Rnôk geh mbơh mpeh ndrôm săm ƀŭt nchih bâh ur sai y sĩ Đào Ngọc Thạnh n’hanh  nuĭh tăch dak si Mai Thị Kim Ngân ta phường Cẩm Thành, n’gor Quảng Ngãi, rnăk vâl wa Trần Thị Sô ta xã Tịnh Khê, nkuăl ƀon têh Quảng Ngãi lĕ hăn joi tât ta ntŭk gay ma tâm rđil. Ta rnoh mbrô kơp 46 tâm ndrôm săm ƀŭt, nău ntơ Trần Thị Lê ntoh luh, dŭt tâm di đah săm ƀŭt mbơh khĭt ma rnăk vâl wa Sô dôl mât rbăy. Nău mbơh bâh ăp n’ha nđaih lĕ êr lĕ mpoh n’hao nău knơm têh lôch âk năm kâp joi nuĭh bên ta rnăk vâl. Wa Trần Thị Sô, oh du ndul deh tahen khĭt tâm lơh kăl e Trần Thị Lê  nkoch.  “Gâp dŭt rhơn rnôk geh tăng mbơh kônh geh mbơh ta mạng xã hội. Joi gĭt na nê̆ nău ntơ săk Trần Thị Lê rĭ dŭt rhơn ngăn. Gâp kâp knơm oh nô dôl mbơh nău kan, joi saơ nting yuh sĭt gay ma mât tâp ta môch tâp tahen khĭt tâm lơh kăl e ta xã”

Năm aơ lĕ 96 năm deh, yơn y sĩ Đào Ngọc Thạnh hôm nha ngăch ngăr ngăn, bâh geh gĭt na nê̆ Bệnh xã B23 n’hanh ntŭk tâp âk tahen năm kăl e. Wa an gĭt, ndrôm săm ƀŭt nchih tŏng ăp ntŭk gŭ, ƀon tơm, ntŭk kan, nar khĭt n’hanh rnoh mbrô săm ji bâh 181 tahen khĭt tâm lơh kăl e. Nar khĭt geh nchih tâm ndrôm săm bŭt lah tâm di đah ăp nar ăp tahen khĭt nglâ̆ dŭt ta ngih dak si, yor nĕ mbra dơi geh tih đah săm ƀŭt mbơh khĭt bâh ntŭk kan. Nkah tay nău bâh tahen khĭt Trần Thị Lê, wa Đào Ngọc Thạnh kah gĭt tay. “Trần Thị Lê, lah mô geh nău rgâl bâh nkuăl Trà Bồng rĭ geh tâp ta  Cà Đam. Aơ lah di ngăn, gâp nơm ƀư, mbơh đah rnăk vâl kơt nĕ”.

Ăp nău nchih ndrel đah nău kahgĭt bâh wa Thạnh dôl jêng nău mbơh khlăy tu tơm dŭt khlăy ngăn, kơl sŏng dăng an nău kan 500 nar măng bâh n’gor Quảng Ngãi. Ƀư sŏng dăng tât rnăk vâl n’hanh geh gĭt đah ndrôm săm ƀŭt, Đại tá Trịnh Công Sơn, Groi Chính uỷ n’gâng kan leo kan tahen n’gor Quảng Ngãi rhơn nkoch  rnôk geh saơ ăp nău nchih hôm nha kơt ơm nău khlăy.  “Bâh nău kan ăp nău mbơh kơt aơ, rnâng kan ntĭm leo bâh n’gor Quảng Ngãi mbra geh uănh nđôi tay, tâm rđil đah ăp nău mbơh geh mbơh pă n’hanh tâm rđil ta bản đồ nkual neh. Ngăn lah ăp ntŭk geh knơm ta nău nglôch lôch ta ntŭk n’hanh lịch sử bâh n’gor Quảng Ngãi ta rơh tâm lơh tâm su gay ma uănh năl, an geh uănh nđôi tay ntŭk êng”.

Ndrôm săm ƀŭt nchih ti bâh y sĩ Bệnh xá B23 năm kăl e mô dơn lah ntil ndơ tâm lơh tâm su, ma dôl jêng chông ŭnh leo trong hăn joi nuĭh tahen kan ndrel. Ăp nău mbơh khlăy nĕ mbra geh ăp mpôl kan têh uănh nđôi, uănh năl, ntop ƀư ueh ang ăp nău an geh saơ, gay ma ơm ndơ̆ ăp nô tahen khĭt tâm lơh kăl e plơ̆ sĭt đah rnăk vâl n’hanh ƀon tơm.