Dơn nău jă bah Kđăch dak Đan Mạch Frederik X n'hanh i ur kađăch, Kruanh Hội đồng Châu Âu António Costa n'hanh Thủ tướng dak Bỉ Bart De Wever, ôi aơ (19/10), Tổng Bí thư, Kruanh dak Tô Lâm ndrel I ur n'hanh mpôl ntơh măt gưl têh Việt Nam hăn khâl gưl Ngih dak dak Đan Mạch, khâl ngăn Liên minh Châu Âu (EU) n'hanh dak Bỉ ntơm bah nar 19 -24/ 10 năm 2026. Rơh tât khâl gưl Ngih dak tât Đan Mạch bah Tổng Bí thư, Kruanh dak Tô Lâm lah n'gâng tơm khlay tâm boh bar dak, mpơl nău uănh jong, nău nsrôih chính trị n'hanh nău nsing nơm đah kruanh rđău kan bar dak, nkre njêng suan ntrôl mhe ndơ̆ tâm boh Việt Nam-Đan Mạch hao prêh mhe. Đah EU, rơh tât khâl lah rnôk gay bar ding ƀư jru hvi lơn đŏng ăp n'gâng tơm tâm boh khlay, lơn lah mpeh tăch rgâl, ntuh kơl, khoa học - công nghệ, ntĭm nti nuĭh kan, tă bah nĕ ndâk njêng tâm boh Việt Nam- EU jêng trong ntĭt leo tâm boh ASEAN-EU. Đah Bỉ, Rơh tât khâl gay bar ding njêng njoat hăn khlay mpeh tâm boh tâm ăp trong kan Bỉ geh nău dăng n'hanh Việt Nam dôl rgum kơl lor kơt khoa học - công nghệ, chip bán dẫn, ŭnh nar sĭt jêng tay, lŏ mir nđĭr uĕh n'hanh rgâl blău ƀư mhe, logistics n'hanh ndrâm dak lêng gĭt blău.