Ăp ntŭk kan, ăp n’gâng kan an geh tâm rgop na nê̆, ngăch ndăn doh rklaih ăp nău jêr, uănh năl na nê̆ nău dơn kan bâh nuĭh leo kan bôk năp n’hanh ntrôl ngăch ƀư ăp ntrong pah kan. Kruanh Quốc hội Trần Thanh Mẫn đă ăp nău kan, nău nchrăp ƀư kơl an rơh rƀŭn nchră APEC 2027 ta đặc khu Phú Quốc, n’gor  An Giang, an geh ƀư lôch ta năp lơ 30/6/2027. Kruanh Quốc hội lĕ đă an geh mât đăp mpăn ăp nău leo kan an tâm ban, uănh khlăy ndơ dŏng ntung trong, điện, dak, mât ueh dak ndok, ndok dmbrâm, rnă njrăng đăp mpăn n’hanh njrăng rdâng ŭnh sa. Nău kan ntrơn ntŭk gŭ an ƀon lan geh ƀư ueh, mât đăp mpăn an ƀon lan pă neh ƀư nău kan geh ntŭk gŭ mhe đăp mpăn, tâm ban mô lah ueh lơn ntŭk ơm. Nău ƀư tĭng di nău kan, ueh nâp n’hanh di nău ntrŭnh pháp luật mbra geh ntop jêng mât đăp mpăn nău dơi bâh rơh rƀŭn chră gưl têh APEC 2027, nkre lah mbơh tơih rup ueh Việt Nam đah băl mpôl lam ntur neh.