Phường Hoài Nhơn Bắc lah ntŭk ntoh lư bâh n’gor Gia Lai tâm ntrong rdâk njêng nău kan lĕ ƀon lan mât đăp mpăn rnă njrăng Ngih dak đah âk nău kan geh săk rnglăy kơt lah “mbơh tơih rgŏ jă ueh- rjaih nău geh nău dơi, bah nău tâm rkeh”, “Ntŭk kan bu ur njrăng rdâng nău mplư rlăm ta mạng”. 6 khay bôk năm 2026, nuĭh ƀon lan ta ntŭk lĕ geh pă 42 rnoh mbơh geh nău khlăy, kơl an mpôl kan têh njrăng, rdâng đah nuĭh tih n’hanh njrăng rdâng âk nău tât bâh ta ntŭk kan ba dâng. Wa Trần Hưũ Thảo, Bí thư Đảng uỷ, Kruanh UBND phường Hoài Nhơn Bắc, n’gor Gia Lai an gĭt, mât đăp mpăn rnă njrăng ta ntŭk lah nău dơn kan bâh lĕ ntrong kan chính trị, bâh ăp nuĭh ƀon lan.  “Rnă njrăng đăp mpăn geh nău ueh lăng rĭ n’gâng kan wăng sa mơ dơi geh hun hao, nău rêh bâh ăp rnăk vâl mơ geh hơm răm đăp mpăn. Yor nĕ, mât đăp mpăn rnă njrăng mô di lah êng bâh mpôl kan công an ma lah nău dơn kan n’hanh nău dơi ueh ngăn bâh ăp nuĭh ƀon lan bâh he”.

Ta nar tâm mâp, Đại tướng Trịnh Văn Quyết rnê ăp nău dơi geh ma Đảng bộ, n’gâng kan n’hanh ƀon lan phường Hoài Nhơn Bắc, n’gor Gia Lai lĕ dơi geh ta ntrong kan rdâk njêng nău kan lĕ ƀon lan mât đăp mpăn rnă njrăng Ngih dak. Đại tướng lah na nê̆, mât đăp mpăn rnă njrăng Ngih dak lah nău kan bâh lĕ ƀon lan đah nău leo kan bâh Đảng, tâm nĕ mpôl kan công an nhân dân geh nău kan tơm khlăy ngăn. Ŭch geh mât đăp mpăn rnă njrăng bâh ơm, bâh ngai an geh mât bâh tu tơm, ma tu tơm nĕ lah tâm nuih n’hâm ƀon lan. Nău kan lĕ ƀon lan mât rnă njrăng neh dak ŭch hun hao ngăn ngên an geh ndrel đah mât chăm nău rêh jêng, mât đăp mpăn ăp nuĭh ƀon lan ĕ geh dơn nău geh bâh ntrong hun hao.

Kruanh Rnâng kan Tuyên giáo trung ương đă n’gor Gia Lai an geh mât uănh tay n’hanh mbơh tơih geh săk rnglăy ăp nghị quyết bâh trung ương mpeh rdâk njêng nău rêh răp jăp, đăp mpăn ueh mhe n’hanh ntrong kan rnă njrăng ngih dak, rgâl mhe nău kan mbơh tơih, n’hao nău dơi njrăng rdâng ta năp nău mô ueh ta ntŭk kan mạng, n’hao nău dơi tâm rgop kan đah công an, tahen, MTTQ n’hanh ăp ntŭk kan, rdâk njêng mpôl kan công an ngăn dăch đah ƀon lan, ryơk ƀon lan, gĭt vât đah ƀon lan, yor ƀon lan ma kơl kan.

Đại tướng Trịnh Văn Quyết lĕ đă n’gor Gia Lai mĭn uănh săch phường Hoài Nhơn Bắc ƀư ntŭk rlong nău kan “phường xã hội chủ nghiã”: “Gâp đă n’gor Gia Lai mĭn uănh săch phường Hoài Nhơn Bắc lah ngoăy tâm âk ntŭk rlong ƀư nău kan phường xã hội chủ nghiã bâh nău kan răp jăp, đăp mpăn, ueh mhe, tâm di, hun hao tĭng nău mĭn Nghị quyết mbrô 18. Mpôl he an geh mbơh ƀư ăp njoat kan na nê̆, ƀư ueh nâp n’hanh geh ntil ndơ kan na nê̆ gay ma pơk hvi ăp ntrong kan ueh.