Ntơm bah năm 2022 tât aƀaơ, lam dak kơp dơn rlau 90.000 nuĭh geh so, meo kăp, kuach, tâm nê 365 nuĭh khĭt. Rnoh prăk chuh n'gang ndrel săm nuĭh geh so, meo kăp hao tât bơi tât 1.000 rmen prăk. Êng ta n’gor Dak Lak, rơh aơ geh tât rhiăng nuĭh geh so, meo kăp, tâm nê geh 7 nuĭh khĭt.

Ta rơh rƀŭn nchră, ăp nuĭh ndơn măt tât râng uănh lah, hôm âk jêr jŏt tâm mât njrăng so, meo, chuh vaccine n'hanh uănh nđôi, mât săm nuĭh geh ntưp ndrăng. Âk nău rgop an lah trong kan njrăng, n'gang ji ndrăng so meo kăp ê hŏ geh uănh njrăng tâm di, nău kan mât uănh ndơ rong ta rnăk vâl mô hŏ jăp.

Lvang năm 2026-2030,  nuĭh ndơn măt tât râng tâm ban ŭch an n'hao nkoch trêng, n'hao nău gĭt êng nuĭh ƀon lan, lơn lah mkra di rnôk geh so, meo kăp, kăp n'hanh tât ngih dak si gay dơi mbơh ntĭm, chuh vaccine ngăch. Nău kan njrăng, n'gang ji ndrăng geh so meo kăp an dơi mbơh ƀư ƀa ƀơ, na nao, đah nău tâm rgop rjăp đah n'gâng kan dak si, mât săm ndơ rong, n'gâng kan ƀon lan n'hanh nsum mpôl ntŭk rêh jêng, rƀŏng tât nău ŭch mô hôm geh nuĭh khĭt yor ji ndrăng bâh so meo kăp tâm năm 2030. Wa Võ Hải Sơn, Groi Kruanh ntŭk kan njrăng  n'gang nău ji (N'gâng kan dak si), njrăng đă.  "Mpôl hên njrăng đă nsum mpôl lah, lah ăp nuĭh mô lap geh so, meo kăp ri an tât dâl ngih dak si gay dơi but uănh, chuh huyết thanh njrăng n'gang ji. Đah ăp rnăk wâl geh mpa rong, an chuh njrăng n'gang an mpôl so, meo bah he. Đah ăp ntŭk, an n'hao dăng groi nđôi rnoh âk chuh njrăng n'gang vaccine an mpôl so, eo; nkre way đăp mpăn nău tŏng geh bah vaccine, huyết thanh gay rnôk nuĭh ƀon lan ŭch ri nchrăp chuh njrăng n'gang, njrăng n'gang ji ndrăng an nuĭh ƀon lan."

Dak Lak kŏ hŏ ƀư rơh tâm mâp măt ndrel rlong ƀư nau kan ăp ntŭk njrăng, rdâng nau ji ndrăng bâh so meo kăp gưl neh dak năm 2026. Bôk nau kan geh nau râng bah rlau 1.000 nuĭh tât râng, đah ăp nau kan tâm mâp mbơh tơih, hăn nkoch trêng ndrel rlong ƀư ngăn mpeh nau mêt uănh, chuh vắc-xin ân so, meo ndrel đah mât njrăng săm ntŭk ntưp srê.

Nău dŭt njrăng lah ji ndrăng bâh so meo kăp kơt mô dơi săm bah rnôk lĕ geh ji, yơn lĕ rngôch dơi njrăng n'gang lah nuĭh geh ntưp dơi rao săm lor ntŭk sôt di trong n'hanh chuh vaccine, huyết thanh ngăch. Yơn lah, nău mât uănh so, meo n'hanh chuh njrăng n'gang ta n'gor Dak Lak hôm nha geh âk nău goah. Tât khay 7 năm aơ, rnoh chuh vaccine njrăng ji ndrăng bâh so meo kăp bâh n'gor mhe geh 28.3%, đê̆ lơn đah rnoh ŭch geh gay ma njrăng n'gang nsum mpôl ta ntŭk rêh jêng. Tâm rnôk nĕ, kaman ji ndrăng bâh so meo kăp hôm nha geh ta âk ntŭk n'hanh âk ntŭk geh nuh srê ta mpa rong geh saơ tay.

Njrăng, n'gang ji ndrăng bah so meo kăp yor kơt nĕ, ân ntơm bah ăp nău dŭt na nê̆: ăp rnăk mât uănh uĕh so, meo  n'hanh chuh vaccine tŏng ăp; mô m'ơk lêng nso meo; rnôk geh so, meo kăp, kăp an rao săm ntŭk sôt di trong n'hanh tât dâl ngih dak si gay dơi mbơh ntĭm, chuh n'gang. Rnôk ăp nuĭh ƀon lan lor nchrăp du njuat, n'gâng kan ta ntŭk lor nchrăp du njuat n'hanh ăp n'gâng kan tâm rgop rjăp lơn, nău rƀŏng mô hôm geh nuĭh khĭt yor ji ndrăng bah so meo kăp tâm năm 2030 mơ dơi geh hăn tât dăch lơn đah nău kan ngăn.