Nar 18/4/1976, ăp rmôt nuĭh Gia Lai bôk năp geh măt ta Nam Ban. Jêh nĕ, ăp mpôl druh ndăm bah Từ Liêm, Đông Anh, Thanh Trì, Ba Đình, Đống Đa n’hanh âk ntŭk bah hà Nội tĭng jâng hăn trong. Knŭng tâm 2 năm rlău 2.600 druh ndăm tiền trạm lĕ muih kuăih rlău 1.900 ha neh, pơk hăng rhiăng km trong hăn, ndrel ƀon lan ăp rnoi nuĭh ta ntŭk ƀư jay, hun hao tuch tăm, jêng ăp ƀon mhe.

Rlău 50 năm ndâk njêng n’hanh hun hao, nkual wăng sa mhe Hà Nội ta Lâm Đồng lĕ jêng ăp nkual tăm cà phê, tơm ka yâu mât ndrŭng, lŏ mir kơt dŏng công nghệ mhe; ntung trong, ngih samƀŭt, ngih dak si dơi ntuh kơl, nău rêh nuĭh ƀon lan nar lơ rgâl. Săk kuăl Lâm Hà, tâm rgop bah Lâm Đồng n’hanh Hà Nội rnôk nkuăl dơi ndâk njêng năm 1987, jêng rup ndah hăn ndrel đah 2 ntŭk. Ntoh ngơi ta ƀư nkah gĭt, wa Hồ Văn Mười, Ủy viên Trung ương Đảng, Kruanh UBND n’gor Lâm Đồng, mĭn lah săk rnglăy 50 năm nău rgum rgop bah soan, nău roh n’hanh nuih n’hâm tâm rnglăp bah âk rơh kơn. "Uănh tay trong hăn 50 năm, he geh ntŭk gay mĭn lah nĕ mô knŭng lah rnôk muih kuăih du nkual neh, ma hôm trong nkra njêng nău rêh, rdâk njêng nău nsing nơm n’hanh rgum njêng nău rêh rgŏ năp an âk rơh kơn. Săk rnglăy nĕ mô knŭng dơi ưeh đah ăp ndơ ƀư, trong hăn, mô lah nkual nkra njêng mhe ma hôm ntoh tĭng chor jay têh nâp nâl, ăp jrô nti âk răm, tĭng rnăk geh nău rêh đăp mpăn lơn".

Nkah gĭt 50 năm nkual nêh wăng sa mhe Hà Nội ta neh Lâm Đồng, âk nău ƀư văn hóa, thể thao lĕ dơi ƀư. Ta aơ, rgum rƀŭn way ơm, mpla nsơ samƀŭt rup kăl e n’hanh nkoch mbơh ndơ OCOP dơi ƀư ta nkual Lâm Hà, mpơl tay trong ndâk njêng nkual wăng sa n’hanh dơi tâm rgop văn hóa đah 2 ntŭk.

Rơh aơ, n’gor Lâm Đồng n’hanh nkual ƀon têh Hà Nội lĕ ký samƀŭt nklah gĭt kan ndrel lĕ rngôch. Ủy ban MTTQ Việt Nam nkual ƀon têh Hà Nội an ndơ ntĭt mpơl ntop kơl rlău 1,3 rmen prăk ndâk ƀư 22 jay Tâm rnglăp an ăp rnăk jêr jŏt. N’gor Lâm Đồng rnê nkhôm đŏng ăp rmôt, êng nuĭh n’hanh rnăk wâl geh âk nưu rgop tâm ndâk njêng hun hao nkual wăng sa mhe.

N’gul rach năm bah năp, ăp nuĭh kon Hà Nội djôt soan mom ndăm n’hanh nău ŭch tât nkual yôk prêh Lâm Đồng muih kuăih, ndâk njêng nău kan. Nar aơ, ăp rơh nthoi tay dôl mât săk rnglăy nĕ đah nău wât blău, công nghệ n’hanh nuih n’hâm mhe.