Lễ hội ndrănh yăng bah nuĭh Bu Nong bah meng n’glău Lăk ƀư tâm bar nar 29 n’hanh 30/8. Nău kan tă bah xã Liên Sơn Lắk ƀư, geh 10 bôk nău kan đah nkô̆ “Ndrui nhŭl bri neh têh hvi – Huêng Bu nong bah meng n’glău Lăk”. Ntoh lư lah Rơh tâm rlong ngêt ndrănh yăng; nchreng an uănh rêng mon uk bah nuĭh Bu Nong; rêng ƀư mon ndrui n’hanh n’gor ndrănh yăng; ăp nău pâl rlưn way ơm; ntroh hăn rveh, duk lôk si n’hanh ntŭk pla n’hơ, nkoch mbơh ndơ geh ƀư, văn hóa ƀon tơm ta ntŭk…

Rêng kan gay mpư rnê, mât ndray n’hanh ntik n’hao ăp rnoh khlay văn hóa way ơm bah nuĭh Bu Nong, nkre nkơnh n’hơ rup gui, kon nuĭh, văn hóa, ndơ geh ƀư ntĭt êng n’hanh săk geh pâl nđaih ta ntŭk. Wa Nguyễn Anh Tú, Kruanh UBND xã Liên Sơn Lắk, an gĭt, xã mpŏng lễ hội mbra rgop ndu rup gui nkual neh, kon nuĭh Bu nong bah meng n’glău Lắk tât dăch lơn đah năch tâm dak n’hanh dak bah dih.

“Rêng lam nău lư mpeh lễ hội tât nuĭh ƀon lan tâm n’gor, lam dak n’hanh dak bah dih. Bah nê, rgop nkơnh n’hơ rup gui xã Liên Sơn Lắk – ntŭk gŭ tâm ntŭk dăp rgum hun hao pâl nđaih bah n’gor Dak Lak n’hanh neh dak; nkre kuăl jă doanh nghiệp uănh khlay, ndrel hăn, ntuh kơl, rgop ntrŭt ntrôl pâl nđaih ta ntŭk hun hao.”

Hôm ta nklang xã Ea Knuếc, nău tŭr goh n’gâm chĭng gong, n’gôr gră nău gơm ngơi nklang ntŭk pla n’hơ sầu riêng, ndơ geh OCOP n’hanh ăp nău kan njroh mprơ, ndơ ngêt sa. Nar rgum hŏ nsĭt ndơ geh ƀư kah khlay ta ntŭk tât dăch lơn đah năch, pơk luh ntŭk gay lam nuĭh nkoch mpeh nkual tăm, mpeh joi geh trong rêh n’hanh văn hóa bah he.

Ntŭk rgum tơm bah bôk nău kan lah nău way ƀư wơt “Me sầu riêng” bah tơm ndru yău tât nkual lễ hội. Tâm nău nteh chĭng gong, ăp bu druh anh sah ndrel bar bôk rveh njêng mpôl hăn wơt săk tơm Tây Nguyên. Nău way ôp răch dăn an hơm răm ăp tŏng bah ƀon lan Rđe dơi rdâk tay, njuăl nău mpŏng khay tuch tăm dơh uĕh, sầu riêng jŭr geh play, geh rnoh khlay, ƀon lan hơm răm. Wa Y Feel Knul, nuĭh buôn Tara, xã Ea Knuếc an gĭt, lễ hội nsĭt tât nău rhơn n’hanh nău mpŏng an nuĭh tăm sầu riêng.

“Aơ lah rnôk nkơnh n’hơ văn hóa ăp rnoi mpôl đê̆ ta nkual neh dja nsĭt tât băl mpôl, năch pâl nđaih. Lah du hê nuĭh ƀon lan tăm sầu riêng, gâp ŭch rŏng ndơ tuch tăm dja nar lơn ma geh rnoh khlay đăp mpăn lơn gay kônh wa bah ir jêr jŏt”.

Tâm rêng kan “Ea Knuếc lăp khay klêh play” hôm geh hội chợ tăch rgâl, pla n’hơ OCOP, ndơ tuch tăm, ndơ ngêt sa, hăn uănh mir n’hanh livestream nkơnh n’hơ sầu riêng ta ăp ndơ pơk keh mbrô. Bah nê, mông nar Lễ hội Sầu riêng Dak Lak dơi rêng lam tât nkual tăm, leo năch n’hanh ntŭk tăch rgâl tât dăch lơn đah nuĭh tăm.

Ta lễ ntơm pơk, xã Ea Knuếc hŏ mbơh ntô lĭr mpôl “Sầu riêng Ea Knuếc”. Wa Trần Thị Vân, Groi kruanh UBND xã an gĭt, aơ lah nău n’hao êng săk bah n’gâng kan ta ntŭk, nkre njêng ntŭk nsing năl săk ntơ lư đŏng, n’hao rnoh khlay ndơ geh ƀư, pơk hvi ntŭk tăch rgâl n’hanh rƀŏng tât hun hao jŏ jong.

“Lôch lễ hội dja, n’gâng kan ta ntŭk mbra ntrôl dăng tay rgâl mbrô, nkơnh n’hơ ndơ geh ƀư sầu riêng ta ăp ntŭk ndranh tăch điện tử. Ntơm bah aơ ntô lĭr ndơ geh ƀư bah xã hŏ năl dơi nău khlay n’hanh ƀon lan kan lŏ lir rhơn nđơr tuch tăm đăp mpăn săk kah, hun hao sầu riêng du trong jŏ jong”.

Xã Ea Knuếc aƀaơ lah ngoăy tâm ăp nkual tăm sầu riêng dŭt têh n’gor Dak Lak đah bơi 6.000 ha; tâm nê rlău 2.800 ha dôl an klêh play, rnoh âk geh nchroh rlău 70.000 tấn, lĕ rngôch rnoh khlay nklăp 4.000 rmen prăk. Ntrŏng sầu riêng lah tơm tăm tơm, n’gâng kan ta ntŭk rgum rdâk njêng mã mbrô nkual tăm, ntŭk nklâm tâl, ƀoi tơm luh, hun hao hợp tác xã n’hanh tâm nkrêp kan nsum, tăch ndơ geh ƀư.