Lăp năm nti mhe, n’gor Dak Lak nchrăp hŭch 51% ntŭk ntĭm nti lôch dăp rgum tay lam ăp nhih nti, jrô nti ta n’gor. Trong ƀư dja dơi Ban Thường vụ Tỉnh ủy Dak Lak an nău rgop ta Tâm nchră tâl 27. Tĭng nê, rnoh nhih nti mầm non hŭch ntơm bah 356 jŭr hôm 150 nhih nti; tiểu học ntơm bah 450 hŭch hôm 134 nhih nti; THCS ntơm bah 284 hŭch hôm 92 nhih nti. Tâm rnôk nê, trong leo ƀư nhih nti rep gưl tiểu học - THCS hao ntơm bah 63 hao tât 159 nhih nti. Ta gưl THPT, rnoh nhih nti nchrăp hŭch 10 nhih nti, jŭr hôm 68 nhih nti. Mpeh ntĭm nti nău kan- ntĭm nti way mbro dơi dăp rgum ntơm bah 24 jŭr hôm 5 ntŭk rgum ntĭm nti nău kan- ntĭm nti way mbro n’hanh 4 nhih nti trung học nghề. Tĭng Bí thư Tỉnh ủy Dak Lak Lương Nguyễn Minh Triết, nău dăp rgum, n’glăp nhih nti mô khuch tât kon se nti.

“Ntơm nơh hiệu trưởng dơn mât bôk 1 nhih nti dơm, aƀaơ geh 5 ntŭk nhih nti geh 5 phân hiệu ri hŭch mông ntĭm ta ăp nhih nti mhâm ƀư gay nkra bah nău mô tŏng nai ntĭm. Nai ntĭm mbra hăn tât ăp phân hiệu tâm ndrel du nhih nti bah 1 xã ri ân tâm pă mhâm ƀư an tâm di, ri nău dja lah nău dơi kan, tâm pă gưl n’hanh nău dơi blău mât bôk kan bah hiệu trưởng”.

Lăp tâm năm nti mhe, n’gor Lâm Đồng huch hôm 825 ntŭk ngih săm ƀŭt ntĭm nti. Nau kan ƀư rjăp tay ntrong kan ntĭm nti kŏ geh ƀư ân tâm di ma rnoh nŭih, nkuăl neh gŭ ndrel nau ŭch mât njrăng mhe. Nau kan rgum dăp ntŭk kan ntĭm nti mầm non, phổ thông, ntĭm nti ƀa ƀơ bah ngih dak tâm n’gor Lâm Đồng ndơn geh nau kơl an âk ngăn bah rmôt cán bộ mât kan. Nai ntĭm Phạm Thị Ngọc Bích, Hiệu trưởng Ngih săm ƀŭt mầm non Đạ Tông, xã jêr ngăn bah Đam Rông 4, mbơh, Ban giám hiệu ndrel nai ntĭm tâm ngih săm ƀŭt hŏ tâm ban đah nau tâm rnglăp ngih săm ƀŭt Mầm non Đạ Tông ndrel Ngih săm ƀŭt Mầm non Đạ Long:

 “Nau ntrŭnh tâm rnglăp uănh nsum nau mĭn bah rmôt kan kŏ kơt lah êng săk gâp ri nau kan dăp rgum ntơm Hiệu trưởng jêng ƀư Groi Hiệu trưởng mô lah jur ƀư nau ntĭm nti kon se dơm dam ri hôm nsôih đăp mpăn pah kan nâm ơm, mô geh nau ôh. Ntơm rnôk mhe lôch nti ndrel hăn ntĭm kon se ta aơ ri ma rnoh tâm dăch dơh kŏ kơt lah nau ŭch rŏng ân kon se âk ngăn. Ndri ma nau kan nơm ƀư kan prêh mô lah moh nau kan êng êng ri mô geh nau khuch ơm. Kŏ lah nau kan kơl an mât chăm, ntĭm nti ân kon se mầm non dơm”.

Năm nti 2026-2027 dôl dăch tât. Tâm âk rnoh prăk dŏng an oh kon hăn nti bah năp nar lăp năm nti mhe, siƀŭt giáo khoa mbra mô di lah rnoh prăk dŭt têh. Ndrĭ yơn, đah ăp rnăk nsĭt geh wăng sa đêt, âk kon hăn nti mô lah geh nău rêh jêr jŏt, aơ hôm lah du rnoh prăk dŏng âk đŏng. Yor kơt nê̆, dăn đă bah UBND n’gor Gia Lai mpeh trong nchrăp tĭng ƀư trong kơl dơm siƀŭt giáo khoa an kon se nti mpeh ăp rmôt an ƀư lor ta n’gor nsĭt tay nău khlay ngăn ngăn n’hanh rŏng nuĭh. Gia Lai nchrăp geh rlău 180.000 kon se nti phổ thông mpeh săk dơi geh trong kơl, đah lĕ rngôch prăk dŏng ƀư rlău 42 rmen prăk.

Ndrel đah nău mô kâp rvê siƀŭt an oh kon se, nău rhơn dŭt têh bah kônh wa ƀon Kon Sơ Lăl, xã Ia Khươl, n’gor Gia Lai lah nhih nti mhe têh uĕh, srăch se dơi rdâk njêng dăch kêng jay. Ăp kon se nti mô hôm kâp rngeh măng dâk ơm, mô hôm lah nău rvê klach dak bŭk klôr rdu rnôk ăp khay mih phŭt rsŭn sĭt. Trong hăn tât nhih nti aƀaơ dơn roh hôm bar pe mnĭt hăn jâng dơm. Nô Wat, 38 năm deh, ƀon Kon Sơ Lăl, xã Ia Khươl, nkoch:

“Rnôk hôm ta ƀon ơm, mpôl hên ân hăn nti ơm bah 5 mông ôi ri mơ năn mông nti. Aƀaơ nhih nti dăch kêng ƀon, dŭt dơh ngăch. Bol hôm jêr jŏt, yơn mbra nsrôih mât chăm an bar hê kon hăn nti. Năm nti mhe dja, rvăt an ăp kon kho ao mhe, katap mhe, siƀŭt nchih mhe ăp tŏng gay hăn nti, gay oh kon gĭt nchih, mpŏng nău rêh khân păng jêh aơ tay bah ir krit jêr lơn. Lah uĕh Đảng, Ngih dak hŏ uănh khlay an mpôl hên ăp ntil”.

 N’gâng kan ntĭm nti n’gor Lâm Đồng ho ƀư jêh ueh đŏng nau nchrăp gay bar ngih săm ƀŭt Phổ thông nội trú rep gưl Tiểu học ndrel THCS xã Quảng trực ndrel xã Thuận An ntơm geh lăp nti tâm năm nti bôk năm 2026-2027. Bar ngih săm ƀŭt mhe săch 60 jrâu, đah 1.770 kon se nti, ntơm jrâu 1 tât 9. Tâm nê, Ngih săm ƀŭt Phổ thông nội trú rep gưl Tiểu học ndrel THCS Thuận An săch 30 jrâu, đah 870 kon se nti; Ngihs ăm ƀŭt PT Nội trú rep gưl Tiểu học ndrel THCS Quảng Trực săch geh 30 jrâu, đah 900 kon se nti. Bar ngihs ăm ƀŭt lăp kan tâm năm nti 2026-2027 rgop nau pơk trong nơih gay kon se tâm nkuăl jru, ngăn lah kon se rnoi mpôl đê̆ geh ntĭm nti ndrel rêh jêng tâm ntŭk đăp mpăn, nơih ueh lơn. Bah nê, ăp nau kan mô knŭng rgop nau n’hao nau nâp ntĭm nti ma ăp nhoat ƀư jêh trong kan ntĭm nti khlay, pơk nau dơi hun hao nâp nâl tâm nkuăl n’har bri bah n’gor.

UBND n’gor Dak Lak n’gluh an dŏng trong nchrăp mpeh ƀư Lễ khai giảng năm nti 2026 - 2027 n’hanh ƀư sa nkra ăp nhih nti phổ thông nội trú rep gưl ta ăp xã n’har bri ta n’gor Dak Lak. Tĭng trong nchrăp, Lễ khai giảng năm nti 2026 - 2027 mbra dơi ƀư du rơh tâm ôi 5/9/2026. Tâm nê, n’gor ƀư Lễ sa nkra ăp nhih nti phổ thông nội trú rep gưl ta ăp xã Buôn Đôn, Ia Lốp, Ia Rvê n’hanh Ea Rốk. Bôk ƀoh tơm bah n’gor dơi n’gân ƀư ta Nhih nti Phổ thông nội trú Tiểu học n’hanh THCS Buôn Đôn, pơk ƀoh na nê̆ đah ăp bôk tơm ta Nhih nti Phổ thông nội trú Mường Khương, xã Mường Khương, n’gor Lào Cai. Nău ƀư Lễ khai giảng n’hanh sa nkra ăp nhih nti phổ thông nội trú rep gưl gay njêng nuih n’hâm rhơn nđơr, rêng an rmôt nai ntĭm, cán bộ mât bôk ntĭm n’hanh nti lăp tâm năm nti mhe.