Lễ hội nchrăp ƀư ntơm bah nar 15/12/2026 tât nar 4/4/2027, đah ăp nău ƀư khlay tâm khay 3 n'hanh bôk khay 4/2027, nsrôih wăch rgum 1,3 rkeh tơ̆ năch pâl nđaih, rlong uănh saơ. Nău mhe bah lễ hội rơh aơ lah nkre mpla nsơ cà phê đah hun hao n'gâng kan, ntơm bah nkual tăm tât nkret njêng n'hanh tăch. Ăp nău ƀư kơt Pơh lễ Cà phê kah Việt Nam, Ntŭk rgum rgâl blău njêng mhe n'gâng kan cà phê, Tâm rlong Nuĭh ƀon lan kan lŏ mir, Tâm nchră lam ntŭr neh "Buôn Ma Thuột - Ntŭk rgum Robusta bah lam ntŭr neh" n'hanh ntrŭt ngăch ntuh kơl nkret njêng jru dơi mpŏng rgop n'hao rnoh khlay cà phê.

Ntŭk ƀư lễ hội lĕ geh pơk hvi tĭng trong tâm nthoi ăp ntŭk tât tă bah Buôn Ma Thuột, Buôn Đôn, N’glău Lắk, N’glău Ea Kao tât Tuy Hòa, tâm rgop nău ơm yău, thể thao, ndơ ngêt sa ndrel pâl nđaih dak lêng. Bôk nău nchrăp luh đă ƀư bôk nău kan ƀư hăn nkre re "Tă bah bri têh tât dak lêng ueh", ndrel pơh cà phê mô sŏk prăk tâm nkuăl mpeh ba dâng gay ma n'hao nău tâm rgop pâl nđaih.

 Dôl uănh, Dak Lak nchrăp njêng ăp ndơ ƀư tay rhŏ dŏng an nuĭh ƀon lan n'hanh năch pâl nđaih jêh lễ hội, geh Nkual têh Cà phê Buôn Ma Thuột, bar ntŭk check-in ta Quảng trường 10 khay 3 n'hanh Quảng trường Phú Yên, ndrel bôk nău kan Jay nhih show ta Bảo tàng Dak Lak. Tâm nê, Jay nhih show dơi rƀŏng trong ƀư lĕ tâm năm.

Tĭng wa Trần Hồng Tiến, Giám đốc N'gâng kan Văn hóa, Thể thao n'hanh Pâl nđaih n'gor Dak Lak, lễ hội rơh aơ uănh khlay n'hao trong nkoch trêng, ndơ̆ rup gui cà phê Buôn Ma Thuột tât dăch lơn đah nuĭh ƀon lan lam ntŭr neh. Rlău ma ăp trong báo chí n'hanh ndơ dŏng mrô, N'gâng kan dăn đă tâm rgop đah Tổng Công ty Hàng không Việt Nam nkoch trêng lễ hội ta ăp trong mpăr tâm dak n'hanh dak bah dih. "Năm aơ ndơ̆ nkô̆ nău ta aơ, mpôl hên ŭch mpla nsơ, nkoch mbơh lễ hội n'hanh ndơ̆ lễ hội hao lam ntŭr neh. N’gâng kan dăn đă tâm rgop đah Ntŭk rgum Hunitech bah Tổng Công ty Hàng không Việt Nam gay mpla nsơ lễ hội ta ăp trong mpăr bah Vietnam Airlines".

Kruanh UBND n'gor Dak Lak Đỗ Hữu Huy an gĭt, hun hao pâl nđaih-ndơ dŏng lah trong rƀŏng jŏ jong, Lễ hội Cà phê Buôn Ma Thuột mô dơn rlu ta nău ƀư nkoch mbơh ma ân njêng suan ntrôl hun hao, n'hao rnoh khlay ndơ lŏ mir n'hanh ntŭk ntô pâl nđaih bah ntŭk. Mpeh ntŭk gŭ kan săk ntơ lư, wa Đỗ Hữu Huy tâm ban ŭch mât săk ntơ lư ngăn "Lễ hội Cà phê Buôn Ma Thuột", nkre đă nău nkoch mbơh ƀư ntoh lư nău dơi bah cà phê Robusta ta ntŭk."Lễ hội Cà phê Buôn Ma Thuột lah săk ntơ bah neh dak, hôm nău ntơ gay ƀư săk ntơ lư nkoch nsơ ri lah “Buôn Ma Thuột - Ntŭk tơm cà phê Robusta dâk bôk năp lam ntŭr neh. Mpôl hên lah rjăp Robusta bah mpôl hên lah dâk bôk năp hôm, hôm cà phê nsum lam ntŭr neh ri mpôl hên dâk tâl 2. N'hanh Buôn Ma Thuột geh 40% rnoh âk cà phê bah lam dak".