Ta nklang njônh Xuân Đài, âk bôk duk máy nthoi rlet dak lêng luh ăp nglău n'gâr dak lêng, njônh, ndjôt ndơ sa an tui têh. Nô Đỗ Xuân Thạnh, Tổ dân phố Phú Mỹ, phường Sông Cầu, lah ngoăy tâm âk nuĭh ƀĭt ndeh hăn ta aơ bah ơm. Nô Thạnh an gĭt gĭt, lôch trôk nar lơh kêng dŭt năm e, rnăk nô dơi manh 1 rmen prăk gay ntuh kơl nâp nâl tay n'glău n'gâr, mât rong 13.000 tui ôch ntil mhe. Rlău 7 khay mât rong, rơh tui hŏ tŏng jâk rnoh têh hvi tăch, năch dŏng lĕ dăn rvăt đŏng. Nô Thạnh rhơn:"Rĭng tui aƀaơ geh klâp ma 2 lạng/mlâm, tăch geh rlău 200.000 đồng/mlâm, tâm ban đah 800.000 – 900.000 prăk/kg. Lĕ rngôch nsĭt geh rơh aơ nklăp rlău 2 rmen prăk. Gâp nchrăp trok an ngân hàng du gâl, rnoh hôm ƀa ƀă ntuh kơl tay n'hanh mât rơ̆ tay du rnoh tui đah rơh aơ. Lah hun hao uĕh ri nklăp 2 năm tay mra sĭt jêng tay plơ̆ tay kơt bah năp rơh dak bŭk."

Hôm ta Tổ dân phố Phú Mỹ, phường Sông Cầu, nô Đỗ Ngọc Quang dôl tâm rnôk ndâk nsơm nău kan mât rong tui ka ta nkual dak lêng Xuân Đài. Rơh trôk nar lơh dŭt năm khuch khat ƀư rnăk wâl roh dơm rlău 2,5 rmen prăk, tâm rnôk hôm e rnon ngân hàng. Rnơm nău kơl, nô dơi trok rnon, n'hŭch prăk kon n'hanh manh tay 800 rkeh prăk gay ntuh kơl tay. Tâm 2 rơh mât tay jêh nĕ, du rơh dôl hun hao uĕh, rơh nĕ lĕ geh tât rnôk dơi sŏk tăch: "Gâp jŭr nglău rong du rơh tâm khay 4 nklăp 7.000 mlâm; rơh let năp tay tâm khay 5 n'hanh khay 8, lĕ rngôch nklăp 10.000 mblâm đŏng. Aƀaơ djăt tăch luh dơm rơh bôk năp jêh nĕ tay rơh bah kơi tay.”

 Trôk nar n'glĕ dŭt năm 2025 lơh khuch khat hô an nkual tơm mât tui ka hôm ta vịnh Xuân Đài, đah bơi 1.500 rnăk ta phường Sông Cầu n'hanh Xuân Đài geh dak băm, khuch khat, nklăp 100.000 mlâm ndrôk khĭt, lĕ rngôch rnoh khlay bơi 1.900 rmen prăk, tâm nê phường Sông Cầu geh nklăp 2/3. Wa Huỳnh Đình Quang, Groi Kruanh UBND phường Sông Cầu an gĭt, ntŭk kan lĕ pah kan đah ăp ntŭk kan an manh prăk gay ma kơl an kơl n'hŭch rnoh prăk kon, n'hŭch rnon, pă tay tơm prăk kơl an nŭh mât rong ƀư tay nău kan. Rnơm nĕ, ntŭk mât rong hŏ ndâk tay nklăp 80%. Tâm rơh tât, phường rƀŏng trong kônh wa rgâl trong mât rong, nsrôih kơt dŏng khoa học công nghệ gay njrăng n'gang nau khuch ji, n'hao nău dơi rdâng lơh trôk nar, rƀŏng tât rdâk hao n'hanh hun hao nâp nâl: "Nkuăl ntrŭt đă kônh wa rong di rnoh neh, rnoh âk n'hanh nkuăl n'har bri; nkre kơt tĭng nau kan khoa học công nghệ, ntrơn tă bah tui têh way ơm gay ntrŭp ndơ nong rong ƀư HDPE nâp nâl lơn, n'hŭch bah ir khuch khat rnôk mih phŭt sial tât. Rnôk 1 khay mih phŭt tât, kônh wa ndăn klêh tăch n'gluh, ntrŭp n'gâr dak. Đah ndrôk mât rong mô lap geh nuh srê, ân ngăch mbơh gay nău kan dơi kan ƀư kloh n'gâng kan ta ntŭk n'hanh n'gâng kan tuch tăm jŭr kơl an ƀon lan."

Mât rong tui ka lah nău kan wăng sa dŭt têh ta mpeh luh nar n'gor Dak Lak yơn way mâp geh nău khuch khat tâm ăp rơh phŭt sial dak bŭk, an nchrăp tơm ndơ dŏng kan, nau kan têh gay ma rklaih nau khuch, ndâk tay nau kan tuch tăm. Knŭng êng đah ăp nŭih rvăt dŏng ndơ prăk manh mât tui ka bah Agribank Ntŭk kan ta Phú Yên, rơh trôk nar lơh kêng dŭt năm e hŏ rnoh nchăm trok mbrơi tât 6.000 rmen prăk. Hăn ndrel đah nuĭh dŏng ndơ nkra rgâl tay jêr jŏt, ngân hàng lĕ nchâp đă trok rnon, n'hŭch prăk kon nkre lah pă tay tơm prăk manh. Êng nkual mât tui ka ta vịnh Xuân Đài, rlău 300 năch dơi n'hŭch prăk kon manh dêh, nkre dơi manh mhe tay 240 rmen prăk. Wa Phan Thông Thái, Giám đốc Agribank gŭ kan ta Phú Yên, an gĭt:"Mpôl hên ton mro mât tŏng rnoh prăk manh tâm ban kơt mông nar manh ntuh kơl gay ntop kơl ăp rnăk mât rong tui ka kơt nkret njêng manh ntuh kơl tuch tăm. Nău dŏng tơm prăk bah nuĭh ƀon lan ri mpôl hên uănh n’ôi na nê̆ đŏng, gay nuĭh nŭh ƀon lan ntuh kơl na nê̆, săk rnglăy ngăn. Đah nău aơ, nău kan mât rong tui ka mbra dâk hao tay lĕ rngôch plơ̆ tay kơt ơm bah năm aơ tât lĕ năm bah kơi tay."

 Yan tui bôk năp jêh trôk nar lơh dôl an saơ ăp nău mpŏng uĕh đah nuĭh mât tui ka ta njônh Xuân Đài. Ntơm bah nău dŏng uĕh tơm prăk nkra njêng tay tât nău rƀŏng bâh ta ntŭk n'hanh nău nsrôih bâh nŭh mât rong, lĕ rngôch lĕ geh na nê̆ đah ăp ndrơng tui nchrăp luh tăch, mô knŭng an saơ nău kan mât rong dôl ndâk  ma hôm pơk luh trong hăn jŏ jong an nău kan mât rong êng aơ./.