Ntoh ngơi n'glôn jêh rƀŭn nchră, Tổng Bí thư, Kruanh dak Tô Lâm lah rjăp, nđơn tay ăp nău ntrŭnh bah bôk năm kan, Rƀŭn nchră rơh aơ ƀư jêng ngăn ngăn Nghị quyết Đại hội tâl XIV bah Đảng, nkre ndâk njêng Đảng đah mât uănh ngih dak n'hanh hun hao neh dak. Trung ương lĕ tâm ban ŭch nău rƀŏng gŭ mĭn ăp nkô̆ nău tơm bah Đảng n'hanh trong hun hao jŏ jong bah neh dak.

Tổng Bí thư, Kruanh dak an gĭt, Trung ương hŏ n'glêh an ăp trong nchrăp mhe mpeh n'hao nău dơi rgâl mhe êng, rgâl êng bah Đảng n'hanh lam trong kan chính trị. Trung ương n'glêh an Nghị quyết mpeh n'hao dăng rdâk njêng, rgâl dăng Đảng n'hanh lam trong kan chính trị kloh uĕh, nâp dăng, lam lĕ rngôch, tŏng đah nău ŭch geh hun hao bah neh dak tâm rơh mhe. Trung ương hŏ n'glêh an rgâl mhe pah kan cán bộ n'hanh trong kơl wăch rgum, dŏng nuĭh gĭt blău, nchrăp rmôt kan tŏng đah nău ŭch geh hun hao neh dak. Lôch rơh rƀŭn, Tổng Bí thư, Kruanh dak Tô Lâm đă ƀư na nê̆ lĕ rngôch, ngăch ăp nău ntrŭnh, ƀư lôch dŭt n'hâm nău kan năm 2026, njêng jâng nsing gay năm 2027 hao ngăch, dâk hao tay; n'hao uănh nđôi, groi uănh nău ƀư n'hanh mât uĕh nău ƀư tơm bah ƀon lan.