Ta Nkual wăng sa Vân Phong, ăp nău nchrăp ƀư mhe tâm nău kan công nghiệp ntop kơl dôl pơk tay ntŭk nsing an rêng ƀư nkra njêng. Bah meng Ngih măy ê nkra duk mpan HD Hyundai Việt Nam, ta aơ dôl mbơh ƀư Nău nchrăp ƀư Ngih măy ê nkra ndơ ƀư duk mpan bah Miboo Vina, tơm prăk ntuh kơl 528 rmen prăk, dơi mpŏng kơi ntop nău dơi kan an nău kan rdâk ƀư ndeh păr. Wa Nguyễn Văn Trãi, Giám đốc mât bôk kan Miboo Vina, an gĭt: "Dŭt âk lah nău kan ntrŭp nglăp, nkra njêng, koh n'gĭng kim loại ri nău tơm hôm e lah kỹ sư Việt Nam, ăp nuĭh mât bôk kan nkra njêng lĕ rngôch lah nuĭh Việt Nam. Aƀaơ he ƀư nău kan nĕ uĕh đŏng. Du bôk ndeh rklư ƀư lôch jêh dơi ƀư ta bah dih, rgâl bah năp đaơ bu ƀư lĕ rngôch tâm nhih măy Hyundai. Aƀaơ nău dơi bah khân păng mô tŏng, mpôl hên ndơ̆ ndoh ndơ gay khân păng nglăp ƀư tay ngăch lơn, n'hao rnoh âk ndeh tâm du năm".

Ndrel đah ndâk ƀư, công nghiệp, pâl nđaih lŏ lah suan ntrôl têh bah hao jêng. 9 khay, Khánh Hòa wơt rlău 20.4 rkeh tơ̆ năch, năch dak bah dih rlău 7,1 rkeh tơ̆; nsĭt geh nklăp 68.000 rmen prăk, hao 21%. Festival dak lêng Khánh Hòa 2026, Nar rgum Văn hóa rnoi Chăm tâl VI n'hanh Miss World 2026 njêng ăp ntŭk ntoh lư, rgop nkoch n'hơ rup gui, văn hóa n'hanh ndơ geh ƀư pâl nđaih bah n'gor. Pâl nđaih hun hao 2 mbrô ntrôl tay hun hao rhŏ dŏng, nchoăn rdeng, tăch rgâl bah ăp ntŭk. Wa Thái Thị Lệ Hằng, Giám đốc N'gâng kan Văn hóa, Thể thao n'hanh Pâl nđaih n'gor Khánh Hòa, an gĭt, nău kan pâl nđaih hôm e mât nău ƀư bôk năp wăng sa bah Khánh Hòa tâm ăp khay tât: "Mpŏng let năp tay mbra wơt dơi du rơh năch Trung Quốc dŭt têh, tĭng kơn geh ăp rơh năch êng ƀa ƀă bah ăp dak êng ƀa ƀă đŏng; ntŭk tăch tâm dak dơi uănh khlay đŏng. N'gâng kan mbra joi tay ăp băl tâm boh gay ƀư tay âk nău kan, âk nău ƀư gay ntrŭt ntrôl pâl nđaih, tâm nê hôm uănh khlay văn hóa lah soan ntrôl bah wăng sa pâl nđaih, hun hao tay âk ndơ pâl nđaih ntĭt êng".

Mpeh ăp nău mô lĕ dơi ƀư, rnoh hao 8,7% bah trong kan công nghiệp lah đêt lơn trong nchrăp ndơ̆ luh. Prăk dŏng logistics, rgâl geh ntŭk tăch rgâl lam ntŭr neh n'hanh mât uănh tơm điện hôm e ƀư jêr jŏt an nkra njêng công nghiệp bah n'gor. Gay tâm di đah nô nău mhe, ăp doanh nghiệp dăn đă geh trong kơl lor công nghiệp nkret njêng, nkra njêng geh rnoh khlay hao âk, hun hao công nghiệp ntop kơl n'hanh droh rklaih jêr jŏt an ăp n'gâng kan hun hao mbrơi. Yơ Trịnh Thị Hồng Vân, Kruanh Hội đồng thành viên Công ty Yến sào Khánh Hòa an gĭt, bôl ma ŭch geh nău kơl an nău pah kan jan sa, doanh nghiệp hôm nha uănh nău nsrôih êng nơm lah nău tơm:

"Tâm rnôk n'gor dôl jêr jŏt kơt aơ, mpeh rnoh công nghiệp, công ty mbra nsrôih gay geh nău hun hao nklăp 30/35%, n'hanh mbra nsrôih ƀư tĭng nău rƀŏng aơ".

Tĭng wa Nguyễn Việt Hùng, Kruanh UBND n'gor Khánh Hòa, ntŭk ntô hun hao bah n'gor hôm e ta rnoh uĕh. Tât aƀaơ, n'gor mhe n'gluh tơm prăk ntuh kơl nsum geh 70%, mkra dơi 106/257 trong nchrăp kan mâp jêr jŏt.

Lah n'gluh 100% n'hanh mkra tay trong nchrăp kan, Khánh Hòa mbra mât dơi rnoh hao rlău 11% bah 9 khay. Wa Nguyễn Việt Hùng an lah, ntŭk ntô hun hao dŭt âk, yơn rnoh hun hao dôl nsing tâm nău dơi tĭng ƀư bah lam trong kan chính trị:"Dŭt âk nău nchrăp ƀư têh jong ma Trung ương dôl uănh khlay, khlay lah he geh rgâl dơi nău dja đŏng? Nău dơn kan bah he n'glĕ nău aơ dơm, aơ lah jâng nsing gay nău nchrăp ƀư jêng ngăn ngăn. Nău nchrăp ƀư ntuh kơl lah he hun hao, ma hun hao dŭt âk lah tă bah nău dơi tĭng ƀư. Jêr jŏt ri oh nô he ndrel rklaih lĕ".

Nău geh 9 khay lĕ njêng ntŭk nsing gay Khánh Hòa ƀư lôch jêh nău rƀŏng hao jêng 2 mbrô năm 2026. Nkô̆ nău bah năp tay lah rgâl tơm ndơ ntuh kơl, nkra njêng, pâl nđaih n'hanh nău dơi Vân Phong jêng nău dơi hao jêng ngăn ngăn, nâp nâl.