Festival chĭng gong n’hanh Pơh lễ kao tăng – Yôk ŭnh Chư Đang Ya hôm dơn geh nău uănh khlay bah ăp nuĭh ƀư pâl nđaih đŏng. Geh măt ta Chư Đang Ya tâm khay lễ hội năm 2026, wa Phan Thị Thu Minh, Giám đốc du công ty pâl nđaih ta Hà Nội, an gĭt:

“Nkhêp geh lễ hội kao tăng năm 2026, gâp hăn tât ta aơ gay râng. Gâp mpŏng lah, tâm năm aơ, đah nău n’glăp nsum ăp n’gor, lễ hội kao tăng mbra an tay âk nău nkah uĕh an năch rnôk hăn tât pâl nđaih Gia Lai.”

Tâm rơh công nghệ mbrô, ăp năch hôm jêng du hê nuĭh nkoch nău mpeh ntŭk tât đŏng. Du păng rup uĕh, du gâl video nchih nkah tay ăp njăr trong hăn mbra dơi kơl rup gui Gia Lai tât đah âk nuĭh lơn. Băl Đức, du tiktoker tât bah Đức Cơ, nkoch:

“Nar aơ he hăn tât ta aơ đah nău ƀư lah du hê nuĭh blău nchih nkoch keh mbrô, gay rlong saơ n’hanh rlai lăp nsum tâm mông nar lễ hội. He saơ ăp nuĭh râng dŭt uĕh, ndrel tât check-in, rhôp tay ăp rup uĕh lôch nê nchih n’glăp ta mạng xã hội gay băl mpôl tâm dak n’hanh dak bah dih mbra uănh saơ rup uĕh bah Gia Lai. He ŭch rŏng dŏng dĭng rhôp rup bah he gay ăp nuĭh saơ Gia Lai dah nău uĕh”.

Bah Festival chĭng gong tât Pơh lễ kao tăng – Yôk ŭnh Chư Đang Ya, Gia Lai dôl geh tay trong dơh gay nkoch nău bah he ma ăp rnoh khlay dŭt êng. N’hanh ăp nuĭh hăn tât ta aơ, ăp păng rup dơi rhôp tay, ăp nău nkoch dơi tâm pă gĭt mbra jêng du ntŭk tâm tuă nsĭt rup uĕh bah nkual neh dja tât dăch lơn đah năch pâl nđaih.