Tĭng dăp rgum lvang 2026-2030, uănh tât năm 20250, Dak Lak nchrŏng trong jêng 3 nkual wăng sa geh Nkual wăng sa Nam Phú Yên, nkual wăng sa nkhah êng mpeh bah lơ n’hanh Nkual wăng sa mpông n’har bri Đắk Ruê. Nkre, n’gor dăp rgum 31 nkual công nghiệp đah dĭng lĕ rnoh neh rlău 8.900 ha. Yơn lah, aƀaơ mhe geh 7 nkual công nghiệp n’hanh 21 rkum công nghiệp dơi dăp rgum na nê̆, ntuh kơl ndâk ƀư; tâm nĕ knŭng du đêt geh rnoh tŏng ăp 100%.

Tĭng wa Đỗ Bá Phú, Cục trưởng Ntŭk ntrŭt ngăch tăch rgâl (N’gâng kan Công thương), gay n’hao săk rnglăy ntuh n’hanh n’hao soan ueh bah ăp nkual, rkum công nghiệp, Dak Lak an hun hao ntung trong tĭng tâm ban, tâm rgop rjăp đah trong logistics ăp nkual n’hanh ăp ntŭk ŭnh nar kloh ueh. Nău aơ mô knŭng kơl n’hŭch prăk ntuh kơl ma hôm n’hao săk rnglăy pơk dŏng jŏ jong.  “Ăp nkual công nghiệp aơ an geh dăp rgum trong logistics ăp nkual, boăt nthoi geh Đông-Tây, đah Tây Nguyên đah trong ndrâm dak lêng. Gay ntêm nkrem ŭnh nar, ri ăp nkual, rkum công nghiệp dơi dăp rgum mhe an dơi rgum, nta nơih an hun hao ăp nău nchrăp ƀư ŭnh nar ueh kloh tâm nkual, rkum công nghiệp. Hôm lah mô dơi ndâk ƀư, boăt nthoi rgum ri ndơ ntuh kơl mbra âk lơn, hoach prăk ngih dak n’hanh jêr an nău kan điện lực”.

N’hêl na nê̆ an saơ, ntŭk kol têh ngăn aƀaơ bah Dak Lak mô knŭng ta ntung trong nkual công nghiệp ma hôm ta nău dơi boăt nthoi logisticss đah ndrâm dak lêng, tach ndeh par n’hanh ăp trong nchoăn rdêng êng. Rnôk prăk logistics hôm âk, nar rdêng jŏ jong, nău dơh mpeh nkual tăm jêr rgâl an dơh tâm rlong bah nău kan nkret njêng jru.

Đại tá Nguyễn Thành Sơn, Kruanh Hội đồng quản trị Công ty Cổ phần Cảng Cát Lái (TP. Hồ Chí Minh) an lah, logistics lah “Me tơm” bah jâng wăng sa. Tâm rnôk nĕ, Dak Lak aƀaơ dơi ƀư săk rnglăy. Yor nê, n’gor an ơm ndâk ƀư ăp ntŭk logistics mhe gay n’hŭch n’hanh n’hao dơi rdêng ndoh ndơ.  “Nti ăp nău blău lor lam ntŭr neh, he an djôt ndơ tât ndrâm dak ri nău rdêng mbra ngăch lơn. Tâm logistics, ndrâm dak lah ntŭk rdêng 2 trong, nkre lah ntŭk mât prăp, tâl dŭng, rdêng ndơ̆ ndơ, nkre lah ntŭk ntrôl rnoh khlay hao. Ndrâm dak kơh lah ntŭk soih luh ndoh ndơ tăch n’gluh. Gâp saơ ta n’gor Dak Lak, ntŭk tâm di ngăn lah nkual xă Ea Ô, aơ lah ntŭk tă bah n’gor Khánh Hòa nklăp 60km, dŭt tâm di đah nău kan logistics”.

Jêh nglăp nsum, Dak Lak geh rnoh neh rlău 18.000km2, dâk tal 3 lam dak, rgum geh n’ăp nkual tăm lŏ mir têh ta mpeh bah lơ n’hanh ndrâm dak lêng, nkual công nghiệp, wăng sa dak lêng ta mpeh bah dâng nhâp nar. Nău tâm rgop aơ pơk luh dơi jêng trong khlay lĕ rngôch bah nkra njêng, nkret njêng tât tăch n’gluh. Yơn lah, gay rgâl nău geh jêng n’hâm soan hao jêng, nău mĭn ntung trong công nghiệp n’hanh logistics an dơi mkra tâm ban.

Tĭng wa Đào Mỹ, Groi Kruanh UBND n’gor Dak Lak, n’gor dôl rgum nkra rgâl samƀŭt hành chính, jêh nău dăp rgum nkual, rkum công nghiệp, ntuh kơl hun hao ntung trong dak lêng n’hanh logistics gay rgâl mhe an công nghiệp nkret njêng jru n’hanh n’hao khlay tăch n’gluh. “N’gâng kan Công thương, Ban Mât uănh Nkual wăng sa Phú Yên n’hanh ăp ngih pah kan geh tât rgum lĕ rngôch râng tâm nchră, rgop nău bah rgum nchră gay mbơh an UBND n’gor geh trong ntĭm rđău na nê̆. Râng ntil ndơ ƀư ăp nău nchrăp ƀư khlay, ntung trong nkual, rkum công nghiệp nkret njêng jru n’hanh logistics lvang 2026-2030 gay nchrăp pơk ăp nău ƀư wăch rgum ntuh kơl. Dăn đă ăp nău kơl êng mpeh neh ntu, dơi an man prăk, ntrŭt đă pah kan, ntop kơl rgâl mrô, pah kan mbơh gưl geh dơi mkra kơt Trung ương uănh mĭn tay, an trong ƀư tâm di an doanh nghiệp”.

Nău dơh mpeh têh âk, nkual tăm n’hanh mpông luh dak lêng knŭng ngăn  ngên mât ueh dơi boăt nthoi đah trong logistics mhe n’hanh ntung trong công nghiệp tâm ban. Đah nău nchrŏng jêh dăp rgum, hun hao ăp ntŭk logistics, ntrôl dăng nkret njêng jru n’hanh wăch rgum ăp nuĭh ntuh kơl têh, Dak Lak dôl ntơm ƀư tĭng nău rƀŏng jêng ntŭk hao jêng mhe mpeh công nghiệp nkret njêng n’hanh logisticss bah nkual Tây Nguyên-duyên hải Nam Trung Bộ.