20 xã tơm dơi săch tâm rnoh 51 xã dŭt jêr jŏt bah n'gor Dak Lak. Tâm nê, 14 xã geh bah 7 rnoh ntil ndơ ƀư dŭt jêr jŏt let lơ, geh âk jêr jŏt mpeh ntung trong, tuch tăm n'hanh rhŏ dŏng khlay. Bôk nău rgop an tâm nchră n'gluh an tât năm 2030, ăp xã geh dŭt đêt du trong ntĭt leo wăng sa kloh uĕh mô lah wăng sa tâm pleh, du rêng tâm rgop tuch tăm, nkret njêng n'hanh tăch; nkre hun hao wăng sa đah mât ndray văn hóa, rgâl uĕh ntŭk gŭ rêh.

Nău ŭch tơm prăk nchrăp nklăp 5.000 rmen prăk, geh nklăp 3.000 rmen prăk rgŏ jă ta ntŭk n'hanh nsum mpôl, nklăp 2.000 rmen prăk bah tơm prăk n'gor. Nău dăp rgum tơm prăk na nê̆ tĭng nău dơi tâm pă tơm prăk n'hanh rgŏ jă ăp tơm prăk tâm di.

Ta rƀŭn nchră, kruanh ăp n'gâng kan nău kan n'hanh ntoh măt ăp xă lĕ dăn đă ăp trong mkra gay bôk nău rgop an tâm nchră ơm dơi mbơh ƀư tâm nău ngăn. Wa Nguyễn Duy Tính, Kruanh UBND xă Phú Mỡ, n'gor Dak Lak dăn đă ơm geh trong ntĭm nti mpeh rnoh ndơ ƀư lor n'hanh trong ƀư tâm rgop tơm prăk gay lor nchrăp ntuh kơl ntơm bah bôk năm 2027. " Rgum rdâk njêng ndơ dŏng ntung trong, na nê̆ kơt ăp nău kan pă dak an ăp thôn ƀon nuĭh rnoi mpôl đê̆. Rgum rdâk njêng ăp nkual ntrơn du an ăp thôn ƀon nuĭh rnoi mpôl đê̆. Năp ăp ndơ dŏng an ăp ngih sam ƀŭt, lơn lah ăp ngih sam ƀŭt nội trú an ăp oh kon hŏk."

Tâm rnôk nĕ, N’gâng kan Dân tộc n'hanh Tôn giáo n'gor Dak Lak dăn đă ăp xă săch nău kan tâm di nău ŭch, mât uĕh nău dơh geh mpeh nkra njêng, nău kan way ơm n'hanh pâl nđaih nkre đah văn hóa ta ntŭk. Ăp ntrong kan an geh trong mkra mât uĕh jêh ntop kơl.

N'glôn jêh rƀŭn nchră, wa Y Nhuân Byă, Groi kruanh UBND n'gor Dak Lak, đă ăp n'gâng kan, nău kan n'hanh ăp ntŭk uănh năl na nê̆ nău kan, nău ngăch ăp năm, tâm rgop tâm pă tơm ndơ, der bah tâm rkeh đah ăp bôk nău kan. Ta năp măt, rgum nchrăp ăp ndơ ƀư tĭng năm 2027, kơl lor ntung trong khlay. "Rgum ƀư tĭng bôk nău kan nkre đah hun hao wăng sa, âk ntil ăp trong ƀư tĭng, lơn lah n'hao nău geh, rgâl nău rêh bah nuĭh ƀon lan. Kơt nĕ, rnoh rnăk ach o kŏ lah ngoăy tâm ăp nău mpŏng dŭt khlay. 20 xă dơi săch ri an geh nchrăp uănh nđôi, năl nău ŭch kloh n'hanh dăn đă tâm di."

H Xíu/VOV Tây Nguyên