Xă Vụ Bổn, n’gor Dak Lak geh 8 ngih samƀŭt đah ăp gưl nti bah mầm non tât THCS. Tĭng trong ƀư dăp, xă knŭng hôm tay 3 ngih samƀŭt, geh 2 ngih samƀŭt 2 gưl tiểu học-THCS n’hanh du ngih samƀŭt mầm non. Wa Nguyễn Huy Hoàng, Kruanh UBND xă Vụ Bổn an gĭt, trong ƀư dơi ndâk ƀư tĭng nkô̆ nău kơp uănh ngăn tĭng ngih samƀŭt, sŏk nău rgop Đảng ủy, kruanh ăp ngih samƀŭt n’hanh kơp nău geh ngăn bah ta ntŭk. “Tâm rnôk ndâk ƀư trong ƀư, mpôl hên lĕ dăn nău rgop Đảng ủy, nsum mpôl kruanh ăp ngih samƀŭt, tĭng nău mĭn êng sŏk kon nuĭh nti ƀư ta n’gul. Đah du đêt ntŭk nkual jru ngai nkual jêr jŏt mpôl hên hôm e đăp mpăn di nău ntrŭnh bah Đảng, Ngih dak n’hanh tâm di nău geh ngăn”.

Ndrel đah nău jêh trong ƀư, ăp ngih samƀŭt ntrôl dăng nkoch trêng, gĭt nu nău ŭch bah cán bộ, nai n’hanh me bơ̆. Ăp nău geh tât ƀư ngih jrô nti, rmôt n’hanh ndơ nti ren dơi tâm rgâl, rblang gay geh nău tâm ban ŭch ta năp rnôk mbơh ƀư. Wa Võ Thị Cẩm Hoa, Hiệu trưởng ngih samƀŭt Mẫu giáo Hoa Ban Trắng, xă Dliê Ya, n’gor Dak Lak an gĭt: “Mpôl hên nkoch trêng tât lĕ rngôch cán bộ, nai, nuĭh kan: đăp mpăn nău mĭn, nchrăp nuih n’hâm gay ƀư tĭng nău ntrŭnh, trong hăn nglăp nsum bah ngih dak. Tal 2, nkoch trêng tâm ăp rmôt Zalo đah me bơ̆ gay me bơ̆ du gâl đăp mpăn; bôl geh nglăp nsum ri oh kon he nti ta ăp ntŭk dăch ngăn, dơh ngăn”.

Hôm ta Ngih Tiểu học Nguyễn Trãi, xă Vụ Bổn, ăp nău rvê bôk nău mpeh ntrong ƀư ngih samƀŭt dơi ngih samƀŭt tâm nchră, rblang. Tă bah gĭt nu nău, âk cán bộ, nai n’hanh me bơ̆ tâm ban ŭch đah trong ƀư. Wa Trần Hải Đường, Hiệu trưởng ngih samƀŭt nkoch:  “Aơ lah nău ntrŭnh dŭt di gay n’hŭchntŭk ntĭm nti n’hanh n’hao rnoh nai. Yor aƀaơ, rnoh nai ntŭk rmeh ntŭk mô tŏng. Mpeh nău mĭn, nuih n’hâm, tă bah gĭt nu nău ri rmôt cán bộ, nai n’hanh me bơ̆ tâm ban ŭch da dê. Tĭng gưl gay ndâk njêng ngih samƀŭt tâm di lam dak, kơt ndơ̆ tâm ban ƀon lan gĭt blău nar lơ hao”.

Lam n’gor Dak Lak aƀaơ geh 1.267 ntŭk ntĭm nti ngih dak. Jêh âk rơh kơp uănh, trong ƀư mhe ngăn nchrăp n’hŭch 646 ntŭk, tâm ban rlău 50% rnoh ntŭk. Ta nar pah kan đah ăp n’gâng kân, nău kan, wa Lương Nguyễn Minh Triết, Ủy viên Trung ương Đảng, Bí thư N’gor ủy Dak Lak đă nău dăp an tĭng nău ntrŭnh bah Trung ương, dơh đêt ntŭk mât uănh hăn ndrel dăp tay rmôt kan tĭng trong n’hŭch biến chế mât uănh ntĭm nti, n’hao biên chế na nê̆ ntĭm nti:  “Nai cô ƀư mât uănh ntĭm nti ri dơi jŭr na nê̆ hăn ntĭm, mô lah sĭt xă phường n’hao tay an cán bộ mât uănh ntĭm nti ta xă phường. Mât đăp mpăn âk kon hŏk ta ăp ntŭk ngih samƀŭt, phân hiệu, dăp ƀĭt joet săk rnglăy rmôt nai gay n’hao dơi mât uănh, săk rnglăy ntuh kơl n’hanh n’hao uĕh ntĭm n’hanh nti. Mô dơi khuch tât nău nti, dơi gĭt tât ntĭm nti bah kon hŏk”.

Dăp trong ƀư ngih samƀŭt ta Dak Lak dôl dơi ƀư tĭng trong dơh đêt ntŭk, dŏng săk rnglăy ngih jrô n’hanh rmôt kan, yơn mât đăp mpăn nti nsơm. Nău nchrăp lor bah n’gâng kan ƀon lan, nău kan ntĭm nti ndrel ăp ngih samƀŭt, dôl geh nău tâm ban ŭch  bah cán bộ, nai n’hanh mê̆ bơ̆, ndâk njêng n’gâng tơm gay rnôk ƀư tay ngih samƀŭt ƀư đăp mpăn, mô khuch tât kon hŏk, ngăn lah ta nkual jru ngai n’hanh nkual n’har bri.