- Lễ hội Sầu riêng Dak Lak năm 2026 geh 17 nău kan tơm. Ntoh lư kơt: lễ ntơm pơk ta Quảng trường 10/3; Rgum nchră ndru wăr sầu riêng jŏ jong; lễ hội ndơ sa rƀŏng tât kơp dơn rnoh têh mô hŏ tă geh ta Việt Nam đah 102 ndơ sa nkret njêng bah sầu riêng; nkual pla n’hơ way n’gâng kan sầu riêng n’hanh ndơ geh ƀư OCOP; ăp tour rlong saơ mir sầu riêng nkre đah pâl nđaih văn hóa – bri dak; ndrel âk nău kan njroh mprơ, pla n’hơ n’hanh ntrŭt ntrôl ngăch tăch rgâl…

- Na nê̆, nkual pla n’hơ way n’gâng kan sầu riêng n’hanh ndơ geh ƀư OCOP geh 310 ndrơng ndơ. Mpeh pâl nđaih, ăp doanh nghiệp ƀư 8 bôk nău kan rlong uănh saơ. Nău n’grĭng hăn trong 500 bôk ndeh bán tải nkơnh n’hơ sầu riêng đah njăr trong hăn bah Krông Păk tât Buôn Ma Thuột. Bôk nău kan njroh mprơ têh n’hanh ntŭk nkoch mbơh nkơnh n’hơ 102 ntil ndơ sa nkret njêng bah sầu riêng. Tâm rlong nchuăt Tuy Hòa 2026 “Wơt măt nar luh ta dak lêng” hŏ wăch rgum nklăp 2.600 nuĭh tâm rlong đăng ký…

- Lễ hội Ndơ sa Sầu riêng Dak Lak dơi ƀư ta jâng gung Eco Palace, phường Buôn Ma Thuột. Ta aơ hôm nkoch mbơh ndơ tuch tăm, ndơ kah khlay ta ntŭk, ndơ geh ƀư pâl nđaih, văn hóa Tây Nguyên, ƀon hăr blău ti kan way ơm n’hanh ăp ndơ ngêt, ndơ sa nkret njêng bah sầu riêng. Bah meng ƀư ndơ ngêt sa, lễ hội geh ăp bôk nău kan nchreng an uănh chĭng gong, ndơ uh goh Tây Nguyên, ndăch rvăch, pâl rlưn way ơm, vẽ rup ký họa trong nkual ƀon têh n’hanh ăp măng njroh mprơ... Năch pâl nđaih rlong ngêt dơm dak nkret njêng bah sầu riêng, tâm nê geh cà phê sầu riêng n’hanh trà sữa sầu riêng.

- Wa Lê Hoàng Cơ, Giám đốc Dam San Tourist, Kruanh Mpôl tơm ƀư Lễ hội ndơ ngêt sa Sầu riêng, an gĭt, ăp nuĭh tơm nkret njêng bah 20 rmôt tâm rlong bah lam dak mbra râng nkret njêng n’hanh nchreng an uănh “102 ntil ndơ sa nkret njêng bah Sầu riêng Dak Lak”. Nău kan dja kơp dơn dŭt têh mô hŏ tă geh ta Việt Nam.

“Sầu riêng lah du ntil ndơ tuch tăm rmen đôlar jêng he ân n’hao têh păng, rlău ma sa play ri he ân nkret njêng păng. Rnôk kơp dơn dŭt têh mô hŏ tă geh 102 ntil ndơ sa ƀư bah sầu riêng nê ri ndơ an tay n’glĕ dŭt lah he pơk dơi ăp ntŭk tăch ndơ sa, rêng jay tăch ndơ ngêt sa bah play sầu riêng ta ăp ntŭk, mô dơn nê tâm lam dak n’hanh dak bah dih đŏng.”

Du nău kan nchrăp dơi Guinness lam ntŭr neh kơp dơn lah n’hoch ndeh bán tải rdeng sầu riêng bah Krông Pắc hao nklang Ngã 6 n’hanh du đêt trong nkual ƀon têh bah Buôn Ma Thuột. N’hoch ndeh bán tải rdeng sầu riêng ntroh hăn ta Lễ hội sầu riêng Dak Lak 2026 geh 500 bôk ndeh, ăp bôk ndeh rdeng 200 kg sầu riêng. Ndeh n’hoch hăn bah Quảng trường Tân An, xã Krông Pắc, tĭng trong Quốc lộ 26, lôch nê lăp tĭng trong Quốc lộ 27 n’hanh tât Đại lộ Võ Nguyên Giáp. Ndeh n’hoch hăn rlău tay ăp nkual nklang Ngã 6 n’hanh du đêt trong nkual ƀon têh ta Buôn Ma Thuột.

- Wa Trần Vũ Thùy Linh, Groi Kruanh Mpôl tơm leo ndeh n’grĭng hăn trong, an gĭt tât aƀaơ, Mpôl tơm ƀư hŏ dơn geh đăng ký rlău 600 nuĭh tơm ndeh, rlău rnoh ŭch 100 bôk ndeh. Mpôl kan kơp dơn Guinness hŏ đă nuĭh ntơh măt tât Dak Lak gay kan nsum, ƀư ăp siƀŭt kơp dơn nău têh mô hŏ tă geh đŏng.

“Mpeh mpôl kan kơp dơn Guinness đă ƀư dŭt khăch khoch, ntơm bah rnoh âk sầu riêng ta ndeh ân lah play ngăn 100% tât nuĭh râng ân geh ăp tŏng săk jăn, năm deh n’hanh nchih săk nuĭh ƀĭt ndeh. Aƀaơ Hiệp hội Sầu riêng n’gor Dak Lak hŏ tĭng ƀư ăp tŏng ăp ntil siƀŭt dja. Rlău ma nê, Hiệp hội hŏ jă du hê nuĭh rnâng kan mpeh Guinness tât Dak Lak na nê̆ gay uănh năl. Lôch nău ƀư nklăp 30 mnĭt, khân păng mbra ra uănh tay du tơ̆ đŏng. Lah mô geh wăk kol, nău têh mbra dơi kơp dơn dĭl.”

Tĭng rnâng kan ƀư nau kan, Lễ hội sầu riêng Dak Lak năm 2026 mô knŭng nkoch mbơh nau săk ntơ bah sầu riêng ma hôm rƀŏng tât nau ndâk ntrong ƀư nau kan bah ăp ntŭk ntil ndơ, ntrŭt dăng nau tâm rgop tăm-tăch, rgum nau kan ntuh kơl tâm nau ê nkra jru, logistics ndrel hun hao nau kan pâl n’aih. Dak Lak dôl ăp nhoat leo Lễ hội Sầu riêng jêng nau kan neh dak, rƀŏng tât lam ntur neh.

-Wa Trần Hồng Tiến, Giám đốc Sở văn hoá, Thể thao ndrel pâl n’aih n’gor Dak Lak mbơh, ăp ntrong ƀư nau kan tâm mir sầu riêng geh ndâk njêng mô êng lah kơl an lễ hội ma hôm mra mĭn rvê gay ma njêng jêng ăp ntil nau kan pâl n’aih ƀa ƀơ, rgop nau leo sầu riêng jêng ntŭk tât pâl n’aih ăp năm bah Dak Lak:

‘Ăp trong ƀư nau kan pâl n’aih aơ mô di knŭng ƀư tâm rnôk lễ hội ma jêh aơ mra geh mĭn, nchră mbơh ƀư jêng ăp ntrong ƀư nau kan ƀa ƀơ ƀư ăp năm. Mra dơi lah geh ăp năm mô ƀư lễ hội, yơn lah ân ăp nŭih tât ma Dak Lak mra dơi geh tât uănh, pâl ndrel ăp yan tăm, geh uănh, geh kơt nau kan bu mât chăm, tăm, ê nkra, klih play, tala tâm dŭng. Jêh rnôk lễ hội ri phung hên ŭch lah ăp yan play sầu riêng lah ăp nŭih mra nkah tât ndrel mra hăn pâl n’aih tâm Dak Lak”.

-Mpeh nau săk tam ngăn bah Lễ hội Sầu riêng Dak Lak năm 2026 đah nŭih ƀon lan, ngăn lah nau geh dơi pơk luh ntŭk tăch rgâl, rgum nau ntuh kơl, leo tăch rgâl ndrel ăp nkô̆ nau gay geh uănh năl dơi bah ăp rnôk yan lễ hội tă lôch jêh, wa Đặng Thị Thuỷ, Groi Giám đốc n’gâng kan tuch tăm ndrel ntŭk ntu n’gor Dak Lak mbơh:

“N’gâng kan hŏ geh ăp nau rƀŏng trong kan n’hâl gay ma kơl mbơh nchră nau ân UBND n’gor mpeh ăp nau kan ăp ntil bah ăp ntŭk kan tâm nau mât ngân hàng sầu riêng. Phung hên dôl geh nau kơl mbơh nchră nau gay Uỷ ban n’gor ntrŭnh pă ƀư nau nchrăp ntrơn rgâl rmô, tâm nê geh nau kan tâm 30 măng nar. Tal bar lah ƀư ân dơi ntrong ƀư nau kan jêh rnôk geh mêt uănh, rnôk aơ ri đah nau kan pă mrô nkuăl tăm ndrel ntŭk tâl dŭng ri phung hên hŏ geh ntrŭt dăng, mhâm ƀư gay am der nau tât bah nau kan mrô nkuăl tăm”.

-N’gor Dak Lak rnôk aơ geh bơi tât 45 rbăn ha sầu riêng, geh tât rlau 1/5 rnoh neh sầu riêng tâm lam dak. Năm 2025, rnoh geh sầu riêng bah n’gor geh 390 rbăn tấn, rnoh geh tăch luh dak ba dih nklăp 1,1 rmen đôla, leo sầu riêng jêng ngoai tâm ăp ndơ tuch tăm tơm khlay bah n’gor. Mpeh ba kơi ăp rnoh mrô nê lah nau rêh jêng bah âk rbăn rnăk ƀon lan, lah nau ntrơn rgâl bah âk ƀon lan ndrel nau ƀư tơm gay ma mât, ƀư ueh ăp nau khlay bah nau ơm yau ueh.

-Lễ hội Sầu riêng Dak Lak 2026 mô knŭng ryơk ntil play sa aơ, ma hôm lah rjăp nau mpŏng ŭch ngăn bah nau ndâk njêng săk ntơ lư bah ndơ tuch tăm geh ndrel ma nau dơi bah nau ơm Tây Nguyên, hun hao pâl n’aih ndrel n’hao rnoh khlay hao âk bah ntil ndơ tăm geh prăk rmen. Rnôk ăp nau nteh chĭng tâm nklang rnôk ƀư yan sầu riêng dŭm, nê lah rnôk Dak Lak nkoch đah băl bên tâm dak ndrel dak ba dih nau nkoch tât du nkuăl neh njêng nau geh dơi bah nau kan tuch tăm jêng nau nsôih gay ma hun hao văng sa, rêh jêng.