Du ôi ta gôl dak Nhơn Châu (Cù Lao Xanh), ăp bôk duk lơh joi ka hôm sĭt tât ndrâm kơt ăp nar đŏng. Dơn êng, ta ntung ndrâm ka âk tay máy rhôp, lơp ŭnh, nghệ sĩ n’hanh rhiăng năch dơm. Ăp nuĭh ơm way bên đah nău rêh rngân uĕh bah ƀon seng jal jêng "diễn viên" tâm nău nkoch nău rêh ngăn ăp nar bah he. Ăp nghệ sĩ tĭng nuĭh ƀon lan hăn dak lêng lơh joi ka, nhâp uănh san hô, hăn nklang trong blon bah gôl dak, nkoch bri đah nuĭh ƀon lan lơh joi ka ta ntŭk. Măng jŭr, du sân khấu âm nhạc rdâk bah meng gôl dak wăch hang rbăn nuĭh ƀon lan n’hanh năch pâl nđaih.

Mô dơn lah du măng ƀư an djăt uănh uĕh mƀak, Nhơn Châu lor bôk năp dơi hang rkeh nuĭh djăt uănh lam dak gĭt tât ma ăp rup gui ngăn ngăn mpeh kon nuĭh n’hanh nău rêh ta gôl dak ngai ngât. Wa Hồ Thị Đoan Trang, nuĭh ƀon lan thôn Tây, xã Nhơn Châu, an gĭt kônh wa dŭt rhơn nđơr rnôk ƀon tơm he ntoh ta mbrô pơk ƀoh rup ngăn ngăn n’hanh geh rnôk tâm nđŭr đah ăp nghệ sĩ:

“Gâp dŭt rhơn mƀak yor jŏ ngăn hôm gôl dak mơ geh măng ƀư njroh mprơ têh n’hanh wăch rgum âk năch tât đah gôl dak Cù Lao Xanh bah gâp. Gâp mpŏng lah gôl dak mbra geh âk măng ƀư njroh mprơ lơn đŏng gay hun hao pâl nđaih”.

Wa Nguyễn Tiến Dũng, Bí thư Đảng ủy xã Nhơn Châu an gĭt, ring lam bah măng njroh mprơ ngăn ngăn kơl rup gui gôl dak dơi rêng lam hvi ta ăp ntŭk pơk nkoch trêng nău lư, wăch rgum âk tay năch tât ta ntŭk:

"Tâm măng njroh mprơ “Say Hi rực rỡ” mhe aơ ta mbrô pơk ƀoh nău lư mpôl, âk nuĭh ƀon lan n’hanh năch gĭt tât Nhơn Châu dŭt âk. Gâp mpŏng lah Nhơn Châu đah nău geh ƀư bah măng njroh mprơ mbra wăch rgum dŭt âk mpưm năch gay nkơnh n’hơ rup gui, kon nuĭh, nău rêh ta ntŭk n’hanh rup uĕh bri dak ta aơ gay hun hao tâm let năp tay."

Ndrel đah ăp măng rhôp rup ngăn ngăn, Gia Lai dôl nkoch ăp nău nkoch bah he ma điện ảnh. Rgâl ma rdâk phim tâm trường quay jĭr êng, âk mpôl ƀư phim sơch ăp ntŭk bri dak rup uĕh măt uănh nkre đah trong leo ƀư Tây Sơn gay mpơl tay du rơh dăng janh kăl e. Ntŭk gŭ rgum tahen nghĩa quân, ndrĭch tiăr nti tahen, ndrĭch tiăp seh mô lah ndrung nkông krŭng dơi rdâk tay têh hvi mô dơn gay rhŏ dŏng ăp tơ̆ rhôp rup.

Lôch gâl phim ƀư lôch jêh, lĕ rngôch ntŭk dja mbra dơi mât ndray tay kơt du phim trường pơk hvi, ntŭk năch mbra dơi lăp tâm rơh lịch sử, rlong saơ văn hóa n’hanh gĭt wât tay mpeh nkual neh dơi uănh lah tơm me bah võ thuật Tây Sơn. Đạo diễn Võ Đức dôl an ƀư du trong nchrăp điện ảnh ta xã Tây Sơn nkoch:

“Mpôl hên ŭch tât đah nuĭh djăt uănh ma săk ntơr mhe nsing ta ăp nar ƀư geh ngăn gay nuĭh tơm nkoch dăch dêh n’hanh nău rêh ngăn ăp nar, dăch dêh lơn đah ăp nuĭh. Rup gui rơh dja dơi rdâk rhŏ dŏng an năch pâl nđaih, tâm ban kơt du drăp ndơ ơm yău rgum jê̆ ma mpôl ƀư phim an ƀon tơm he".

Lah điện ảnh mât ndray nău nkah kăl e ri âm nhạc hôm pơk mpông leo băl mom tât đah Gia Lai. Mega Concert "Gia Lai - Đại ngàn chŏnh dak lêng ư̆r" tâm lễ ntơm pơk Năm Pâl nđaih Gưl neh dak 2026 ƀư ta nkual ƀon têh dak lêng Quy Nhơn hŏ rgum âk nghệ sĩ ntoh lư, wăch rgum nklăp 70.000 nuĭh djăt uănh bah âk n’gor, nkual ƀon têh. Mô đêt tơ̆ lor bôk năp hăn tât Gia Lai yor du măng njroh mprơ, yơn lôch nê rong tay nar uănh joi dak lêng, bri n’hanh văn hóa ƀon tơm ta ntŭk. Băl mom Lê Thanh Phương Hạ, an gĭt:

“Gâp bah Nha Trang tât. Lor bôk năp nkual miền Trung he geh du concert têh kơt aơ, jêng gâp ân hăn dơm”.

Ăp nău dơi nkoch ma trong ƀoh rup, điện ảnh n’hanh âm nhạc dôl nsĭt tay nău tam kloh an hun hao pâl nđaih n’gor Gia Lai. Êng khay 7/2026, n’gor wơt nklăp 1,8 rkeh tơ̆ năch, hao 40% rđĭl đah ndrel khay dja năm bah năp nơh. Rgum 7 khay geh tât rlău 10,55 rkeh tơ̆ năch. Tâm nê, năch dak bah dih nklăp 77%. Nsĭt geh pâl nđaih bơi 23.000 rmen prăk, hao 22%.

Bah kơi ăp rnoh nê lah nău rgâl trong ƀư pâl nđaih: ntơm bah nkơnh n’hơ ntŭk tât jêng luh rlong uănh saơ; ntơm bah nkoch mbơh rup uĕh jêng nkoch ăp nău ƀư năch ŭch he hăn joi êng. Wa Hà Văn Siêu, Groi Cục trưởng Cục Pâl nđaih gưl neh dak Việt Nam an lah, n’gor Gia Lai ân ntik hvi tay trong ƀư mhe dja:

“Gia Lai ân mhâm ƀư kân dơi jâng năch jŏ lơn ma ăp trong rlong joi saơ jru lơn, djăt ăp nău nkoch uĕh lơn n’hanh mha êng lơn mpeh du ntŭk tât. Gia Lai ân mât dŏng ndơ công nghệ gay mât prăp jêng tơm nău lư ngăn pâl nđaih. He dŏng công nghệ nkoch ăp nău nkoch uĕh mpeh Gia Lai mbra lah trong rƀŏng, nău ŭch n’hanh nău dơn kan ndơ̆ luh an n’gâng kan pâl nđaih Gia Lai lah êng n’hanh Việt Nam lah nsum tâm let năp tay."

Gia Lai dôl sơch trong chuat lăp tâm công nghiệp rlong saơ mô di gay ƀư du tơ̆ bah, ma gay ăp măng ƀoh rup, ăp bôk phim, ăp măng njroh mprơ jêng du nău jă uănh saơ nkual neh. N’hanh rnôk nuĭh ƀon lan ta ntŭk jêng du gâl bah ăp nău nkoch nê, pâl nđaih mô dơn dơi nkoch mbơh nkơnh n’hơ, ma hôm dơi bôr dăp ma săk tơm n’hanh nău nkah bah nsum mpôl.