Du nar pah kan bah yuh Phan Thị Lý, chuyên viên Jrô kan wăng sa xă Quảng Phú, n'gor Dak Lak way jŏ bah ôi ơm tât kêng măng. Nău kan bah du chuyên viên mât uănh kế toán, ntuh kơl nsum, thống kê, mbơh tơih wăng sa - rêh jêng, rdâk njêng ăp nkô̆ nău mpeh trong nchrăp hun hao… yuh Lý mbra nsrôih ƀư lôch jêh tâm nkual mông pah kan. Yơn đah nău ngăn mô tŏng cán bộ, yuh an ntop kơl nău kan tuch tăm, uănh nđôi rnăk ach o n'hanh mkra ăp nău kan mpeh neh ntu ta ntŭk. Yor nĕ, âk rnôk tât lôch 19h yuh mơ dơi sĭt jay. "Ntŭk gŭ bah gâp ăp nŭih lĕ geh nău jâk, du hê gâp rnôk aơ ƀư 5/6 nău kan, dôl ma ƀư nău kan aơ lŏ ƀư nău kan êng, kơt lah ƀa ƀơ kơt nê. Lŏ mô geh kơp măng nar mô lah nar prao nar pơh, lah nsum lah lôch nău kan ri lơi mô lah rnôk ji nuih ngăn ri rlu. Kơt nar bah năp nê ri ƀư tât rlău 12h măng."

Nău ŏk r'ah, âk ir ta ntŭk kan mô dơn geh đah nău kan wăng sa mô lah neh ntu, ma pơk hvi ta lĕ rngôch ăp nău kan hành chính - rêh jêng. Wa Hà Tường Vi, Chánh Văn phòng UBND xă Ea Súp n'gor Dak Lak an gĭt, gưl xă nkre ƀư tĭng âk nău kan bah gưl nkuăl, nkre dơn, mkra sam ƀŭt rhăch nău bah nuĭh ƀon lan, nkre mât uănh ăp nău kan kơt njrăng n'gang sa khâm, mpŭng lir; mbơh ƀư n'glôch jêh uănh nđôi, nău kan bah dih n'gâng kan… Tâm nĕ geh ăp nkô̆ nău mhe, cán bộ gưl xă mô hŏ geh nău blău tâm ôp tâm nchră, ƀư tĭng.  "Du nar dơn ntơm bah 70 tât 100 sam ƀŭt, n'hanh rnoh âk sam ƀŭt hăn hôm âk n'hanh rnoh âk rơh hop tâm pơh pah kan đah ăp n'gâng kan, nău kan, nhih phat dôih pah kan ntơm bah 3 tât 5 rơh hop du nar, tâm rnôk ăp sam ƀŭt geh tât sam ƀŭt rhăch nău, trong ƀư hôm e ƀư kơt gưl nkuâl ơm."

Nău mô tŏng cán bộ geh nău blău kan dôl lah nău nsum bah lĕ rngôch ăp xă, phường ta n'gor Dak Lak. N'gor ủy Dak Lak uănh năl, aơ lah nău ngăn an uănh kloh n'hanh geh trong mkra tâm di mơ dơi kơl ntrong ƀư n'gâng kan ƀon lan 2 gưl geh săk rnglăy, nău dơi, nău tam kơt nău mpŏng ŭch. Trong mkra bah năp măt lah mbra rgum, tâm pleh nuĭh kan bah gưl n'gor, nkre uănh mĭn tay rmôt cán bộ gưl xă an đăp mpăn nău dơi kan.