Tĭng nău mbơh bah Ntŭk uănh nđôi kop ji n'gor Dak Lak (CDC Dak Lak), kơp tât aƀaơ, lam n'gor kơp dơn 8.433 nuĭh ntưp duh rtoh trong mham, hao 25% rđĭl đah ndrel khay dja năm e nơh. Êng ăp nar dăch aơ, du nar kơp dơn rlău 100 nuĭh. Lĕ geh 2 hê nuĭh khĭt ta phường Tân An n'hanh xã Quảng Phú. Ăp ntŭk geh ntưp dŭt âk n'hanh âk nuĭh ji, geh phường Buôn Ma Thuột, Tân Lập, Tân An, Ea Kao n'hanh ăp xã Ea H'leo, Hòa Phú, Tân Tiến, Krông Pắk, Ea Tul, Cư M'gar. Phường Thành Nhất n'hanh ăp xã Ea Knuếch, Pơng Đrang, Ea Đrông, Ea Na, Ea Drăng mpeh rmôt ntưp âk.

Rnoh nuĭh ntưp hao ngăch tâm ăp nar dăch aơ dơi an lah geh tât mih jŏ jong, dơh an măch kăp n'hanh ntưp ji. Tâm rnôk nĕ, trong kan njrăng, n'gang srê ta du đêt ntŭk mô hŏ săk rnglăy, nuĭh ƀon lan hôm e thơ tha.

Nai dak si Hoàng Hải Phúc, Giám đốc CDC Dak Lak an gĭt, rnoh nuĭh ji hao âk ƀư Khoa Cấp cứu Nhi n'hanh Nhi mhe deh, Ngih dak si Đa khoa Nkual Tây Nguyên way rlău ir; âk ntŭk ngih dak si ngih dak n'hanh bah dih ngih dak ta mpeh bah lơ n'gor Dak Lak geh nău khuch khat tâm ban. CDC Dak Lak dôl ndăn ngăch mbơh ƀư ăp trong n'hŭch nuĭh ntưp mhe, uănh nđôi ntŭk srê, mô an srê ntưp rêng lam hvi.  "Ntŭk uănh nđôi kop ji n'gor Dak Lak tâm ôp tâm nchră tât N'gâng kan dak si, UBND n'gor Dak Lak an sam ƀŭt ntĭm rđău UBND ăp xă, phường an ntrôl dăng trong kan njrăng, n'gang srê nchrăp lor đah trong ƀư mbơh ƀư ăp rơh puh rao ntŭk ntô gŭ âm; đah nuĭh ƀon lan an mât njrăng êng săk nơm lah tơm. Êng đah nău kan dak si, mpôl hên đă cán bộ jŭr tât ăp nkual srê uănh nđôi, uănh năl rnoh véc-tơ, rnoh măch gay ntrŭt nsôr ndơ dŏng, măy mŏk, dŏng puh dak si đah ndeh ô tô gay nkhĭt măch, ndrŭng, tăp măch".

Tĭng Ntŭk uănh nđôi kop ji, bah bôk năm tât aƀaơ, lam n'gor Gia Lai năl geh rlău 7.600 nuĭh ntưp duh rtoh luh mham rih n'hanh 1 hê nuĭh khĭt. Rđĭl đah ndrel khay dja năm 2025, rnoh nuĭh ntưp hao 5.059 nuĭh. Lam n'gor năl geh 393 ntŭk srê, hao 28 ntŭk srê rđĭl đah ndrel khay dja năm 2025. N'gâng kan dak si njrăng đă njrăng n'gang duh rtoh luh mham rih lah nău kan an ƀư ƀa ƀơ, na nao, lơn lah tâm khay mih, rnôk dơh an măch ntưp ji deh tăp n'hanh hun hao.

 Nău tâm rgop rjăp đah n'gâng kan dak si, n'gâng kan ta ntŭk n'hanh nuĭh ƀon lan, lơn lah nău mkra rjăp ăp ntŭk ntô dak ta rnăk wâl mbra rgop mât kân véc tơ ntưp ji, n'hŭch rnoh nuĭh ntưp n'hanh geh ma nău nuh srê ntưp rêng, rlău ma nĕ mât njrăng săk soan nsum mpôl.