Kêng măng nar pơh, yuh H’Theo n’hanh kon bu ur H'Giang ndrel hăn tiăr nti chưng play. H’Theo -35 năm deh, lah nuĭh tâm rlong chưng play dŭt âk năm deh, hôm yuh H'Giang, 16 năm deh- dŭt jê̆ tâm rmôt chưng play bu ur Đắk Đoa, Gia Lai.

Yuh H’Theo krêp dêh đah rmôt chưng play hŏ 7 năm, ntơm bah kon druh H’Giang mhe nti jrô 4. Ăp tơ̆ tĭng mê̆ hăn chưng play, dâk bah meng ntroh tâm ăp rơh tâm rlong ta xã, nkuâl hôm ăp rơh hăn tâm rlong chưng ngai jay hŏ ƀư H'Giang rŏng chưng play mô gĭt bah ntơm. Ntơm bah tĭng me hăn tâm rlong, oh ntơm tiăr nti n’hanh aƀaơ ndrel mê̆ rgop tâm rmôt nchrăp lăp tâm ntŭk way blău chưng play. Đah wa H’Theo, nău rhơn nê hôm âk lơn yor hŏ trêng nti tay an kon bu ur nău nsing nơm gay sơch nău he ŭch rŏng:

“Ntơm nơh, bu lah bu ur jâng jê̆ ti rbăn. Yơn aƀaơ hŏ tâm ban hôm, bu ur bu klô tâm ban dơm đŏng. Bu klô gĭt chưng play ri bu ur gĭt chưng play đŏng. Jêr jŏt ri dŭt âk, yor he lah me, lah nuĭh kan tơm tâm rnăk wâl đŏng. Yơn tă bah nău ŭch rŏng, he mbra tĭng, he âk năm deh hôm, jêng mô hôm geh chưng âk đŏng ôh. He têk ndrêng kon gay kon tĭng nău wơl geh chưng play way mbro”.

Lah yuh H’Theo ân dăp rgum nău kan tâm jay, nău kan mir ba gay krêp dêh đah chưng play, ri Rơ Chăm H’Vưn – nuĭh tâm rlong chưng play nuĭh Jarai (ta Pleiku Roh, phường Diên Hồng) hôm joi trong bonh leng rnăk wâl dơi an he chưng play đŏng. Ăp nar bôk năp, bu druh deh năm 2009 way chưng play ndrel ăp băl bu klô tâm ƀon yor đêt geh băl bu ur ndrel nău ŭch kơt he.

Aƀaơ, rnôk rmôt chuat tât du njăr trong mhe, tât đah nău chưng play way mbro, lah rnôk H’Vưn dôl ta năm n’glĕ dŭt trung học phổ thông n’hanh geh nău ntroh n’gôr bah rnăk wâl đŏng:

“Gâp aƀaơ hŏ jĭr nar: ôi hăn nti, kêng măng hăn chưng play, măng ngo gâp mbra kơi nti tay gay nchrăp an rơh thi tốt nghiệp. Gâp mbra dăp rgum tay mông nar gay hăn chưng play. Gâp tĭng trong chưng play ri bôk năp lah mpăng an đŏng. Yơn hŏ dêh rŏng ri mô dơi geh nuĭh mpăng. Bôk năp gâp chưng ta ndrĭch neh dơm, mô geh prăk chưng ndrăch pih njêng êng. Lôch tâm rlong bôk năp ri me bơ̆ gâp n’grŏ tĭng đŏng”.

Nău nkoch bah yuh H’Theo n’hanh H’Vưn lah du gâl njăr trong hăn nsum bah rmôt chưng play bu ur Đak Đoa, n’gor Gia Lai đŏng. Ăp nuĭh tâm rlong chưng play  Bahnar, Jarai tât bah âk ntŭk, ta ăp rnoh năm deh n’hanh nău rêh êng êng: nuĭh hôm hăn nti, nuĭh ƀư lŏ mir, geh nuĭh hŏ geh kon geh sai n’hanh nuĭh kan tơm tâm rnăk wâl. Khân păng tâm mâp dêh rŏng nsum đah chưng play n’hanh môn thể thao me. Gay mât mbro rơh tiăr nti, khân păng ân dăp rgum nău kan ta jay, mir ba; âk nuĭh hôm kâp sai, me bơ̆ kơl mât, rgŏ jă. Nău rôih dăng rlău tĭng khay tâm rlong ƀư ăp rnăk wâl hŏ tă rvê, aƀaơ hŏ nsing nơm tâm gung trong ma khân păng sơch đŏng.

Ta rơh tâm rlong chưng play bu ur ăp rnoi mpôl đê̆ Việt Nam lor bôk năp năm 2026, rmôt Đak Đoa geh 10 nuĭh tâm rlong chưng play Bahnar n’hanh 4 nuĭh tâm rlong chưng play Jarai. Ăp bu druh lăp tât tâm rlong n’glĕ dŭt đah rmôt Lục Yên bah n’gor Lào Cai n’hanh dâk Á quân. Rmôt chưng play hŏ nsĭt tay nău n’hao êng săk an nơm n’hanh lĕ ma nuĭh ŭch rŏng ƀon tơm đŏng. Wa Nguyễn Hữu Tường, ta tổ dân phố 5, xã Đak Đoa, Gia Lai, nkoch:

“Ăp nuĭh chưng play bah rmôt Đăk Đoa dŭt nđơr. Bol ăp oh geh lŏ sre âk yơn ăp oh dăp rgum nău kan mir ba lŏ sre gay râng tâm rmôt chưng play đŏng. Gâp saơ ăp oh nđơr kơt nê̆, he dŭt rhơn, nkah uĕh. Ăp oh geh dơi tâm rlong ta gưl neh dak, he dŭt rhơn an ăp oh kon se”.

Nuĭh têl ndrêng rmôt chưng play 7 năm aơ lah nuĭh tiăr nti Nguyễn Anh Dũng, dơi ăp nuĭh tâm rlong chưng play ôp mƀrô lah “bơ̆ Dũng”. Bôk năm 2019, păng rgum ăp bu ur ŭch rŏng chưng play, rdâk njêng rmôt chưng play Link Coffee. Ntơm bah ăp rơh tâm rlong ta Tây Nguyên, miền Trung, rmôt dâk Á quân du rơh tâm rlong futsal ta Nkual ƀon têh Hồ Chí Minh năm 2022. Tât năm 2026, ăp bu druh Đak Đoa dâk bôk năp nkual Tây Nguyên, lôch nê dâk Á quân Tâm rlong chưng play bu ur ăp rnoi mpôl đê̆ Việt Nam.

Lôch âk năm nai ntĭm nuĭh kơt nti rvah rvăch mât rmôt chưng play, rmôt chưng play bu ur Đak Đoa dơi ndơ̆ jao ngăn an Câu lạc bộ chưng play Hoàng Anh Gia Lai. Ntơm bah aơ, ăp nuĭh tâm rlong chưng play dơi kơl ăp ndơ tiăr nti dŭt uĕh, geh prăk khay n’hanh prăk ntop kơl, gay tŏng geh nău ŭch rŏng. Nuĭh tiăr nti Nguyễn Anh Dũng mĭn lah, aơ lah jâng ntơm hăn tât nău wơl geh chưng play way blău ngăn bah rmôt.

“Oh nô geh nău dăn đă đah Câu lạc bộ Chưng play Hoàng Anh Gia Lai lah bah ôi hôm pah kan, rvê nău kan mir ba n’hanh rnăk wâl ta jay đŏng. Kêng măng ri rmôt tiăr nti ta ndrĭch chưng play Đăk Đoa dĭl. Aơ lah nău dơh uĕh an ăp băl rvê nău kan rnăk wâl n’hanh nău gân djăng. Rmôt chưng play dŭt tâm ban ŭch kơt nê. ăp băl dôl dŭt nđơr yor dơi dơn, mbra dơi tiăr nti, geh ndơ năp dŏng n’hanh geh ăp nău ntĭm nti mhe gay râng tâm rlong chưng play gưl neh dak năm 2027 tât aơ tay”.

Lôch rơh tiăr nti, ăp bu druh Đak Đoa hôm sĭt jay, nchrăp an du nar hăn nti, hăn kan kơt nău way ơm. Yơn ta rơh tiăr nti tay bah kơi, khân păng mbra luh ta ndrĭch chưng play đah nău ŭch tât geh mhe lah dơi dâk lăp tâm rmôt chưng play bu ur lam dak năm 2027.