Trong hăn geh rnoh jong nchrăp rlău 28,5 km, hăn rlău ăp xã Cuôr Đăng, Quảng Phú, Ea Nuôl n'hanh ăp phường Tân An, Buôn Ma Thuột. Ntŭk bôk trong nthoi Quốc lộ 14, ta xã Cuôr Đăng; ntŭk dŭt trong nthoi Tỉnh lộ 1, ta xã Ea Nuôl. Nău nchrăp ƀư mpeh rmôt B, dŏng tơm prăk Trung ương 1.080 rmen prăk n'hanh tơm prăk n'gor 720 rmen prăk.

Tĭng nău nchrăp ƀư, trong hăn geh rnoh ngăch hăn dŭt âk 80 km/mông, jâng trong hăn hvi 12 mét, ndrel đah ntung, n'gâng, n'hong dak n'hanh ăp ndơ ƀư đăp mpăn hăn ntung trong. Nău ƀư ntơm bah năm 2026 tât năm 2029. Rnôk ƀư lôch jêh, trong mper 2 mbra boăt nthoi nkual mpeh bah lơ, mpeh bah lơ Buôn Ma Thuột đah trong têh hăn ngăch Khánh Hòa - Buôn Ma Thuột n'hanh ăp trong hăn khlay; rgop n'hŭch âk ir hăn ntung trong nkual ƀon têh, pơk hvi ntŭk ntô nkual ƀon têh, wăch rgum ntuh kơl n'hanh ntrôl hun hao wăng sa - rêh jêng kon nuĭh bah n'gor.