Bah aƀaơ 81 năm, bah ăp nar khay Pham duh nuih n'hâm cách mạng, hang rkeh nuĭh ƀon lan Việt Nam hŏ dâk lơh sŏk n'gâng kan. Knŭng tâm du pơh đêt, n'gâng kan ta âk ntŭk tĭng kơn sĭt tơm nuĭh ƀon lan. Nar 19 khay 8 năm 1945, rơh ntơm lơh sŏk n'gâng kan ta Hà Nội geh nău dơi. Nău aơ njêng suan ntrôl dăng an rơh tâm lơh lam dak.

 Ntơm bah Hà Nội, nuih n'hâm cách mạng rêng ngăch. Huế sŏk nău ƀư tơm nar 23 khay 8. Sài Gòn n'hanh âk n'gor, nkual ƀon têh ta Nam Bộ sŏk nău ƀư tơm nar 25 khay 8. Lam rnoi nuĭh ndrel rƀŏng tât du nău rƀŏng: n'glêh dŭt nău mât bôk kan bah thực dân, phong kiến, sŏk tay nău ƀư tơm neh dak.

  Rơh Tổng khởi nghĩa Khay Pham năm 1945 hŏ ƀư jêng du njuat hăn têh kuâng. Bah nău rêh bah du rnoi nuĭh roh dơm, nuĭh ƀon lan Việt Nam jêng nuĭh ƀư tơm neh dak, ƀư tơm nău rêh bah he. Cách mạng Khay Pham pơk luh du rach năm mhe - rach năm đăp mpăn rnoi nuĭh. Yơn nău dơi bah Cách mạng Khay Pham mhe knŭng lah njuat hăn bôk năp. Du Ngih dak đăp mpăn ân dơi mbơh ta năp ƀon lan n'hanh lam ntŭr neh. N'hanh nar 2 khay 9 năm 1945, hŏ jêng rnôk lịch sử nê.

Ta Quảng trường Ba Đình, ta nklang mpôl nuĭh n'hanh bri cờ gŭr mănh êr, Kruanh Hồ Chí Minh ndơn măt Chính phủ lâm thời răk bản Tuyên ngôn Độc lập. Ăp nău ngơi nê mô dơn mbơh đah lam ntŭr neh mpeh nău ntoh luh bah du Ngih dak Việt Nam dah rŏng. Nê hôm lah nău lah rjăp mpeh nău dơi rêh, nău dơi dah rŏng n'hanh nău dơi ƀư tơm nău rêh bah du rnoi nuĭh. Tâm Tuyên ngôn Độc lập, Kruanh Hồ Chí Minh lah rjăp: "Dak Việt Nam geh nău dơi dah rŏng n'hanh dah rŏng đăp mpăn" n'hanh lĕ rngôch rnoi nuĭh Việt Nam n'glêh an dŏng lĕ rngôch nuih n'hâm, suan dăng, nău rêh n'hanh drăp ndơ gay mât nâp nău dơi dah rŏng, dah rŏng đăp mpăn nê.