Ntŭk rgum ntrŭt nsôr tuch tăm mât rong gưl neh dak an gĭt, Nghị quyết 36 bah Chính phủ n'gluh an dŏng nar 31/7 lĕ ƀư dơh glêh siƀŭt pă an mã mbrô nkual tăm, mã mbrô ntŭk tâl dŭng. Nău pă n'hanh mât uănh mã mbrô dơi ƀư ta ntŭk mạng, tĭng nău way ƀư tơm, êng nuĭh mbơh, êng nuĭh dơn nău kan, nkre đah uănh năl tay n'hanh joi tu tơm luh. Jêh bơi 2 khay mbơh ƀư, lam dak lĕ pă mhe 787 mã mbrô nkual tăm. Ta Gia Lai, wa Nguyễn Thị Tố Chân, Groi Giám đốc Sở Nông nghiệp n'hanh Môi trường an gĭt, lam n'gor pă dơi 43 mã mbrô nkual tăm, n'hao lĕ rngôch rnoh mã nkual tăm lam n'gor hao 424 mã.  “Nău rgum joi ntŭk mât prăp nău lư an he saơ nău uănh năl lam lĕ rngôch lah nău ŭch bah nuĭh ƀon lan lah geh. Yơn lah, nău gĭt êng bah kônh wa mô hŏ tâm ban, jêng ân tĭng ƀư nkoch trêng, rgŏ jă, ntĭm nti gay nuĭh ƀon lan gĭt lah nău dơn du mbrô nkual tăm lah dơn du ntŭk gay năl rnoh khlay ndơ geh ƀư bah he. Rnôk nău gĭt êng bah nuĭh ƀon lan hŏ dơi n'hao ri mbra ƀư lôch jêh dơi nău ƀoi tĭng tơm luh. Bah meng nê, ăp hợp tác xã, doanh nghiệp rdâk njêng tâm rgop rêng kan ta ntŭk mât prăp nău lư bah nuĭh ƀon lan."

Bôl ma nău kan pă rnoh mbrô nkual tăm lĕ dơh lơn, ntoh măt doanh nghiệp n'hanh hợp tác xã an lah mât rnoh mbrô bâh ăp yan mơ lah nău an geh uănh khlăy. Gay ma dơi ƀư nău nĕ, nŭh pah kan an geh nchih nău kan tuch tăm, uănh nđôi ndơ dŏng bôk năp, mbơh tơih nău kan; ntŭk kan tâl dŭng an geh mât ăp nău ntrŭnh lĕ dăn đă. Aơ lah ăp nău mbơh an geh khlăy gay ma gĭt na nê̆ tu tơm n'hanh uănh năl nău ueh ndơ tuch tăm.

Ăp ntŭk kan kŏ dăn đă rdâk njêng nău kan gay ma rmôt kan khuyến nông ntŭk rêh jêng tât râng pă nău kan kĩ thuật, kơl an ƀon lan kan lŏ mir ƀư tĭng n'hanh mât ăp nău ntrŭnh bâh rnoh mbrô.

Wa Lê Quốc Thanh, Giám đốc Ntŭk rgum ntrŭt nsôr tuch tăm gưl neh dak an gĭt, let năp tay lam trong kan ntrŭt nsôr tuch tăm nsum mpôl mbra n'hao dăng ntĭm nti nuĭh ƀon lan ƀư tĭng nkra njêng, ntĭm nti mpôl kan ta ntŭk, buăt nthoi doanh nghiệp đah hợp tác xã n'hanh nuĭh ƀon lan kan lŏ mir; nkre rgum ăp wăk kol ntoh luh gay dăn đă dôh rklaih. “Rmôt kan ntrŭt nsôr tuch tăm nsum mpôl an hăn ndrel đah kônh wa, na nê̆ ndrel đah kônh wa. Dơi lah ân rgâl trong ƀư, dơi lah nkre ta mir sầu riêng, mir cà phê, mir chanh rse, rnôk kônh wa dôl tuch tăm, ri rmôt kan tât ntop kơl kônh wa ƀư nkre ăp njuat kan mbơh tơih ta ntŭk điện tử n'hanh ăp nău kônh wa dôl mâp".

Nguyễn Thảo/VOV - Tây Nguyên