Tâm môch tâp tahen tâm Bảo Lộc, ntŭk tâp bah 740 tahen, tâm nê geh 102 môch ê geh năl moh săk, n’gâng kan dôl tâm rgop nsum ma n’gâng kan tahen n’gor Lâm Đồng ƀư hăn sŏk nting mham. Wa Nguyễn Thị Huyền Phương, Groi Kruanh UBND Phường 3-Bảo Lộc, mbơh: ‘Ƀư nau leo sŏk nting mham tâm ăp môch tâp tahen Bảo Lộc, UBND phường lĕ rđau Rnâng kan rđau tahen Phường 3-Bảo Lộc đăp mpăn ntŭk ntu ƀư kan, tŏng nau dơi gay ma tâm rgop nsum ma N’gâng kan rđau tahen n’gor ntrŭnh ƀư nau sŏk uănh năl nting bah tahen, rgop nau năl kloh moh săk bah ăp tahen jang dăng lĕ khĭt, leo ăp nô plŏ sĭt ma rnăk vâl, ntoh nau vay, nau ueh ‘Ngêt dak nkah gĭt tu” bah rnoi mpôl”.

Nau kan geh ntrŭnh ƀư tâm ban tâm 11 ntŭk môch tâp tahen tâm lam n’gor Lâm Đồng. Lôch nê, 4.776 môch tahen ê geh năl moh lĕ geh kuai uăn, sŏk nting mham. Tâm nê, geh 3.625 nting geh dơi sŏk gay uănh năl ADN. Đại tá Phạm Văn Soái, Groi Kruanh Chính trị, N’gâng kan rđau tahen n’gor Lâm Đồng, nkoch lah:“Lâm Đồng lah ngoai tâm ăp n’gor ƀư jêh ueh ơm ngăn nau sŏk nting mham uănh năl. Nau tă geh aơ dơi lah rnơm nau kơl an bah Rnâng kan n’gor uỷ, HĐND, UBND, Uỷ ban MTTQ Việt Nam n’gor; ngăn lah nau nsôih, nau kơl an ngăn bah cán bộ, tahen tâm rmôt tahen bah n’gor. Bol ma bri mih, nar, hôm âk nau jêr đŏng, yơn phung hên hôm nsôih ƀư ân jêh nau kan ơm”.

Lah tâm ăp môch tahen, nau jêr lah nau đă rjăp mpeh nau ƀư, nau ngăch, ri nau hăn joi nting tahen tâm bri hôm lơn ma jêr. Jêh âk jêt năm, neh ntu âk ntŭk lĕ geh nau rgâl, ntŭk tâp bah năp nơh ri rnôk aơ jêng bri, tơm si, neh mir, ntŭk ƀon lan gŭ mô lah ngih bil. Nau mbơh âk ngăn ri nsing tâm săm ƀŭt lĕ ơm, nau nkah bah ăp tahen ơm ndrel ƀon lan, tâm rnôk nŭih tă râng saơ nar lơn đê̆. Mih jŏ jong ƀư nau kan uănh, năl, kuih joi tâm ăp dôl yôk, neh mir lơn ma jêr; geh ntŭk ri hăn uănh năl âk tŏ, pơk hvi ntŭk joi ri mơ saơ geh têl.

Đah ăp cán bộ, tahen hăn ƀư, aơ mô êng lah nau bah nơm ma hôm lah nau ndơn nau kan bah nơm đah ăp nŭih lĕ khĭt. Thượng tá Phạm Ngọc Khánh, Groi Chính uỷ, Rnâng kan njrăng rdâng nkuăl 1, Đức Trọng, n’gor Lâm Đồng, nkoch mbơh:Đah ăp đồng chí rnôk geh jao nau kan, ăp nŭih kŏ saơ ntô̆ n’hao săk nơm ndrel năl kloh nau kan bah nơm rnôk geh bu rnơm jao ƀư du nau kan dŭt n’hâm geh huêng khlay kơt nê”.

Rlet rlau ăp nar mih, sial, Lâm Đồng hŏ ƀư jêh ơm ngăn nklăp 3 khay nau kan sŏk năl nting mham tâm 11 môch. 3.625 nting mham tahen geh jao gay leo uănh năl ADN, pơk nau ŭch geh năl moh săk ân ăp môch ê geh năl moh, nkre lah ntop tay n’hâm ân nau hăn joi, rgum ăp nting tahen khĭt hôm e tâm bri.

Bah năp hôm ơm âk nau kan, yơn đah nau nsôih ndrel nau kan, ntrong leo ăp tahen khĭt kăl e sĭt ma moh săk, năm deh, rnăk vâl ndrel ƀon tơm hôm dôl geh lŏ ƀư tâm ăp nar./.