Nar 1/10, Đảng ủy Tahen n'gor Dak Lak ƀư Rƀŭn nchră mbơh nghị quyết rđău đă ƀư tĭng nău kan 12 khay năm 2026. Rnôk bah năp, Đảng ủy Tahen n'gor Dak Lak lĕ rđău đă mpôl tahen ƀư lôch uĕh ăp nău kan dơi jao; tâm ôp tâm nchră n'gor ủy, UBND n'gor rđău đă lĕ rngôch trong kan njrăng n'gang neh dak, tahen ta ntŭk n'hanh n'har bri; ƀư lôch uĕh tiăr nti nkual njrăng n'gang n'gor n'hanh rđău đă ăp xă, phường ƀư tiăr nti tĭng trong nchrăp. Tâm "Trong kan 500 nar măng", Đội K51, N'gâng kan ntĭm rđău tahen n'gor Dak Lak lĕ tâm rgop đah ăp rmôt kan dơi kan tâm dak n'hanh dak băl Campuchia, ƀư joi, rgum geh 36 nting tahen khĭt.

Tâm nĕ, geh 23 nting tahen joi, rgum ta n'gor; 13 nting tahen joi, rgum ta dak băl Campuchia. Ntoh ngơi ta rƀŭn nchră, wa Lương Nguyễn Minh Triết, Ủy viên Trung ương Đảng, Bí thư N'gor ủy, Bí thư Đảng ủy Tahen n'gor Dak Lak lah rjăp nău đă tĭng ƀư tay dŭt n'hâm Trong kan 500 nar măng mpeh ntrôl dăng joi, rgum n'hanh năl săk nting tahen khĭt.