Ta thôn 12, xă Bảo Lâm 1, âk rnăk ƀon lan lĕ nchrăp ndâk ƀư ntung, công mpeh bah năp jay gay jao neh ƀư trong hăn. Geh ăp rnăk ân jăng lơi ndơ ƀư ta rnoh neh dŭt têh, yơn rnôk dơi n'gâng kan ƀon lan rgŏ jă, rblang mpeh nău geh jŏ jong, kônh wa lĕ tâm ban ŭch, nta nău dơh nơih an ntŭk kan mbơh ƀư. Uănh saơ nău tâm ban ŭch bâh ƀon lan, wa Võ Chí Nhân, kruanh thôn 12, xă Bảo Lâm 1, rhơn răm: "Ƀon lan lah dŭt tâm ban ŭch n'hanh rhơn rnôk dơn geh nău ntrŭnh ƀư trong aơ. Kônh wa aƀaơ dŭt âk lah lĕ dôh rklaih sŏk neh ntu gay an ntŭk kan ntơm ƀư nău kan aơ. Phung hên ŭch lah jêh rnôk trong geh ƀư ri mbra dŭt dơh ngăn tâm nău hăn nsong bah kônh wa, nti nsơm bah ăp kon său".

Ntơm bah nău tâm ban ŭch tâm du ndơ ƀư ntung trong an saơ, rnôk n'gâng kan ƀon lan hăn lor tât đah nuĭh ƀon lan, rblang kloh nău dơi n'hanh nău kan, ăp nău wăk kol dơi dôh rklaih. Trong ƀư nê dôl dơi âk ntŭk ta Lâm Đồng kơt dŏng tâm mkra ăp nău hôm nkân geh tât ngăn tât nău rêh jêng nŭih ƀon lan. Ta xã Bảo Lâm 3, neh ntu lah ngoay tâm ăp nău kan ntoh luh âk ngăn nău dăn đă. Tâm rơh mâp nuĭh ƀon lan nkô̆ nău kêng dŭt khay 9, nuĭh ƀon lan nkoch ăp nău mbơh tơih ăp nău jêr jŏt mpeh tâm trŭp nău lư neh ntu, pă sămƀŭt kơp dơn dŏng neh, nkhah êng rnoh neh n'hanh rnoh trok tâm. Ta năp nău ngăn aơ, n'gâng kan ƀon lan xă rgum tâm pă ntil ăp nău kan, năl lĕ đah nău kan mkra, rƀŏng tât n'hŭch nău jêr n’hanh rhoăt đêt mông nar mkra nău kan. Mpeh nău mkra ăp nău hôm nkân aơ, wa Vũ Minh Đoàn, Groi Kruanh UBND xă Bảo Lâm 3 lah rjăp: "Mpôl hên dôl rgum mkra ăp nău hôm e, lơn lah samƀŭt rhăch nău" nău kan hành chính mpeh neh ntu. Ăp nău kan jŏ jong mô hŏ dơi mkra dôl dơi kơp uănh tay, mkra rjăp, gay nta nơih ngăn an nuĭh ƀon lan rnôk ƀư tĭng ntrong kan n'gâng kan ta ntŭk 2 gưl".

 Mô dơn ăp samƀŭt hành chính, ăp nău nchrăp ƀư ntuh kơl jŏ jong âk năm đŏng nchrăp ndơ̆ luh nău đă ân rgâl trong mkra. Ta xă Đạ Huoai 3, nău nchrăp ƀư Thuỷ điện Đạ Huoai 2 đah ăp nău wăk kol rlău 20 năm lah ngoăy tâm ăp nău jêr geh ta ntŭk rgum mkra. Nău jêr jŏt têh ngăn lah njêng nău tâm ban ŭch tâm trok tâm neh ntu. Tă bah 8 rơh rƀŭn, tâm nchră na nê̆, n'gâng kan ƀon lan xă tĭng kơn mkra ăp nău dăn đă bah nuĭh ƀon lan, nta trong dơh an ƀư nchih rgum, kơp uănh n'hanh tĭng ƀư ăp gưl bah kơi tay. Nkoch ăp nău rgâl tâm rnôk doh rklaih nău nchrăp ƀư, wa Nguyễn Văn Trinh - Kruanh UBND xă Đạ Huoai 3 mbơh: "Jêh 8 rơh rƀŭn, mpôl hên rgum lam trong kan chính trị nkoch trêng, rblang n'hanh nkra ăp wăk kol bah nuĭh ƀon lan. Tât aƀaơ, nău nchrăp ƀư lĕ dơn geh nău tâm ban ŭch. Ƀon lan dôl tâm rgop mbơh ƀư uănh nđôi, kơp uănh gay ƀư tĭng trok tâm, sŏk neh ntu, nsôih gay nău nchrăp ƀư ntơm ƀư tâm năm 2026".

Ăp nău rgâl ta Bảo Lâm 1, Bảo Lâm 3 n'hanh Đạ Huoai 3 lah ăp ntŭk uănh năl na nê̆ tâm nău nsrôih dôh rklaih jêr jŏt, mbluh soih tơm ndơ hun hao bah Lâm Đồng.

Mbơh nău văng sa-rêh jêng 9 khay năm 2026 ân saơ, dĭng lĕ tơm prăk ntuh kơl ƀư nău kan lĕ rngôch lam nău rêh jêng kon nuĭh bah n'gor geh rlău 84.100 rmen prăk, hao rlău 12% rđĭl đah ndrel khay aơ. Lam n'gor geh nklăp 3.000 nău nchrăp ƀư ntuh kơl hôm e geh nău tam, dĭng lĕ prăk dăn ƀư rlău 947.000 rmen prăk. Yơn lah nhiên, ăp nău wăk kol mpeh neh ntu, ntrơn du ntŭk gŭ, samƀŭt ntuh kơl n'hanh nău dơi kan ndâk ƀư hôm e khuch tât rnoh ngăch âk nău nchrăp ƀư.

Ta năp nău ŭch geh pơk hvi ăp tơm ndơ hun hao, Ủy viên Trung ương Đảng, Bí thư N'gor ủy Lâm Đồng Y Thanh Hà Niê Kđăm ndơ̆ luh nău đă rgâl mhe nău mĭn ƀĭt joet, n'hao lĕ đah nău kan n'hanh săk rnglăy ƀư tĭng tâm lam trong kan chính trị: "Lam trong kan chính trị ân rgâl dăng bah nău mĭn ƀĭt joet an rgâl nău mĭn njêng hun hao, bah nău jêr jŏt rnoh an ƀư săk rnglăy ngăn ngên. Rgum dôh rklaih ăp ntŭk kol hun hao, ntrôl ngăch ƀư ăp nău nchrăp ƀư khlay, ăp nău nchrăp ƀư ăp nău wăk kol, jêr jŏt n'hanh n'hao săk rnglăy n'gluh tơm prăk ntuh kơl nsum. N’hao tay nuih n'hâm lĕ đah nău kan, lah hăn ndrel đah ƀư, krêp dăch đah nău kan dơi jao, ƀa bơ hăn ôp uănh, ntrŭt ntrôl, ngăch dôh r klaih jêr jŏt, wăl kol, nsrôih rgâl jêng na nê̆ tâm ăp khay dŭt năm 2026, ƀư lôch jêh dŭt âk ăp nău rƀŏng lĕ n'gluh an".

Bâh ăp nău ƀon lan dŏng tât ăp nău nchrăp ƀư hôm nha geh âk năm, rgâl ta ntŭk kan bah dâng an saơ săk rnglăy bôk năp tâm nău ƀĭt joet n'gâng kan ƀon lan 2 gưl ta Lâm Đồng. Gay ăp nău tă geh nê an pơk hvi n’hanh ƀư ueh, nău khlay lah lŏ ƀư ueh lơn tay mkra nău kan tât dŭt, rgâl nău nsrôih jêng săk rnglăy na nê̆, njêng tay nuih n’hâm an Lâm Đồng hun hao./.