Măng tâm mâp nkoch bri đah nuĭh tă ơm ban saơ tâm lơh tâm su kăl e geh bar gâl “Tu tơm n’groh săk” n’hanh “Nđơn nchih tay nău mprơ han dăng”. Măng ƀư hŏ rdâk rêh tay han dăng bah Thủ đô ntơm bah ăp nar dâk lơh duh rdôl năm 1946, tahen n’hanh ƀon lan Hà Nội rôih dăng tâm lơh ndăng 60 măng nar ƀư roh chrai nău mplư rlăm “lơh ngăch, dơi ngăch” bah mpôl Prăng, mât đăp mpăn an nhih pah kan bah Đảng, Chính phủ plơ̆ rŭch chiến khu, nta trong dơh gay lam rnoi nuĭh lăp tâm rơh rdâng lơh mbro mbrăng. Nchih jêng ăp plơp lha kăl e dăng janh nê, lah ăp nuĭh ƀon lan Hà Nội nơm, ăp tahen “N’groh săk gay neh dak dâk rêh”.

Râng tâm lơh ntơm bah rnôk hôm bu ndăm jê̆, tahen ơm Phạm Đình Luận, tahen Trung đoàn Thủ đô ơm, nkah tay:

“Rnôk nê nơh ri gâp gŭ ta phố Hàng Bông. Pháp lah păng lơh jêng âk nău krit djơh. Rnôk lam dak dâk lơh tĭng nău kuăl jă bah Wa, lĕ rngôch nuĭh ƀon lan n’hanh tahen, bŭnh ranh bu ur bu klô râng tâm lơh ta Hà Nội da dê... Rnôk nê gâp mhe 9 năm deh dơm, gŭ tâm Trung đoàn Thủ đô mô di lah du hê gâp ndăm jê̆, ma hôm dŭt âk nuĭh kan mbơh nău lư ta ăp pôih tahen êng ƀa ƀă đŏng.”

Tâm măng tâm mâp nkoch bri, phóng sự dơi pơk đah ăp nău nkoch ngăn ngăn bah ăp nuĭh tă ơm ban saơ, ăp cán bộ, tahen Bộ tư lệnh Thủ đô hŏ ƀư dâk rêh tay ntŭk njrăng n’gang ŭnh n’hâng kalơ trôk Hà Nội tâm 12 nar măng jêng “Trong hăn lơh Điện Biên Phủ kalơ trôk” năm 1972. Lôch nê lah ăp njuat jâng hăn chŏl lor đah rơh hŏ bah tâm lơh bah cán bộ tahen tâm njrăng n’gang trôk nar lơh, kơl nuĭh rmoh rmanh, mât njrăng đăp mpăn an tĭng njônh trong nkual ƀon têh. Bah nê hŏ rêng lam nău n’hao êng săk, rdâk tay nău nđơr n’groh an bah rơh kơn nar aơ nđơn chuat tay tu tơm luh “N’groh săk gay neh dak dâk rêh”, nđơn nchih tay nău mprơ han dăng jêng nău kan ngăn ngăn, ndrel nsum ti mât đăp mpăn, rdâk njêng Thủ đô Hà Nội văn hiến, rsang rnglay, têh uĕh mhe. Râng măng tâm mâp nkoch bri, bu ndăm Nguyễn Viết Thịnh, phường Ô Chợ Dừa, nkoch:

“Rơh kơn mât njrăng êng kăl e hŏ dŏng nting mham bah he gay mât tĭng njônh nkual ƀon têh, tĭng chor jay. Ndrĭ rơh mom ndăm mpôl hên nar aơ dŏng suan mom ndăm, nuih n’hâm han săk n’hanh bôk rngok gĭt blău bah he gay mât ndray n’hanh mât njrăng Thủ đô Hà Nội nar lơn ma ndrŏng dăng, rsang rnglay n’hanh bah tâm lơh tâm su.”