Ntơm bah xă gôl dak Nhơn Châu, nô Nguyễn Văn Bảy ndrel rlau 100 nŭih ƀon lan rlet rlau 13 hải lý lăp tâm neh kơh gay râng rơh uănh năl samƀŭt ƀĭt ndeh hạng A1. Đah ƀon lan tâm gôl dak, ăp tơ̆ lăp tâm neh kơh lah ntop tay du tơ̆ mĭn rvê nau hăn trong, gŭ âm. Tâm rơh uănh năl aơ, ăp prăk dŏng nê geh ngih dak kơl an, kơl kônh wa n'huch du gưl nău jêr. Đah nô Bảy, nău khlay lơn lah ăp nău blău mpeh luật hăn trong dơi geh dŏng tâm nău rêh ăp nar. "Nău mĭn rnôk bôk năp geh nău rwê yơn ma lĕ nsôih tâm rlong ân geh nău dơi. Rnôk râng hăn trong gĭt hăn tâm di trong, tâm di trong tĭng nău ntrŭnh bah pháp luật".

Wa Dương Hiệp Hưng, Kruanh UBND xă Nhơn Châu an gĭt, rnoh khlay bah bôk nău kan mô knŭng gŭ ta nău kơl nuĭh ƀon lan geh tay nău dơi pă an samƀŭt ƀĭt ndeh, ma khlay lơn lah năp nău gĭt blău pháp luật ntung trong du trong na nê̆. "Kônh wa dŭt lah nsing nơm tâm ăp bôk nău kan khlay kơt aơ, ŭch rŏng lah kônh wa lĕ dơi tâm rlong blău n'hanh ăp kônh wa lah du hê nuĭh nkoch trêng gay n'hao nău gĭt êng tĭng jăp Luật hăn ntung trong gay ndâk njêng xă gôl dak nar lơn ma têh ndrŏng, uĕh mhe n'hanh tâm rnglăp".

Lah ta gôl dak Nhơn Châu, nău ngai ngât lah nău jêr jŏt ri ta du đêt nkual rnoi mpôl đêt bah Gia Lai, nău jêr jŏt ntơm bah nău răk n'hanh gĭt rplay samƀŭt đah nău ngơi yuăn. Geh ăp nuĭh ƀon lan mô gĭt răk, gĭt nchih nău ngơi yuăn. Lah dŏng trong tâm rlong rplay samƀŭt way ơm, khân pơng jêr mpơl lĕ rngôch ăp nău gĭt blău lĕ dơi ntĭm nti, bôl hôm e geh nău ŭch n'hanh nău dơi ƀĭt ndeh. Gay ma doh rklaih nău wăk kol aơ, ta du đê̆ ntŭk, rơh tâm rlong rplay samƀŭt geh ƀư đah nău tâm ôp. Sát hạch viên lah nuĭh rnoi đê̆ na nê̆ ndơ̆ nău ôp đah nău ngơi ta ntŭk, kơl an nuĭh râng tâm rlong gĭt di nkô̆ nău n'hanh ơh tĭng nău dơi bâh nơm. Yuh Rơ Châm Di, ta ƀon O, xă Ia O, n'gor Gia Lai, rhơn an gĭt: "Nar aơ dơi tâm rlong samƀŭt ƀĭt ndeh n'hanh lôch uĕh rơh tâm rlong rplay samƀŭt ri săk gâp dŭt rhơn ngăn. Bah kơi aơ ƀĭt ndeh mbra đăp mpăn lơn".

Nău rhơn bah yuh Di lĕ lah nău ŭch bah âk nŭih ƀon lan nkual rnoi mpôl đê̆: geh nti ndrel geh kơp dơn bằng ma nău dơi bah nơm, yơn tĭng du trong tâm di đah nău geh ngăn. Trung tá Thái Hoàng Nam, Kruanh Công an xă n'har bri Ia O, n'gor Gia Lai, mbơh, lah nkual geh nklăp 70% rnoh nŭih lah nuĭh rnoi mpôl đê̆, nău rêh hôm âk nău jêr jŏt. Nău dơi geh ntĭm nti, kơp uănh gay ma pă săm ƀŭt ƀĭt ndeh mô roh prăk kơl an nŭih ƀon lan geh tay nău dơi gĭt tât pháp luật hăn trong. "Tă bah aơ n'hao đŏng dơi nău blău mpeh pháp luật đăp mpăn hăn trong. N'hanh rnôk geh pă ăp săm ƀŭt kơp dơn ri nŭih ƀon lan mra geh nuih n'hâm lơn tâm nău ƀư tĭng pháp luật, mât njrăng săk nơm, rnăk wâl n'hanh nsum mpôl ƀon lan".

Ntơm bah n'gul khay 8/2025 tât aƀaơ, Công an n'gor Gia Lai lĕ ƀư 13 rơh uănh năl sam ƀŭt ƀĭt ndeh hạng A1 mô sŏk prăk an 862 nuĭh mpeh rnăk ach o, dăch kêng ach o ta ăp xă dŭt jêr jŏt. Tâm rnoh aơ, 475 nuĭh tŏng nău dơi n'hanh dơi an samƀŭt ƀĭt ndeh.

Thượng tá Ksor H'bơ Khắp, Groi Giám đốc Công an n'gor Gia Lai an gĭt, bôk nău kan kơl an âk rnăk jêr jŏt geh gĭt tât nău gĭt blău pháp luật n'hanh ăp nău ŭch geh gay ma râng hăn trong đăp mpăn. "Ntĭm rđău Công an ăp xă ta lam n'gor uănh nđôi lĕ rngôch ăp rnăk jêr jŏt, rnăk dơi kơl an dơi Ngih dak ntop kơl. Jêh nĕ nchih săk n'hanh ƀư ăp gưl gay kơl an nuĭh ƀon lan ta ăp nkual aơ ƀư dơi tâm rlong gay geh samƀŭt ƀĭt ndeh, đăp mpăn dơi gĭt pháp luật rnôk râng hăn ntung trong".

Đah ăp ntŭk hôm âk jêr jŏt ta Gia Lai, ntrong kan "samŭt ƀĭt ndeh ŭch rŏng" hôm lah trong ndơ̆ ăp nău đă mât đăp mpăn hăn ntung trong tât dăch lơn đah nuĭh ƀon lan, bah nĕ rgop ndâk njêng nău gĭt êng tĭng jăp pháp luật hăn ntung trong ntơm bah tâm dâng.

Hoàng Qui/VOV - Tây Nguyên