Lơ 10/8/1947, ta buôn Ma Hinh, aƀaơ lah buôn Đất Bằng, Chi bộ Đảng bôk năp bah nkuăl Cheo Reo (ta n’gor Gia Lai ơm) dơi ndâk njêng đah 3 đảng viên: Ksor Ní, Rơchơm Thép n’hanh Rơchơm But. Đồng chí Ksor Ní dơi săch ƀư Bí Thư Chi bộ. Tâm ăp năm khay cách mạng hôm âk jêr jŏt, ăp đảng viên lĕ ndâk njêng ntŭk chính trị, rgŏ jă, rgum ƀon lan, ntơm ndơ̆ ntrong leo cách mạng hun hao. Mhe aơ, ntŭk ndâk njêng chi bộ bôk năp bah nkuăl Cheo Reo dơi UBND n’gor Gia Lai ntuh kơl ndâk njêng nkual nkah ndrăy ta rnoh neh nklăp 1,7ha. Ntŭk aơ jêng “Ntŭk tât chăng” ntĭm nti way ơm cách mạng an ăp rơh. Di nkah gĭt 81 năm Cách mạng lôch ueh n’hanh Quốc Khánh 2/9, sĭt khâl nkual nkah gĭt, wa Trịnh Thanh Khiết-Groi Bí thư Đảng ủy xă Phú Túc mĭn lah: “Nău nti têh ngăn bah nău ma ndâk njêng Chi bộ đảng bôk năp ta Cheo Reo rnôk nĕ lah nău krêp dêh bah cán bộ đảng viên đah ƀon lan n’hanh nuĭh ƀon lan tâm nkual... An krêp dêh đah nuĭh ƀon lan, an dăch đah ƀon lan...”.

Êp ƀon lan, dăch ƀon lan lah nău nti bah ăp nar bôk năp ndâk njêng Chi bộ ta Cheo Reo (Gia Lai) tât aƀaơ rgâl tay đah lĕ nău kan bah tĭng cán bộ, đảng viên ta bah dâng. Jêh dăp tay, aƀaơ buôn Đất Bằng geh bơi 800 rnăk, đah rlău 3.180 nuĭh, lĕ rngôch lah nuĭh Jarai. Chi bộ aƀaơ geh 73 đảng viên, lah rmôt n’gâng tơm ndrel đah Mặt trận Tổ quốc n’hanh ăp nsum mpôl nkoch trêng, rgŏ jă Nuĭh ƀon lan ƀư tĭng nău ntrŭnh bah Đảng, nău kơl, pháp luật bah Ngih dak; hun hao wăng sa, ndâk njêng nău rêh văn hóa. Lah cán bộ mom lĕ jêh nti đại học, nô RơChơm Bết, (nuĭh Jarai), Bí thư Chi bộ nkre ƀư kruanh buôn Đất Bằng mĭn lah: “Săk gâp nơm lah Bí thư Chi bộ, mĭn lĕ đah nău kan bah nơm lah ƀa ƀơ nkoch trêng, rgŏ jă kônh wa hun hao wăng sa, tĭng ueh trong hăn, nău ntrŭnh bah Đảng n’hanh nău kơl, pháp luật bah Ngih dak... Đah ăp nău hôm wăk kol, ntoh mhe tâm thôn, mpôl hên nchrăp uănh joi gĭt nu nău gay ngăch mkra...”.

Trong kan ntĭm rđău, ƀĭt joet bah gưl ủy đảng ta Đất Bằng rgum tâm ăp nău na nê̆ tâm nău rêh. Tâm khay 7 mhe rlău, Chi bộ tâm rgop đah Mặt trận, nsum mpôl kơp uănh ntop kơl 200 rnăk ƀư tĭng tâm ban samƀŭt kơp dơn dŏng neh. 60 rnăk dôl geh nău ntop kơl rêh jêng dơi rgŏ jă bah dơn prăk măt an rgâl sŏk tă bah tài khoản. Ndrel đah nĕ lah ăp nău ƀư mât uănh rnăk wâl dơi kơl, ntop kơl nuĭh jêr jŏt, but uănh ji an nuĭh ranh, njrăng n’gang kop srê.

Ndre1 đah nău nkoch trêng, rgŏ jă, cán bộ, đảng viên ta Đất Bằng hôm hăn lor tâm rgâl nău mĭn, trong ƀư, ngăn lah tâm pah kan nkra njêng. Đất Bằng nar aơ lĕ jêng ăp nkual srih tăm ba lŏ, bum, tao; âk trong hăn tâm nkual tuch tăm dơi ntuh kơl, nta an nuĭh ƀon lan hun hao wăng sa. Đảng viên mom Kpă Tuyên lah ngoăy tâm âk nuĭh hăn lor tâm nău kơt dŏng khoa học kỹ thuật an nkra njêng, rgâl trong ƀư ơm.  “Lah du hê Đảng viên, săk gâp nti mro n’hanh ƀư tĭng leo lor bah ăp nuĭh hăn bah năp tâm pah kan nkra njêng. Bah năp đaơ, nău kan lŏ mir dŭt knơm tâm yan mih jêng nău geh mô âk... Aƀaơ, knơm nău nchrŏng trong n’hanh nchrăp lor kơt dŏng khoa học-kỹ thuật, ndơ̆ măy mŏk n’hanh trong tŏ dak luh êng an tuch tăm... nău kơt dŏng công nghệ mhe lĕ kơl n’hao săk rnglăy tuch tăm.”

Bah “Grăp ntil chăng” dơi srih tăm buôn Ma Hinh 79 năm bah năp, tât ăp nuĭh đảng viên nar aơ, trong hăn cách mạng ta buôn Đất Bằng, xă Phú Túc, n’gor Gia Lai dôl dơi nthoi đah ăp nău ƀư na nê̆, ngăn ngên. Nĕ lah dăch ƀon lan, wât ƀon lan, ndrel ƀon lan dôh rklaih jêr jŏt; lah ntrong leo hun hao wăng sa, kơt dŏng khoa học kỹ thuật, ndâk njêng nău rêh nar lơ ueh lăng lơn.