Ta buôn Hai, nău nkoch mât ndrăy văn hóa rnoi mpôl đêt dơi geh bah ăp rnăk wâl. Ntoh lư kơt rnăk wa Y-Yak Byă, săk way kuăl lah Aê Khuê. Aƀaơ rnăk wa hôm e mât du bôr chĭng n’hanh rlău 10 mlâm yăng ăp ntil. Ăp năm, rnăk wâl ƀư ăp nău kuăl brah kơt ƀư brah ndrâm dak, rhơn âk năm n’hanh râng ăp nău ƀư chĭng gông bah ƀon. Aê Khuê an gĭt:  “Aƀaơ mpôl hên mât n’hanh ntĭm ăp nău khlay văn hóa way ơm kơt tŭr chĭng n’hanh ăp ƀư brah an kon sau tâm rnăk wâl. Rnăk wâl gâp leo lor tâm nău aơ. Ăp nău ƀư brah bah nuĭh Êđê dŭt âk, ƀư brah ta jay mô lah ta mir, ƀư brah bri, brah dak... Ăp nău way ơm ueh lăng dơi mât n’hanh ƀư ƀa ƀơ”.

Yor nău wât bah ăp rnăk wâl ta buôn Hai ma văn hóa way ơm bah rnoi mpôl Êđê dơi nthoi tay. Tâm âk ƀon mâp jêr jŏt tâm nău mât ăp nău ƀư văn hóa way ơm ri ta buôn Hai, ăp nău ƀư brah ndrâm dak, ƀư rhơn âk năm, nău ƀư chĭng gông hôm dơi ƀư ƀa ƀơ. Nkre, ăp nău ƀư văn hóa bah nuĭh ƀon lan geh dơn nău hăn ndrel, ntop kơl bah ăp nău kơl bah ngih dak. Ăp đảng viên, bu ranh ƀon, nuĭh dơi nsing nơm ƀa ƀơ tâm mâp, ntrŭt đă nuĭh ƀon lan râng ăp nău ƀư văn hóa nsum mpôl, nkre ntĭm an rơh druh ndăm ăp nău ueh tâm nău way ơm bah nuĭh Êđê. Wa Y Bơ̆i Byă-Bí thư Chi bộ buôn Hai, xă Cư̆ Mta, n’gor Dak Lak an gĭt: “Gâp ndrel ăp bu ranh ƀon, nuĭh dơi nsing nơm rgŏ jă ăp oh, nkre he mât ăp nău khlay văn hóa way ơm rnoi mpôl đêt tâm nău rêh. Lĕ rngôch ăp ndơ nsơr dơi dŏng gay ƀư brah, ƀư ndrâm dak, kuăl mih n’hanh dăn an săk soan dơi mât kơt bah năp đaơ”.

Wa Y Bơ̆i Byă an gĭt tay, knơm geh ăp nău kơl bah ngih dak n’hanh nău ndrel soan, ma nău rêh bah 132 rnăk đah rlău 520 nuĭh ta buôn Hai nar lơ rgâl. Wăng sa lơ hun hao, kônh wa lơ wât âk lơn mpeh nău mât, ƀư uĕh văn hóa rnoi mpôl đêt. “Aƀaơ hin N’gâng kan văn hóa lĕ an buôn Hai du bôr chĭng n’hanh ăp kho ao tanh Êđê. Tâm nuih n’hâm nuĭh ƀon lan âk nău răm, nkre rơh druh ndăm mât nău way ơm ƀư brah n’hanh tŭr chĭng kơt du nău ueh văn hóa bah ƀon lan. Tă bah ăp nău ƀư brah mô lah ƀư brah ndrâm dak, kônh wa tâm ƀon mât n’hanh rêng hvi tâm nău rêh”.

Mât nău ueh way ơm lah mât ndrăy tu tơm n’hanh jao ntĭm nău khlay an ăp rơh druh bah kơi. Đah nău ndrel ty bah gưl ủy, n’gâng kan ƀon lan n’hanh nuĭh ƀon lan, nău ueh văn hóa bah nuĭh Êđê ta buôn Hai mbra dơi mât rƀăy lah rse boăt nthoi nsum mpôl, rgop ndâk njêng nău rêh văn hóa nar lơ âk n’hanh jêng an hun hao nâp nâl bah ƀon lan./.