Rmôt ndơ̆ êng prăk bảo hiểm y tế geh:

 Nŭih tâm rnăk vâl râng bảo hiểm y tế tĭng ƀư rnăk wâl;

 Nuĭh gŭ rêh n'hanh pah kan, nuĭh geh mât rong, mât uănh tâm ăp ntŭk kan, ntŭk kan kơl an, chroh rƀŭn;

Nuĭh pah kan tâm rnôk rlu mô geh prăk khay mô lah rlu tâm ton pah kan;

Tâm nĕ, rnăk wâl râng bảo hiểm y tế lah ăp nuĭh ndrel dăn ƀư gŭ ƀa ƀơ mô lah ndrel dăn ƀư gŭ ta du ntŭk gŭ tâm di tĭng nău ntrŭnh bah pháp luật mpeh gŭ âm.

Rnoh rgop ndơ̆ bảo hiểm y tế rnăk wâl ân ăp nuĭh kơt ba kơi aơ: nuĭh tal bôk năp rgop đah 4.5% rnoh prăk khay ta bah dâng; nuĭh tal bar, tal pe, tal puăn rgop tĭng 70%, 60%, 50% rnoh rgop ndơ̆ bah nuĭh tal bôk năp; ntơm nuĭh tal prăm let ba kơi rgop đah 40% rnoh rgop bah nuĭh tal bôk năp.

Lơn lah rnăk êp ach o geh kơl an 100% rnoh prăk bảo hiểm y tế, tâm nê: tơm prăk Trung ương kơl an 70%, tơm prăk n'gor Dak Lak kơl an 30%; Rnăk ƀon lan ƀư lŏ mir, tăm bri, tui ka, kan tuch tăm mât rong geh nău rêh rĭng geh kơl an 60%, tâm nĕ: tơm prăk Trung ương kơl an 30%, tơm prăk n'gor Dak Lak kơl an 30%.

Nuĭh rnoi mpôl đê̆ dôl gŭ rêh ta ăp xă dơi nchrŏng năl mô hôm mpeh nkual geh nău rêh wăng sa - rêh jêng kon nuĭh jêr jŏt, dŭt jêr jŏt tĭng nău ntrŭnh bah Chính phủ dơi ntop kơl 85%, tâm nê: tơm prăk Trung ương ntop kơl 70%, tơm prăk n'gor Dak Lak ntop kơl 15% (nar khay ntop kơl lah 36 khay kơp ntơm bah rnôk xă ntŭk nuĭh dôl gŭ rêh mô hôm mpeh nkual geh nău rêh wăng sa - rêh jêng kon nuĭh jêr jŏt, dŭt jêr jŏt tĭng nău ntrŭnh bah Chính phủ).

Rmôt kan râng nău mât đăp mpăn, rnă njrăng ta bah dâng tĭng nău ntrŭnh bah Hội đồng nhân dân n'gor Dak Lak dơi kơl an 60% rnoh prăk bảo hiểm y tế tĭng nău ntrŭnh.

- Râng bảo hiểm y tế rnăk wâl, he mbra geh dŏng ăp nău dơi ba kơi aơ:

Dơi n'hŭch rnoh prăk rgop ndơ̆ an nuĭh rnăk wâl ndrel râng bảo hiểm y tế. Geh pă an thẻ bảo hiểm y tế bản điện tử.

Dơi trok prăk but uănh săm ji, săm ji tâm rnoh nău dơi n'hanh rnoh geh ntrŭnh ta thẻ bảo hiểm y tế.

Dơi săch n'hanh rgâl ntŭk dăn ƀư but uănh săm ji bôk năp tâm 15 nar bôk năp ăp rơh.

Geh ngih pah kan Bảo hiểm xã hội, ntŭk kan but uănh săm ji bảo hiểm y tế n'hanh ntŭk kan geh tât rblang, mbơh nău mpeh nău kơl bảo hiểm y tế.

Dơi mbơh tơih, phong nău tih pháp luật mpeh bảo hiểm y tế.

- Râng bảo hiểm y tế rnăk wâl gay mât njrăng săk soan an ăp nuĭh tâm rnăk wâl.