Lôch 7 khay an ƀư, n’gor Dak Lak hŏ ƀư lôch jêh 4 tâm lĕ rngôch rnoh 10 nău ŭch tât n’hanh 14/32 nău dơn kan bah năm 2026; ăp rnoh tât kan, nău dơn kan hôm ƀa ƀă dôl dơi tĭng ƀư di rnoh ngăch. N’gâng kan ta ntŭk hŏ n’gluh an dŏng âk trong tâm n’guăk kan, trong kơl khlay, ntoh lư lah Nghị quyết 03 mpeh ntop kơl mât njrăng n’hanh ntik n’hao rnoh khlay drăp ndơ ơm yău ntlơi an tay văn hóa chĭng gong lvang năm 2026-2030; an ƀư rdâk njêng ntŭk mât prăp nău lư drăp ndơ ơm yău ntlơi an tay, njêng hồ sơ khoa học đah du đêt drăp ndơ ơm yău ntlơi an tay, ntŭk têl ơm yău kăl e; nkre nchrăp ăp nar kan văn hóa, pâl nđaih têh kơt Lễ hội Sầu riêng Dak Lak năm 2026 n’hanh Lễ hội Cà phê Buôn Ma Thuột tâl 10 năm 2027.

Tâm nchră ta rơh hop, ăp đại biểu dăn đă an lor ntuh kơl nkra têh uĕh tay ntŭk têl ơm yău, rdâk njêng ndơ văn hóa – pâl nđaih ntĭt êng, ntrôl dŏng âk keh mbrô drăp ndơ ơm yău ntlơi an tay, mât ndray nău ngơi, chữ nchih bah ƀon lan Bu Nong, Jarai n’hanh n’hao âk tơm ndơ an trong kan văn hóa gay mât dŏng geh nău tam ăp rnoh khlay săk tơm rhŏ dŏng hun hao pâl nđaih.

N’glôch jêh rơh hop, wa Huỳnh Thị Chiến Hòa, Groi Bí thư Tỉnh uỷ, Groi Kruanh Ban rnâng kan Ban rđău đă mpeh hun hao văn hóa n’gor Dak Lak lah rjăp, nău dơi bôk năp mhe njêng jâng nsing, nău khlay lah ân ƀư ăp trong nchrăp jêng ăp ndơ geh ƀư văn hóa geh rnoh khlay, jêng ăp n’gâng kan công nghiệp n’hanh rhŏ dŏng văn hóa tŏng suan dăng rgop tâm nău hun hao bah n’gor.

Wa Huỳnh Thị Chiến Hòa đă ăp n’gâng kan, ăp ntŭk tâm dâng rgum ƀư lôch jêh rnoh tât kan hôm ƀa ƀă, lơn lah nău kan keh mbrô drăp ndơ ơm yău ntlơi an tay, rdâk njêng săk ntơ lư ndơ geh ƀư văn hóa n’hanh văn hóa mbrô nkre đah dơh geh êng bah Dak Lak.

“Rgum tĭng ƀư lôch jêh ăp rnoh tât kan hôm ƀa ƀă n’hanh rnoh tât kan geh tât nău keh mbrô ăp drăp ndơ ơm yău ntlơi an tay gưl neh dak n’hanh ntŭk têl ơm yău gưl neh dak mha êng. 10 nău kan hôm ƀa ƀă bah năm 2026 way ôp uănh ntrŭt ntrôl năn ngăch droh rklaih jêr jŏt, wăk kol, lơn lah đah ăp wăk kol ntoh luh bah tâm dâng. Rdâk njêng săk ntơ lư ăp ndơ geh ƀư công nghiệp, rhŏ dŏng văn hóa lah nsum n’hanh văn hóa mbrô lah êng, lăp uĕh, tâm di đah nău mha êng, nô nău n’hanh tơm ndơ bah n’gor.”