Nău kan druh ndăm kơl kan khay rlu nti năm 2026 ta Dak Lak wăch rgum rlău 130.000 tơ̆ đoàn viên, druh ndăm râng, đah nklăp 4.000 nău kan đăp mpăn rêh jêng kon nuĭh. Ăp mpôl kan khay rlu nti ƀư 144 nău kan, nău ƀư đah rnoh prăk bơi 2 rmen prăk.

Nău kan mât chăm kon se dơi mbơh ƀư đah 318 jrô nti re dak an dơm n'hanh nklăp 5.000 nklâm học bổng an ăp kon se jêr jŏt. Lĕ rngôch 102 xã, phường tâm n'gor lĕ mbơh ƀư rmôt Bình dân học vụ mrô, ntop kơl n'hao nău dơi mrô, rgâl mhe hành chính n'hanh trok prăk mô dŏng prăk măt an rlău 145.000 tơ̆ druh ndăm, nuĭh ƀon lan.

Lôch nău kan khay rlu nti, nău kan ntop kơl nuĭh ƀon lan ta ntŭk mbrô hôm nha geh ntrôl dăng tâm nău kan 44 nar măng "Mom ndăm Dak Lak hăn lor rgâl mbrô". Ăp mpôl kan lĕ kơl ƀư rlău 64.700 hồ sơ rhŏ dŏng nău kan trực tuyến, ntĭm đă rlău 27.200 rnăk tăch rgâl, tăch rgâl dŏng trok prăk QR mô lah công cụ tăch rgâl mbrô.

Tĭng nô Y Lê Pas Tơr, Groi Bí thư Rnâng kan Tỉnh đoàn, Kruanh Hội Liên hiệp Druh ndăm Việt Nam n'gor Dak Lak, ăp rmôt kan dôl uănh khlay ntĭm nti gay jêh rnôk dơi ntop kơl, nuĭh ƀon lan dơi ƀư êng nău kan ta ntŭk mbrô.  "Ndrĭ jêh ăp rơh rgŏ jă khay rlu nti ri mpôl hên hŏ an ăp băl tĭng ƀư tay ăp nău kan, bah kơi "khay rlu nti mrô" rgâl jêng rơh rgŏ jă 44 nar măng ri ăp băl tĭng ƀư tay ăp nău kan bah he. Mpôl hên hôm rđău đă bah kơi ăp rơh rgŏ jă têh dja ri mô di lah nău kan bah he hŏ lôch jêh ma nău kan ntop kơl ta ntŭk, ta đơn vị, lơn lah geh tât rgâl mrô lah du nău kan way ƀư n'hanh ân nkre đah ăp nău kan, ăp nău rđău đă bah gưl ủy n'hanh n'gâng kan ta ntŭk đŏng".