Yuh Đinh Thị Trang (25 năm deh), ta thôn Nước Vuông, xã Sơn Tây Thượng tă ƀư mir ba ta rnăk wâl. Ntơm bah rnôk lăp pah kan ta Hợp tác xã Tuch tăm si gle n’hanh Tăch rgâl rhŏ dŏng Sơn Bua (Hợp tác xã Sơn Bua), xã Sơn Tây Thượng, n’gor Quảng Ngãi, yuh ntơm lăp nti dŏng ndeh rklư, ƀư bên đah nkret njêng, nklâm tâl ndơ tuch tăm. Lăp pah kan ta HTX, yuh Trang nkre geh tơm wăng sa đăp mpăn, nkre geh rnôk nti nău kan, n’hao nău blău kan:

“Gâp hăn ta aơ gay kan, nti nău kan, ôp joi ăp ntil ndơ he mô hŏ gĭt, gay ƀư jêng ăp ndơ kah uĕh lơn”.

Trong rƀŏng hăn bah Hợp tác xã Sơn Bua lah leo ƀư tuch tăm, nkret njêng ta ntŭk, nta joi nău kan an nuĭh ƀon lan n’hanh tĭng kơn rdâk njêng tơm ndơ gay nkret njêng đăp mpăn ta mpeh yôk yang. Nuĭh tơm njêng HTX dja lah yuh Lê Thị Ánh (45 năm deh), nuĭh Ca Dong, ta xã Sơn Tây Thượng. Năm 2020, yuh Ánh n’glêh an rlu nău kan Ngih dak, sĭt ƀon tơm njêng Hợp tác xã Tuch tăm si gle n’hanh Tăch rgâl rhŏ dŏng Sơn Bua đah nău ŭch rŏng n’gluh ndơ tuch tăm luh ntŭk tăch rgâl. Bah tơm prăk bôk nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang lvang năm 2021- 2030, Hợp tác xã Sơn Bua dơi ntop kơl rvăt máy nkret njêng, ndơ dŏng kan tuch tăm.

Yuh Lê Thị Ánh an gĭt, bôk năp, Hợp tác xã tăm ăp ntil ndơ kơt prit: pâr jôn, ndrănh prit, dak prit; lôch nê pơk hvi tât mbŭt lha ƀek bri, ƀăng vót, cau n’hanh du đêt ntil tơm dak si. Tât aƀaơ, hợp tác xã geh 7 ntil ndơ OCOP:

“Aƀaơ, an nuĭh ƀon lan tăm ri ân pơk jay xưởng dja. Pơk jay xưởng ri ân rgum rvăt, kônh wa mơ nănh tăm. He lah dơm lah he mô ƀư ngăn ngăn ri nklăp nuĭh ƀon lan mbra mô nănh ƀư. Tât lĕ nău rêh khân păng mô geh trong rƀŏng n’hanh mô dơi rgâl nău gĭt blău mât chăm”.

Ntơm nơh, âk rnăk ƀon lan way an du tơm prit rtah 5 tât 6 tơm kon ndrel du tơ̆. Tơm me nkre mât đah âk tơm kon, nkre mât ndrŏng prit jêng ndrŏng jê̆, săk uĕh mô tâm ban. Đảng viên Lê Văn Hiền (37 năm deh), nuĭh Ca Dong, đă nuĭh ƀon lan rong tay ntơm bah ngoăy tât bar tơm dơm, kơl tơm me rgum mât ndrŏng prit. Nô Lê Văn Hiền an gĭt, ntơm nơh, du ndrŏng prit tăch bu dăn rvăt nklăp 20.000 - 30.000 prăk dơm, aƀaơ dơi hợp tác xã rvăt đah rnoh khlay rlău 3 tơ̆: 

“Rnôk hŏ ntrŏng sĭt ta aơ ƀư ri he way ndrăp n’hanh mĭn rvê ân dâk leo lor, mhâm ƀư gay kônh wa mbra kơt nti dơi ăp ntil nău he hŏ tă gŭ mĭn, kơt nti. Đah ăp ndơ geh tuch tăm ta ntŭk, mhâm ƀư gay dơi tât di rnoh uĕh ri ân geh nău gŭ mĭn, ntuh kơl n’hanh tĭng groi nđôi ăp njuat kônh wa hŏ mhâm tĭng ƀư”.

Wa Nguyễn Xuân Thọ, Kruanh jrô kan Wăng sa xã Sơn Tây Thượng, n’gor Quảng Ngãi an gĭt, ăp trong ntĭt leo hợp tác xã ƀư tâm nkrêp kan nsum, nkret njêng n’hanh tăch ndơ tuch tăm, rgop nta joi nău kan, n’hao geh tơm wăng sa an nuĭh ƀon lan. Du đêt hợp tác xã geh ăp đảng viên ntĭt leo lor, dâk leo lor tuch tăm hŏ rgop rgâl trong mĭn, trong kan an kônh wa: 

“Aƀaơ, ta n’gor geh âk hợp tác xã đŏng. Ăp hợp tác xã geh du trong ntĭt leo wăng sa êng. Êng hợp tác xã Sơn Bua geh trong leo tâm nkrêp kan nsum rnoh khlay, đah ăp ndơ geh ƀư kơt trà play ƀek, prit bri, ƀăng vót n’hanh âk ndơ geh ƀư êng ƀa ƀă. Jêh aơ tay, rnôk nkre kan nsum đah ăp hợp tác xã ta ntŭk, mpôl hên mbra njêng luh âk ntil ndơ an ta ntŭk, nkre tâm nkrep kan nsum đah ăp ntŭk êng ƀa ƀă gay jêng ăp rêng ndơ geh ƀư rhŏ dŏng an nuĭh rvăt”.

Ntơm bah ăp ndơ kah khlay way bên bah yôk bri, ăp đảng viên nuĭh Ca Dong dôl rgop pơk luh trong rƀŏng ƀư wăng sa mhe ta Sơn Tây Thượng, n’gor Quảng Ngãi.