Nău nteh chĭng n'gŭr răm jêh mông nti, oh Siu Nhi, kon hŏk jrô 8A, Nhih nti Phổ thông nội trú 2 gưl Tiểu học n'hanh THCS Ia Púch, ndrel ăp băl nchrăp samƀŭt nchih, tâm ôp tâm ngơi jêh mông nti ôi. Ăp băl jay gŭ dăch nhih nti plơ̆ sĭt jay sa măng; hôm Siu Nhi n'hanh ăp băl gŭ ngai sŏk ăp nklâm piăng dơi me bơ̆ nchrăp bah ôi, ndrel dŏng sa lôch nê rlu tay ta jrô nti gay nti tay kêng măng. Aơ lah trong nchrăp ndăn kơl mât nău nti bar mông ăp nar, tâm rnôk kâp ngih jay gŭ, jay sông sa n'hanh nkual nội trú ƀư lôch jêh. Đah Siu Nhi, nhih nti mhe nsĭt tay âk nău uĕh n'hanh ntop tay nuih n'hâm gay oh nsrôih:  "Nău way, kon knŭng saơ ntŭk ntô kơt aơ ta tivi mô lah ta ăp ngih sam ƀŭt êng dơm. Aƀaơ kon dơi nti tâm ngih samƀŭt têh, hvi n'hanh uĕh kơt aơ, kon saơ dŭt rhơn. Kon mbra nsrôih uĕh, nti blău."

Ăp mbor tơm si mhe tăm tâm jâng gung Ngih sam ƀŭt Ia Púch lĕ ntơm luh ăp n'ging uĕh bôk năp. Nkual n'har bri ăp năm bah năp mô geh nuĭh, aƀaơ nteh nău răk sam ƀŭt. Bah meng ăp jrô nti, ăp mpôl phung pah kan ntrŭp nglăp mpêr n'gar, sơn ăp ntŭk jâng gung n'glĕ dŭt, ƀư lôch jêh ntŭk nkret njêng ndơ ngêt sa, ntŭk rwăt kho ao, ih kho ao ta jâng gung ngih sam ƀŭt nội trú. Wa Phan Thành Tiến- Hiệu trưởng Ngih sam ƀŭt Phổ thông nội trú 2 gưl Tiểu học n'hanh THCS Ia Púch an gĭt, nău kan hôm ƀa ƀă mô âk yơn nkre đah ăp mông sa, mông bĭch n'hanh gŭ âm ăp nar bah kon hŏk jêng an dơi uănh nđôi, uănh năl na nê̆ lor rnôk dŏng.

Ngih săm ƀŭt geh rnoh neh rlău 5ha, đah 23 jrô nti n'hanh ăp ndơ dŏng, tŏng đah nău ŭch nti, nội trú n'hanh bán trú bah rlău 700 kon hŏk. Rlău ma nuĭh kan tĭng rnoh ntrŭnh, n'gor Gia Lai an ăp ngih samƀŭt ntop tay nuĭh mât njrăng, nuĭh rhŏ răk rao n'hanh nuĭh kan mât uănh kon hŏk bah dih mông; nkre tâm pă prăk ntrŭp camera ta ăp ntŭk ŭch geh tâm nkual. Wa Phan Thành Tiến an gĭt, ngih sam ƀŭt lĕ uănh nđôi, tâm pă rmôt nai, nuĭh kơl ndơ sông sa, mât njrăng n'hanh rmôt mât uănh kon hŏk bah dih mông nti. Nău rƀŏng lah rnôk ngih sam ƀŭt n'hanh nkual nội trú tŏng nău dơi ƀư, ăp trong mât chăm, mât rong n'hanh mât uănh kon hŏk nchrăp da dê đŏng: "Lăp năm nti mhe, nău mĭn n'hanh nuih n'hâm bah kon hŏk n'hanh me bơ̆ dŭt rhơn, răm yor geh ngih sam ƀŭt têh uĕh. Ngih sam ƀŭt ndâk njêng trong nchrăp tâm di đah trong ƀư ngih sam ƀŭt nội trú n'hanh bán trú n'hanh nu nău kon hŏk ta ntŭk. Lơn lah mpeh tiăr nti nău gĭt blău nti".

Ntŭk n'har bri, ngih sam ƀŭt nội trú dơn geh nău mât uănh bah tahen n'har bri ta ntŭk đŏng. Đại tá Đoàn Ngọc Báu, Groi Chính ủy Bộ Chỉ huy Quân sự n'gor Gia Lai, an gĭt: ngih sam ƀŭt nội trú n'har bri mô knŭng têh uĕh mpeh ndơ dŏng ma hôm lah ntĭt leo lor mpeh nău rêh-rnă njrăng gay ăp oh hun hao lĕ rngôch. Yor kơt nê̆, ntŭk kan mbra ntop kơl ngih sam ƀŭt ndâk ƀư trong rƀŏng, nău way, tâm di đah tĭng năm deh. "Aơ lah nău kan dŭt khlay ngăn. Mpôl hên rđău đă ăp pôih tahen n’har tâm rnglăp đah ăp nhih nti 2 gưl nội trú 2 gưl ta nhar bri; ƀư nkoch trêng tât ăp kon se nti, nai ntĭm mpeh nău way. Ăp rmôt pah kan tâm rgop đah ăp mpôl kan ta ntŭk ndrel nai ntĭm mât nău way nội trú tâm nar n'hanh kỷ luật ngih sam ƀŭt, đăp mpăn ăp mon hăn lăp nti geh nău way ntơm bah ăp nar bôk năp."

Ntơm bah ăp pơh nti bôk năp, du njăr trong hăn mhe dôl pơk luh đah nai n'hanh kon se nti Ngih sam ƀŭt Ia Púch. Tâm nkual n'har bri, nău nteh kon se nti ntoh ăp nar, ntop tay nău nsing nơm n'hanh bun dăp ăp nău ŭch rŏng mpeh du nău rêh let năp tay têh hvi bah ngih sam ƀŭt aơ./.