Đah 18 rmôt kan râng rgum, Măng rgum Áo jong n'hanh Nah ao rnoi mpôl đê̆ nkoch âk nău uĕh ơm bah ăp rnoi nuĭh, nkual neh yôk prêh rgum nsum ta Dak Lak. Bah ao jong, ao puăn blah tât nah ao tanh Rđe, Jrai, Bunong, Thái, Tày, Mường… ăp nău njroh mprơ mpơl du nău uĕh êng tâm nău âk mpơl bah Dak Lak lôch rnglăp nsum.

Râng njroh mprơ lah ăp cán bộ, hội viên bu ur, ƀon lan kan lŏ mir, bu ur gĭt blău, bu ur ƀư nau kan tăch rgâl n'hanh bu ur tâm mpôl tahen. Ăp ntŭk kan ndơ̆ nah ao vay ơm n'hanh ăp nău nchrăp ƀư uĕh mhe, tâm rgop nău nteh chĭng gong đah ao dai.

Tâm nah ao rnoi Thái, yuh Hoàng Thị Dương, tât bah xã Buôn Đôn nkoch, aơ lah rnôk gay hội viên bu ur ta ăp ntŭk tâm mâp, tâm n’ŭr n'hanh joi gĭt tay mpeh ơm yau ueh bah ăp rnoi nuĭh: "Aơ lah du nar rgum bah bu ur n'hanh kŏ lah rnôk gay nuĭh bu ur tâm rnglăp đah oh yuh bah ăp Hội Bu ur bah ăp xã. Nău way khân pơng lah bu klô, mô geh mông nar gay ma tâm n’ŭr đah nsum mpôl n'hanh aơ lah du nău dơh nơih gay ma oh yuh tâm nđŭr, tâm rnglăp, tâm kơt nti nsum n'hanh hôm joi gĭt dơi tay âk băl mpôl tĭng nkual neh đŏng”.

 Ndrel đah nău ƀư ryơk rnê văn hóa vay ơm, bôk nău kan hôm geh ƀư ntơm ntoh rmôt ăp nau kan KOLs KOCs Dak Lak, gay ma tâm rgop ƀon lan kan lŏ mir, tâm boh nau kan nsum đah ăp nuĭh mĭn njêng nkô̆ nău, mbơh tơih n'hanh tăch ndơ ta ntŭk rêh jêng. Wa H'Giang Niê, Kruanh rmôt nŭih pah kan lŏ mir n'gor Dak Lak mĭn lah, geh âk nuĭh ƀon lan jêng ăp nuĭh geh nău khlay ta mạng xã hội n'hanh n'hao săk rnglăy nău kan bah câu lạc bộ, kơt lah trong rgop an nău hun hao bah tuch tăm mât rong nkual ƀon lan đŏng:"Mpôl hên mpŏng ŭch lah ăp rmôt KOLs, KOC tơm tăch mra kơt nti tay âk ntŭk tăch têh ta lam dak lah nsum n'hanh đê̆ đŏng lah lam ntŭr neh, njêng du rêng gay ma nkoch n'hơ ăp ndơ geh ƀư bah n'gorDak Lak n'hanh ăp n'gor êng ƀa ƀă lam dak lah nsum. Tă bah rmôt kan aơ, mpôl hên ŭch ntĭm nti jêng du rmôt ƀon lan kan lŏ mir ngăch prăl, blău ƀư mhe n'hanh nsing nơm hăn ntŭk tăch rgâl mrô".

Tâm rnôk aơ đŏng, ta Buôn Ma Thuột, Dak Lak, ƀư rgum mpla nsơ Rse bok brai Cao nguyên. Ngih jong, nău kan mon uk, ndơ cheh tanh ndrel đah rup gui dăch dêh tâm nău rêh bah nuĭh ƀon lan Tây Nguyên dơi ăp họa sĩ dŭt n'hâm rŭp đah ăp nău uĕh blău, âk nău rŏng.

 Họa sĩ Trương Văn Linh, Kruanh khoa Mỹ thuật, Ngih săm ƀŭt Cao đẳng Văn hóa Nghệ thuật Dak Lak ndjôt tât mpla n’hơ 3 ntil ndơ. Tâm nê, ndoh ndơ “Nklâm ndơ bah neh chăng bazan n'hanh tơm cà phê, yơn mô dơi mpơl đah ăp rup ndah nău rêh way bên. Họa sĩ Trương Văn Linh nkoch:"Cà phê bah Dak Lak lĕ dơi hao tât lam ntŭr neh, ri gâp sŏk nkô̆ nău lah 'Ndơ bah neh chăng' đah trong ƀư nchih rup nkoch nau. Rnôk bu dâk uănh rup, tĭng nău nkah gĭt bah tĭng nuĭh ri geh nău gĭt êng êng".

Ăp ntil rup mpa n’hơ lĕ mpơl nău rŏng bah nuĭh blău ƀư njêng đah nkual neh n'hanh văn hóa Tây Nguyên. Mpla n’hơ Bok brai Cao nguyên ƀư ta Bảo tàng Thế giới Cà phê, Buôn Ma Thuột, Dak Lak, pơk mpông ân ăp nuĭh ƀon lan tât uănh tât lôch lơ 30/10/2026./.