Rnăk yuh H’Unh Hmok ta buôn Tul A, xã Ea Wer, n’gor Dak Lak mpeh rnăk ach o. Nău rêh jêr jŏt ƀư nău rvê an oh kon hăn nti ăp năm nti mhe lah nău mô dơh đêt. Âk năm rlău aơ, nai ntĭm Nhih nti Tiểu học Nguyễn Du way uănh khlay, rgŏ jă n’hanh ntop kơl rnăk ăp ndơ dŏng khlay gay kon yuh H’Unh kơt nti tay.

“Dơi nai ntĭm uănh khlay ntop kơl, rgŏ jă bol nău rêh jêr jŏt rvê an oh kon he hăn nti đŏng. Mon mô geh mâng nchih, mô geh siƀŭt mô lah mô geh siƀŭt nchih nê nơh ri he mbơh đah nai ntĭm nti. Moh ndơ geh ri nai ntĭm kơl he ndơ nê.”

Nhih nti Tiểu học Nguyễn Du, xã Ea Wer, n’gor Dak Lak geh rlău 85% kon se nti lah nuĭh rnoi mpôl đê̆, tâm nê âk kon se nti geh nău rêh jêr jŏt. Gay mât kơn rnoh nuĭh hăn nti, nhih nti ntrŏng ân rƀah gĭt nău rêh tĭng rnăk wâl n’hanh lor nchrăp rgŏ jă kon se nti hăn tât jrô nti. Nai ntĭm H’Thong Thíp mbơh lư, ntơm bah bôk khay 8, ndrel đah nău bah mạng xã hội Zalo, Facebook, nai ntĭm hôm hăn tât tĭng jay, lơn lah ăp rnăk jêr tât đah nău lư, gay rgŏ jă me bơ̆ njŭn kon hăn tât nhih nti đŏng.

“Bol hŏ mbơh ta ăp ntŭk pơk uănh kơt Zalo, Facebook, yơn lơn âk ta aơ lah ƀon lan rnoi mpôl đê̆ jêng me bơ̆ đêt uănh khlay. Ăp rnăk mô dơi tât đah nău lư ta mạng, nai ntĭm rnoi mpôl đê̆ ta ntŭk mbra hăn tât tĭng jay rgŏ jă me bơ̆ ndơ̆ hồ sơ, nkre mbơh mông nar, ntŭk gay ăp kon se hăn tât nhih nti.”

Njŭn kon se tât nhih nti hŏ jêr hôm, gay ăp kon se đăp mpăn kơt nti ân geh tay nău ntop kơl mpeh siƀŭt, kho ao n’hanh ndơ dŏng kơt nti đŏng. Yor kơt nê̆, ăp nai ntĭm ta Dak Lak way rgŏ jă ăp mpôl kan, ăp nuĭh nsum ti ntop kơl kon se nti geh nău rêh jêr jŏt. Nơm geh kơt nê, âk nhih nti ta nkual jru, nkual ngai, nkual jêr jŏt hôm mât 100% kon se nti tĭng rnoh di n’hanh mô geh kon se nti ntlơi nti.

Nai ntĭm Đỗ Thị Xuân, Hiệu trưởng Nhih nti Tiểu học Nguyễn Du (xã Ea Wer), nkoch, bah năp năm nti mhe, âk nklâm ndơ dơi ndơ̆ tay tât ăp kon se nti geh nău rêh jêr jŏt, ntop tay suan ntrôl gay ăp kon se nti hăn jrô nti.

“Hŏ geh bar mpôl sĭt ntop kơl an nhih nti. Bôk năp lah rgum siƀŭt, ndơ dŏng nti đah ăp kon se ma rnăk ach o n’hanh ăp kon se geh nău rêh jêr jŏt. N’hanh ntơm lăp tâm năm nti mhe ri nhih nti hŏ kuăl jă dơi ăp mpôl hăn kơl êng hŏ kơl an nhih nti lah 170 blah kho ao, katap siƀŭt an ăp kon se nti mpeh rnăk ach o mô lah jêr jŏt.”

Năm nti 2026-2027, Nhih nti Phổ thông nội trú Tiểu học – Trung học cơ sở Buôn Đôn, n’gor Dak Lak lăp tâm năm nti bôk năp tĭng trong ntĭt leo nhih nti nội trú rep gưl, đah rlău 40 jrô nti n’hanh rlău 1.100 kon se nti. Bol drăp ndơ dơi ntuh kơl têh hvi, du đêt kon se nti jrô 1 tât jrô 3 ta buôn Drang Phôk hôm mâp âk jêr jŏt rnôk hăn tât nhih nti mhe, yor tâm ƀah bah jay tât nhih nti ntơm bah 15 tât rlău 20 km. Wa Thái Văn Lộc, Hiệu trưởng nhih nti, jêng I ngăn, ntơm bah nău dăn đă bah ăp me bơ̆ kon se nti, nhih nti dôl dăn đă trong ntop kơl ndeh njŭn wơt kon se nti.

“Nhih nti hŏ nsŏng kơl UBND xã nsŏng kơl đah n’gor dăn ntop kơl prăk dŏng ƀư gay geh bôk ndeh njŭn wơt ăp kon se: ôi hăn bah buôn Drang Phôk n’hanh kêng măng wơt sĭt bah nhih nti phổ thông nội trú, gay ăp kon se dơi kơt nti, tiăr nti ta ntŭk kơt nti dŭt đăp mpăn, têh uĕh, ăp tŏng ndơ dŏng n’hanh geh ăp tŏng nuĭh kan gay mât chăm ăp kon se uĕh lơn."

Ăp nău nkoch ta ăp nhih nti ta nkual jêr jŏt an saơ, mpêr n’gar nking kol tât nhih nti mô dơn gay nta trong dơh wăng sa ma hôm ta njăr trong ƀah ngai, nău dơi tât đah nău lư n’hanh nău geh ndơ bah ăp rnăk wâl đŏng. Yor kơt nê̆, nchrăp an năm nti mhe ân ntơm bah nău năl di tĭng jêr jŏt gay geh trong nkra tâm di.

Wa Lương Nguyễn Minh Triết, Ủy viên Trung ương Đảng, Bí thư Tỉnh ủy Dak Lak đă ăp n’gâng kan tâm dâng đăp mpăn ăp tŏng nău lư, nai ntĭm, siƀŭt giáo khoa n’hanh ăp ndơ geh kơt nti, lơn lah ta nkual jru, nkual ngai, nkual rnoi mpôl đê̆, n’har bri.

“Đăp mpăn ăp tŏng drăp ndơ dŏng, nhih nti, siƀŭt giáo khoa, ndơ năp dŏng ntĭm nti n’hanh ăp ndơ geh khlay dŏng an năm nti mhe. Ra uănh tay, uănh năl tay săk blău ntĭm n’hanh nti; geh trong nkra ngăn ngăn gay n’hao săk blău ntĭm nti nkual rnoi mpôl đê̆, nkual jru, nkual ngai, nkual n’har bri; ntruch bah tâm ƀah lĭn lơ đah ăp nkual; hŭch bah kon se ntlơi nti, hăn tât mô geh kon se ntlơi nti tă bah nău rêh jêr jŏt”.

Ntơm bah du mblâm siƀŭt nchih, kho ao tât ndeh rklư njŭn wơt, ăp ndơ năp dŏng dôl kơl kon se nti nkual jêr jŏt Dak Lak ntop geh tay trong hăn tât nhih nti. Bah kơi nău nchrăp an du năm nti mhe mô dơn lah ăp nhih nti dơi nkra têh uĕh tay, ma hôm lah nău nsrôih mô geh du hê kon se ntlơi nti tă bah rnăk wâl jêr jŏt mô lah trong hăn nti jong ngai.