Ăp rơh khay 8, nău ơm kăl sĭt du yan djiang kăl e plơ̆ tay tâm ăp nuĭh tă hăn rlău tâm lơh tâm su. Đah nuĭh krŭng chính trị ơm Đinh Kim Anh, ta phường Ea Kao, n’gor Dak Lak, nău khlay bah đăp mpăn, dah rŏng dơi rgâl đah ăp năm khay druh ndăm n’hanh n’ăp mham bah mpôl băl. Năm 1972, jêh rnôk wăk mìn tâm du rơh hăn wơt ntŭk cách mạng, wa geh sôt săk mbăn n’hanh lăp tâm ty rlăng. Rlău 2 năm rlău âk jay ndrung krŭng, wa geh âk nău lơh mbram hô yơn mô mbơh du ntil nău, yor bah kơi wa hôm âk ntŭk cách mạng dơi geh saơ. Nău kơl wa Đinh Kim Anh rlet rlău ăp năm khay nĕ, kơl wa mât nâp nău khlay bah đăp mpăn, dah rŏng-ăp nău Kruanh Hồ Chí Minh lĕ mĭn lah tâm samƀŭt Răk mbơh Đăp mpăn, pơk luh dak Việt Nam Dân chủ Cộng hòa. “Mô geh nău khlay lơn đăp mpăn dah rŏng, Wa lah hôm. Nău nĕ khlay dŭt n’hâm. Yor nê tâm nău rêh gâp gĭt nău njê ngăn, mô tŏng bôh, mô tŏng phe, sa bum blang mro, yơn hôm nsing nơm cách mạng lôch ueh. Nău nĕ lah dŭt ueh”.

Nău nsing nơm nĕ mô knŭng kơl ăp nuĭh tahen dâk nâp tâm ngih krŭng, ma hôm ntrŭt ntrôl âk rơh druh ndăm săch hăn trong rnôk neh dak hôm e tâm lơh tâm su.

Năm 17 năm, bu ndăm Bùi Ngọc Thảo ta Diễn Châu, Nghệ An hăn lăp tahen, jêng tahen Đặc Công dak n’hanh lăp ntŭk tâm lơh miền Trung. Geh ăp mpôl băl mô plơ̆ sĭt, geh ăp rơh tâm lơh hoach hô ngăn, yơn tâm bôk rngok nuĭh tahen mom rnôk nĕ hôm e ŭch rklaih đăp mpăn ƀon tơm, kơp dơn ngoăy neh dak.

81 năm bah kơi Cách mạng khay 8, neh dak lĕ lăp hăn du trong lĕ rngôch êng jêh. Bah du dak ach o, rluk mâl, Việt Nam lĕ ndâk njêng tâm boh tâm rnglăp bah dih đah bơi 200 dak, nkual neh, râng jru tâm ăp boăt nthoi wăng sa n’hanh trong nkra njêng lam ntŭr neh, ntơm mĭn lah jâng nsan bah du trong wăng sa ngăch tâm nkual.

Lah rơh bah năp an njrăng n’gang gay dơi dơi đăp mpăn, ntrŭnh êng nău rêh rnoi nuĭh, ri nar aơ, mpŏng ŭch nĕ dơi nthoi tay tâm du nău kan mhe: ndâk njêng du Việt Nam đăp mpăn, têh ndrŏng êng, geh dơi gay rgum lăp n’hanh tâm rlong ta du ntŭr neh âk nău rgâl.

Uănh tay trong hăn nĕ, wa Bùi Ngọc Thảo, aƀaơ rêh ta phường Buôn Ma Thuột, n’gor Dak Lak, an lah ăp nău khlay bah cách mạng Khay 8 hôm e lah n’gâng tơm gay neh dak hăn lăp lvang hun hao mhe. "Kơt nău đồng chí Tổng Bí thư Tô Lâm, he lăp rơh hao êng săk nơm bah rnoi nuĭh, jêng du soan têh dăng bah n’gâng tơm nău way ơm Cách mạng Việt Nam. Bah nău way ơm geh ngoăy aơ dơm gay he mpăr prêh ngai”.

Đah rơh druh ndăm nar aơ, nău nti bah yan djang năm 1945 mô knŭng geh tâm plơk samƀŭt. Ta Dak Lak, N’gor đoàn mĭn lah ntĭm nti way ơm an kơl druh ndăm wât nău khlay bah đăp mpăn, ryơk nău geh ma u che lĕ rgâl đah nting mham n’hanh khlay lơn lah rgâl nău ntô̆ n’hao jêng nău kan ngăn.

Trong ƀư dơi rgâl mhe tĭng trong dăch dêh đah druh ndăm lơn, bah mạng xã hội, video glêh, podcast tât ăp nău ƀư sĭt tu tơm, mâp nuĭh saơ lịch sử n’hanh ƀư ngăn n’hêl na nê̆. Nău rƀŏng mô knŭng gay nuĭh druh ndăm gĭt đah lịch sử, ma gay bah lịch sử jêng nău wât lĕ đah nău kan đah aƀaơ n’hanh rgŏ năp. Nô Nguyễn Thao Giang, Groi Bí thư N’gor đoàn Dak Lak nkoch: “Nău khlay ngăn tĭng lịch sử đah nău rêh aƀaơ bah druh ndăm. An kơl băl mom dơi wât, nău khlay bah đâp mpăn nar aơ dơi ntĭm nti wât lĕ đah nău kan n’hanh nsum mpôl, nuih n’hâm tâm rnglăp, văn hóa tâm uănh ta ntŭk mạng. Bah nău roh nting n’hâm bah ăp rơh hăn lor dơi rdâk hao nuih n’hâm ŭch êng, nsơr soan, lĕ đah nău kan n’hanh kon nuĭh n’hanh đah nsum mpôl”.

Du rơh geh du trong êng gay nthoi tay nuih n’hâm bah yan djang đăp mpăn. Lah rơh nô che lĕ sŏk nuih n’hâm rŏng dak, nuih n’hâm n’hanh nău roh gay sŏk tay đăp mpăn, ri rơh druh ndăm nar aơ an rgâl ăp nău khlay nĕ jêng soan dăng ndâk njêng neh dak: đah bôk rngok gay ƀư tơm nău rêh rgŏ năp, đah nău mĭn mhe gay jêng ăp nău khlay mhe, đah nĕ nău kan gay mât njrăng săk rnglăy bah ăp rơh hăn lor bah năp.

Nĕ lah trong nuih n’hâm Cách mạng Khay 8 rêh tay tâm rnôk aƀaơ, mô knŭng tâm ăp plơk samƀŭt nkah tay ăp khay 8, tâm nău kan, mpŏng ŭch n’hanh ăp nău rgop na nê̆ bah ăp nuĭh Việt Nam nar aơ.