Nar rgum pla n’hơ, nkoch mbơh ndơ geh ƀư ntơm njêng nău kan, buăt nthoi ndơ geh ƀư OCOP ƀư ta xã Phú Thiện, n’gor Gia Lai geh 17 ndrơng ndơ bah 10 xã, nkoch mbơh âk ndơ geh ƀư tuch tăm, ndơ ngêt sa puăch ka nkret njêng n’hanh ndơ kah khlay way ơm. Lĕ rngôch nsĭt têl nkah ti kan bah nuĭh bu ur n’hanh rom uĕh văn hóa săk ntơr êng bah nkual neh Gia Lai.

Râng nar rgum, Câu lạc bộ cheh tanh bok brai Plơi Amil, xã Phú Thiện geh 6 bu hăr blău; nkre nkoch mbơh ndơ geh ƀư nkre nchreng an uănh cheh tanh bok brai way ơm. Wa bu ur Kpă H’Uyên, Kruanh rmôt cheh tanh  Plơi Amil, xã Phú Thiện nkoch:

“Dơi u che, me bơ̆ nti cheh tanh ơm bah jê̆ jêng mbrơi mbrơi gâp dêh rŏng đah nău kan dja. Gâp ŭch rŏng mât ndray nău kan cheh tanh an rơh kơn bah kơi tay jêng ndrel oh yuh nkre ƀư, nkre trêng nti tay trong cheh tanh ma ti. Ndơ geh ƀư lôch, mpôl hên chŭp rup, n’glăp ta mạng xã hội gay tăch. Ăp khay, nsĭt geh nklăp 10 rkeh prăk đŏng”.

Mô dơn nău kan cheh tanh bok brai, ndơ sa way ơm bah ƀon lan ăp rnoi nuĭh dôl jêng trong rƀŏng hun hao wăng sa bah bu ur ta Gia Lai. Yuh Rcom H’Liên, ta thôn Plei Knông, xã Phú Thiện way nchih nkoch ta Facebook trong gâm ndơ sa bah nuĭh Jarai kơt trău lha bum blang, ka trích lha klôih, djăr gŭch lĭp boh lha klôih. Nơm geh mạng xã hội, ăp ndơ sa way bên tâm nău rêh ƀon lan dơi âk năch dăch ngai gĭt tât. Yuh Rcom H’Liên nkoch mbơh ndơ geh ƀư ta Nar rgum:

“Rnăk gâp hŏ tăch ăp ndơ sa kơt ka trích lha klôih, lha bum blang wâr, djăr gŭch hŏ bah ơm. Ntơm bah rnôk dŏng mạng xã hội, mpôl hên dơi băl mpôl n’hanh năch dăch ngai kơl rvăt âk lơn. Nơm geh kơt nê, rnăk nsĭt geh tay tơm wăng sa, nkre nkoch mbơh ăp ndơ sa ntĭt êng bah ƀon lan rnoi mpôl đê̆ ƀon tơm ta ntŭk đŏng”.

Ntơm bah ăp ndơ geh ƀư nsĭt săk tơm văn hóa tât ăp trong ntop kơl joi geh trong rêh tâm dâng, bu ur rnoi mpôl đê̆ ta Gia Lai dôl tĭng kơn nsan hao, rgâl geh nău rêh ma suan rhal he nơm n’hanh nău blău ƀư njêng mhe bah he. Ăp nău nsrôih nê rgop mpơl saơ nău khlay bah bu ur tâm trong hun hao wăng sa rnăk wâl, mât ndray văn hóa way ơm n’hanh rdâk njêng ƀon lan nar lơn ma hun hao.