Nar kêng dŭt pơh, rnăk wa Rcom H’Kliơng ta buôn Rưng Ma Nin, xã Ia Rbol, n’gor Gia Lai geh nar wăch rgum njôm wăr bah meng yăng ndrănh, rhơn mƀak dơi Hội Khuyến học Việt Nam ntăm an bằng khen. Ntơh măt rnăk wâl ndrel mhe râng Tâm nchră mpư rnê ăp trong ntĭt leo kơt nti ntoh lư lam dak ta thủ đô Hà Nội plơ̆ sĭt. Wa Nay Nhơn – klay ƀong bah wa Rcom H’Kliơng, lah nai ntĭm hŏ rlu ranh, an lah rơh liên hoan mpơl nuih n’hâm nkah gĭt me bơ̆ hŏ uănh khlay tât nău nti ren bah kon său:

“Rnăk mpôl hên, bol ntơm nơh dŭt jêr jŏt, rơh kơn u che, me bơ̆ pah kan jan sa ŏ r’ah, ƀư mir ba yơn hôm mât kon nti ren ăp dăp. Tât aƀaơ, nău rêh bah rnăk mpôl hên hŏ đăp mpăn n’hanh oh kon nti ren tay tât lôch tât dŭt. Me bơ̆ hŏ nsrôih gay oh kon nti ren, dah nău tât jêr jŏt rlău dơi da dê, mpŏng an oh kon nti ren jêng nuĭh gĭt blău, kơl uĕh an ƀon lan n’hanh pah kan lam rêh jêng kon nuĭh. Nê lah nău ntĭnh ntăn, nău ntrŭt nsôr bah me bơ̆ an oh kon. Ntơm bah nê oh kon djăt nău me bơ̆, tĭng ƀư di trong nchrăp, trong kơl n’hanh pháp luật bah Ngih dak”.

Wa H’Kliơng an gĭt, ăp kon păng ntơm hao têh lôch nar neh dak rklaih luh. Nău rêh ta nkual yôk bri Ia Rbol, n’gor Gia Lai rnôk nê nơh dŭt jêr jŏt. Hŏ geh rnôk rnăk wâl dơn sa dơm mbo wâr, bum blang, mô dơn nê geh rnôk ât ji ngot đŏng. Tâm nău krit jêr nê, ur sai păng hôm nsrôih mât chăm an oh kon hăn nti, mpêt tĭng gâl bum blang, gâl mbo đŏng; geh rnôk rong ndơ sa bah he an kon gay geh suan hăn nti đŏng. Păng n’hao êng săk yor lĕ rngôch 9 hê kon (5 bu ur, 4 bu klô) nti ren jêng nuĭh da dê; Nuĭh nti kan dak si, nuĭh ƀư nai ntĭm, nuĭh pah kan tâm mpôl tahen mô lah tâm nhih pah kan ngih dak gưl xã tât gưl n’gor

“Kăl e, bol wăng sa dŭt jêr jŏt, kan dŭt jâk r’ah yơn ân rvê oh kon nti ren. Geh rnôk piăng mô tŏng sa, bok n’gut ao nsoh môh geh, gâp hôm rôih an khân păng hăn nti đŏng. Yor gâp mĭn, ăp kon geh dơi nău rêh răm mƀak lah nơm geh hăn nti, tât lôch geh nău gĭt blău tay hăn pah kan, mât êng săk nơm. Gâp hŏ rlău 78 năm deh hôm, mpŏng kônh wa tâm ƀon nsrôih an oh kon nti ren. Geh nti ri mơ geh nău rêh uĕh lăng, kơl uĕh an lam rêh jêng kon nuĭh, an ƀon lan”.

Wa Nay Mun – Kruanh Hội Khuyến học xã Ia Rbol, n’gor Gia Lai n’hao êng săk xã Ia Rbol lah nkual neh geh nău way ơm jăp gơih kơt nti. Ntĭt kơt rnăk wa Ksor Chuel ta buôn Rưng Ma Nhiu dơi mpư rnê lah “rnăk cử nhân”. Rnăk wa Rcom H’Kliơng ta buôn Rưng Ma Nin mhe dơi Hội Khuyến học Việt Nam ntăm an bằng khen yor geh nău dơi ngăch prăl tâm trong leo kơt nti tât dŭt nău rêh. Bah nê rgop ring lam trong leo jăp gơih nti ta ntŭk.

“Wa Rcom H’Kliơng geh lĕ rngôch 9 nuĭh kon nti ren jêng nuĭh da dê. Aƀaơ ăp kon lôch nti têh jêng n’hanh lăp pah kan ta ăp nhih pah kan ngih dak. Mpŏng kônh wa ƀon lan he kơt nti trong ƀư dja bah rnăk wâl. Nkre, kuăl jă ntrŭt nsôr kônh wa ƀon êng dăch ngai, nkoch trêng gay ăp rnăk ndrel nsrôih pah kan n’hanh mât rong oh kon nti ren ăp dăp, jêh aơ tay lăp pah kan tâm nhih pah kan ngih dak, rhŏ dŏng an ƀon lan”.

Rnăk wa Rcom H’Kliơng liên hoan yor dơi Hội Khuyến học Việt Nam ntăm an bằng khen lah rnôk gay mpơl nuih n’hâm nsĭt n’glĭng yor nău n’groh an rŭ hôch bah me bơ̆ hŏ mât chăm nti ren an kon său. Nê lah nuih n’hâm jăp gơih nti ren dơi nđơn tay rlău ăp rơh kơn, n’hanh rgop ring lam ăp rnoh khlay uĕh lăng tâm ƀon lan.