Ta Dak Lak, ta năp yan mih dak lip năm aơ, 50 rnăk ta ăp nkual rđŭng mper dak me Kỳ Lộ ta ăp xă Tuy An Bắc n’hanh Đồng Xuân lĕ dơi ntop kơl ndâk ƀư 50 rnăk jay n’ông dêr dak lip. Du jay geh rnoh neh 20m2, bah dâng ntăm 16 phi ka su an n’ông; 2 ding geh n’gâng bê tông rƀŏng trong. Rnôk dak hao, jay mbra n’ông tĭng rnoh dak, kơl nuĭh ƀon lan geh ntŭk gŭ ndê đăp mpăn.

Ta năp nĕ, jêh rơh dak lip têh khay 11 năm e, rlău 600 jay geh ndrơng prêh lĕ dơi ƀư bah nău kan Quang Trung, kơl rlău 600 rnăk geh ntŭk gŭ đăp mpăn n’hanh dêr dak lip đăp mpăn.

Rlău ma nĕ, bah tơm prăk n’hanh ăp prăk êng, n’gor Dak Lak dôl rgŏ jă nuĭh, ndoh ndơ rgum ndâk ƀư 100 mlâm jay dêr mih dak lip nsum mpôl ta lĕ rngôch ăp nkual rđŭng. Du jay dêr dak lip nsum mpôl geh rnoh neh nklăp 220m2, jay cấp 3 nâp nâl, geh ndơ njrăng nglăi, jay ăch chrach êng n’hanh jay ŭnh, gŭ âk nklăp 200 nuĭh. Aƀaơ, ăp jay aơ dôl tâm lvang hao dăp 2 n’hanh jêh. Nchrăp tâm khay 9/2026, mbra ndơ̆ an dŏng. Kơt nĕ, yan mih năm aơ, nău dêr mih bah nuĭh ƀon lan ta ăp nkual rđŭng n’gor Dak Lak mbra nchrăp ueh lơn. Wa Đào Mỹ, Groi Kruanh Ủy ban nhân dân n’gor Dak Lak, mbơh: “Mpôl hên đă ăn Mpôl mât uănh, ăp ntŭk kan ndâk ƀư râng ƀư du trong ngăch ngăn, ơm ngăn dơi geh. Yơn mô an yor ơm ma he thơ tha nău ueh nâp. Aƀaơ, mpôl hên dôl đă mpôl ntĭm rđău njrăng n’gang ƀon lan ta gưl bah dâng gay tâm di đah nău he rdâng đah nu nău ta ntŭk”.