Ta rgum nchră, nău nkoch bah Hợp tác xã Lŏ mir Đạ M'ri an saơ dŭt kloh ăp jêr jŏt dôl ndơ̆ luh. Hợp tác xã aƀaơ geh 180 nuĭh, đah nklăp 450 héc-ta sầu riêng. Rnoh âk nkra njêng têh, yơn tâm ăp rnăk hôm e geh nău êng êng mpeh rêng ƀư tuch tăm. Nuĭh mât tơm tĭng nău tă ơm gĭt kan, nuĭh kơt dŏng rêng ƀư kỹ thuật; nău dŏng phân poh, dak si mât njrăng si tăm mô lah nchih nkah nar luh kan mô hŏ di rnôk tâm ban. Wa Nguyễn Thanh Sơn, Kruanh Hội đồng quản trị nkre ƀư Giám đốc Hợp tác xã Lŏ mir Đạ M'ri an gĭt: "Nău ngăn geh bah ƀon lan kan lŏ mir he lah tuch tăm ăp nuĭh du trong êng êng, mô geh nuĭh tâm ban. Nkô̆ nău ndơ̆ luh ta aơ lah phâm ƀư tuch tăm. Hợp tác xã mpôl hên hŏ geh trong rƀŏng, ntĭm nti, tâm nchră, rlong ƀư; nău ŭch tât n'glĕ dŭt lah phâm ƀư tuch tăm tĭng trong rƀŏng hữu cơ jŏ jong".

 Tât nar 18/9/2026, n'gor Lâm Đồng geh 1.611 rnoh mbrô nkual tăm, tâm nê 1.094 rnoh mrô rhŏ dŏng tăch n'gluh lĕ dơi dak rvăt n'glăp uănh an dŏng; ndrel 547 rnoh mbrô ntŭk tâl dŭng. Yơn lah, 173 rnoh mrô mbrô nkual tăm, đah rnoh neh rlău 3.600 héc-ta, n'hanh 61 rnoh mrô ntŭk tâl dŭng lĕ geh n'hŭch mô lah sŏk mplơ̆. Ăp rnoh mbrô aơ an saơ, rnôk sam ƀŭt rhăch nău pă an rnoh mrô nar lơn ma dơi ƀư dơh glêh, pă gưl n'hanh rgâl mbrô, rgum tơm mât uănh an rgâl dăng tâm nău mât uănh nău dơi jêh pă an rnoh mrô. Nĕ lah uănh nđôi ndơ dŏng tuch tăm, mât đăp mpăn rêng ƀư tuch tăm, nchih rgum lĕ rngôch, joi tu tơm n'hanh n'hao nău dơn kan bah tĭng nuĭh tơm tâm rêng. Giám đốc Ntŭk rgum ntrŭt nsôr tuch tăm gưl neh dak Lê Quốc Thanh lah rjăp:  "Rnoh mbrô nkual tăm mô hŏ nkoch nău du ntil đŏng ôh, păng mhe knŭng lah nău dơh dơm. Hôm ƀon lan kan lŏ mir tăm đah moh trong ƀư, dŏng moh rnoh di, dŏng moh trong ƀư, ndơ dŏng mhâm ƀư ri lĕ rngôch ăp nău lư bah rnoh mbrô nê mư nkoch nău uĕh kah ndơ".

Nău mbơh aơ an saơ, rnoh mbrô nkual tăm mô dơi uănh kơt du "kak lăp" gay ndơ̆ ndơ tuch tăm luh ntŭk tăch lam ntŭr neh. Ta bah kơi ăp rnoh mbrô an lah du nkual tơm tăm dơi ƀư tuch tăm na nê̆, geh trong ƀư tâm ban n'hanh geh nău dơi mât uănh săk kah bah bôk năp tât luh. Bah meng nău nkoch ta Lâm Đồng, nău kơp dơn mô dơn đah sầu riêng ma đah âk ntil ndơ tuch tăm êng ƀa ƀă bah Tây Nguyên n'hanh lam dak.