N’glôch jêh rơh hop, Tổng Bí thư, Kruanh dak Tô Lâm uănh năl tâm bah ri aơ, pah kan tâm boh dak bah dih n’hanh lăp rgum dak bah dih geh âk nău dơi uĕh, geh rgâl mpeh săk tam nsŏng kơl, kan nsum n’hanh leo tĭng ƀư, rgop mât nâp ntŭk gŭ rêh bah tâm lơh tâm su, đăp mpăn, pơk hvi tâm boh n’hanh njêng tay tơm ndơ hun hao neh dak.

Tâm boh dak bah dih ta âk trong, âk ntil nău kan dơi an ƀư ăp kôp, pah kan tĭng groi nđôi ăp nău ton, nău tâm ban ŭch tĭng kơn rgâl bah kơp nđăp rnoh ngăch ƀư jêng uănh năl lôch jêh, kloh nău dơn kan. Tổng Bí thư, Kruanh dak đă ăp Ban pah kan rgop âk n’gâng kan ntik n’hao tay nău khlay kan nsŏng kơl, tâm pă kan gay n’hao săk tam tay, jŏ jong tay bah ăp nău dơi hŏ geh. Ăp nhih pah kan geh tât ân rgum mât dŏng ăp nău dơn kan rgum tơm tâm ăp khay kêng dŭt năm, n’hao nău tam kan tâm boh dak bah dih, rgâl ăp nău tâm ton jêng trong nchrăp kan, ndơ geh ƀư n’hanh ntŭk tăch rgâl ngăn ngăn rhŏ dŏng an nău rêh ƀon lan; nchrăp uĕh an nău kan let năp tay, tâm nê geh APEC 2027.