Ăp nar aơ, ta âk mir sầu riêng ta xă Chư Prông, n'gor Gia Lai, nuĭh ƀon lan an manh nuĭh kĭch jăng ăp tơm lĕ khĭt. Ta thôn Hoàng Yên, âk mir sầu riêng bah năp đaơ uĕh nđĭr, aƀaơ knŭng hôm ăp tơm kro, chông kro. Lôch âk rơh joi trong kơl săm yơn mô tam, wa Trịnh Ngọc Oanh, thôn Hoàng Yên an kĭch jăng lĕ rngôch mir tơm lĕ mât chăm lĕ 4 năm. Rnăk wa Oanh geh 162 tơm sầu riêng, lăp tâm năm tâl 4 n'hanh nchrăp an rơh klêh play bôk năp. Yơn lah, knŭng jêh du pơh, tơm ndal geh bu tuh lôch nê khĭt."Mir jay gâp 4 năm hôm mô hŏ geh play, năm aơ nklăp an play rĭ khĭt lĕ hôm. Rêh dơm, kan rĭ prăk. Aƀaơ an geh dơn, koh lơi dơm."

Mô dơn rnăk wa Oanh, âk rnăk ƀon lan êng ƀa ƀă ta thôn Hoàng Yên geh tâm nău kơt nĕ đŏng. Geh rnăk roh bar pe jât tơm, geh rnăk khuch hang rhiăng tơm. Ntơm bah du mir sầu riêng uĕh jêng, mir bah nô Lê Văn Thành ta xã Chư Prông aƀaơ knŭng hôm ăp tơm kro ranh. Lha rŭng nklăp lĕ, n'ging kro ôm, âk tơm lĕ khĭt dâl. Rnăk nô Thành ndrel ăp oh nô tăm bơi 300 tơm sầu riêng, tât aƀaơ nklăp 6 năm. Năm e, mir an klêh nklăp 17 tấn play, đah rnoh tăch 57.000 prăk du kg. Yơn lah, lăp tâm yan năm aơ, tơm ntoh nău bu tuh n'hanh khĭt âk. Bôl mô hŏ năl na nê̆ ndơ ƀư jêng nău bu tuh, nô Thành an gĭt ta tơm geh ăp ntŭk luh êr. Jêh nĕ, lha kro, rŭng lĕ lôch nĕ tơm khĭt mbrơi mbrơi. "Năm e geh khĭt ma khĭt đêt, năm aơ khĭt âk jêng kônh wa sreh tăm tay. Kônh wa rngot, mô ŭch luh mir đŏng ôh. N'hâm soan âk năm ma aƀaơ khĭt lĕ, rngot ngăn."

Wa Ngô Anh Tuấn, chuyên viên Jrô kan tuch tăm - ntung trong xă Chư Prông, n'gor Gia Lai, mbơh, nau tơm sầu riêng khĭt âk aƀaơ rgum ngăn tâm thôn Hoàng Yên ndrel ƀon Bạt. Rnoh neh khuch khat geh kơp n'ăp ma rlau 10 ha. Bah nau mêt uănh bôk năp, n'gâng kan kơp dơn tơm sầu riêng khĭt mra geh tât mbrĭng sêt. Ăp nau mpơl saơ tâm tơm tâm ban ma nau tơm tiêu geh bu tuh khĭt ngăch, khĭt mbrơi. Ngăn lah, âk ngăn rnoh neh geh khuch tâm ăp ntŭk neh ntu prêh, nơih luh dak. Rnôk mih jŏ jong, dak rchoh tâm mir, nta nơih an mbrĭng sêt ntoh luh n'hanh ntưp rêng. Wa Ngô Anh Tuấn an gĭt:"Âk ngăn ăp mir geh khĭt lah ăp mir geh ntŭk ntu tâm ban, dak mô dơi luh. Gay ma der nau ntưp rêng, nkuăl bonh đă ăp rnăk geh tơm khĭt koh tơm, rep mir; ăp mir ê hŏ geh khĭt ri kuĭh ntu luh dak, mô ân tơm geh ôm."

Aƀaơ nău kan dơi kan xă Chư Prông, n'gor Gia Lai lŏ kơp uănh rnoh neh sầu riêng geh khuch, ntĭm nuĭh ƀon lan rklaih nkra ăp mir geh khuch n'hanh nchrăp n'hoch dak. Nău sầu riêng khĭt âk jêh rnôk mih jŏ jong mô knŭng ƀư khuch ngăn an nŭih tăm, ma hôm an saơ ăp nău tât khuch rnôk hun hao ntil tơm aơ ta ăp nkual neh mô tâm di.