Ban Văn hóa - Xã hội, HĐND n'gor Dak Lak lĕ ƀư uănh nđôi đah ăp n'gâng kan, nău kan geh tât mpeh leo ƀư nău kan bah ăp ntŭk ntĭm nti lôch dăp rgum, tâm di nău kan năm nti 2026-2027 n'hanh ăp năm bah kơi tay. Lôch dăp rgum, Dak Lak hŭch du n'gul rnoh ntŭk ntĭm nti ngih dak, jŭr hôm 625. Nău leo ƀư tay trong ntĭm nti rgop ƀư dơh ngăch ntŭk mât uănh, rgum rnoh nuĭh kan an ntĭm n'hanh nti. Yơn lah, nău aơ kŏ ndơ̆ luh ăp nău mô dơi tâm pă rmôt kan, ngăn lah ta ăp ngih samƀŭt têh, geh âk phân hiệu tâm ƀah ngai ngât.

Aƀaơ lam n'gor Dak Lak geh nklăp 33.000 nai ntĭm, tâm rnôk tĭng nău ntrŭnh lah an geh rlău 35.000 nuĭh. Dôl uănh, bôl mô tŏng nai ntĭm ta âk gưl nti, môn nti, ntŭk hôm nha geh 686 nai ntĭm rlău rnoh dơi pă an, dŭt âk ta ăp môn Ngữ văn, Lịch sử, Địa lý. Tâm rnôk nĕ, ăp môn Tiếng Anh, Tin học, Mỹ thuật, Âm nhạc n'hanh Giáo dục thể chất hôm e mô tŏng nai ntĭm. Nău dơi tâm pleh nai ntĭm đah ăp ntŭk kan mhe tŏng geh nklăp du n'gul nău ŭch geh, ƀư nău ŭch săch n'hanh tâm ton nai ntĭm hôm e âk.

Bah meng nê, rnoh nŭih kan kơl an tâm ăp ngih săm ƀŭt jêh tâm rnglăp mô hŏ geh tâm di đah nău ngăn. Geh ngih samƀŭt âk ntŭk ntĭm nti tâm ƀah ma đêt km, yơn nŭih kan dak si nti kon se knŭng geh du hê. N'gâng kan Nội vụ Dak Lak đă N'gâng kan ntĭm nti kơp uănh, rgâl rnoh nŭih kan tĭng nău têh n’hanhl nău kan bah ăp ntŭk ntĭm nti, đăp mpăn tŏng nău ŭch mât chăm n'hâm soan kon hŏk.

Du nău wăk kol tay lah mkra nău kơl đah cán bộ mât uănh rmeh jêh dăp rgum. Ăp cán bộ mât uănh ơm lĕ dơi dăp rgum tât ntŭk pah kan mhe, kơp lĕ ma ƀư nai, mô geh tâm rmôt uănh na nê̆. Nău aơ ƀư du đêt nuĭh geh nău ŭch rlu kan yơn mô hŏ dơi mkra nău kơl. N'gâng kan ntĭm nti n'gor Dak Lak dăn đă N'gâng kan Nội vụ ơm rgâl trong ntĭm nti gay doh rklaih jêr jŏt an ăp ntŭk, đăp mpăn nău dơi n'hanh đăp mpăn nuih n'hâm rmôt kan jêh dăp rgum.