Tĭng nê, n’gor Gia Lai an ntuh kơl rdâk njêng lor, nkra têh uĕh tay n’hanh rvăt năp ndơ ntrŭp dŏng an 24 nhih dak si xã mpeh nkual n’har bri, nkual jêr jŏt. Ăp gâl kan lĕ ma pơk hvi rot jay mât bôk kan, mon mhe nkual nchroh rup gui, uănh năl mham, siêu âm, kơl ngăch bôk năp, trong n’hoch dak djơh nhih dak si n’hanh ăp ndơ ntop dŏng tâm trôm. Lĕ rngôch prăk dŏng ƀư nchrăp an bôk nău kan dja nklăp 288 rmen prăk. 

Ndrel đah ntuh kơl drăp ndơ, n’gor Gia Lai dăn trong kơl but săm dơm nău ji an nuĭh ƀon lan ta 12 xã n’har bri, gôl dak n’hanh jêr jŏt mha êng đŏng. Nuĭh dơi but săm lah nuĭh rnoi mpôl đê̆, nuĭh âk năm deh, nuĭh geh n’hâm suan đah neh dak, nuĭh mpeh săk ntop kơl lam rêh jêng kon nuĭh, rnăk ach o, dăch kêng ach o, bu ur tâm năm deh nse n’hanh kon se bah dâng 6 năm deh. Nău but săm n’hâm suan mbra nkre đah rdâk njêng hồ sơ n’hâm suan điện tử, mbơh nti, năl saơ ơm kop ji n’hanh n’hao săm nhih dak si bah lơ lah geh nău khlay.

Nkre, HĐND n’gor Gia Lai dôl rdâk njêng nghị quyết mhe mpeh trong kơl wăch rgum kơl dơh đah bác sĩ, dược sĩ ta ntŭk. Trong kơl dja rƀŏng tât rmôt nuĭh kan dak si pah kan ta ăp nhih dak si, ntŭk rgum kan dak si, nhih dak si nkual rnoi mpôl đê̆, mpeh yôk yang, xã n’har bri, xã gôl dak n’hanh ăp ntŭk kan dak si êng ƀa ƀă bah n’gor.

Lor rnôk geh trong kơl mhe, n’gor tĭng ƀư trong nchrăp n’hao âk bác sỹ sĭt xã. Wa Nguyễn Thị Thanh Lịch, Groi kruanh UBND n’gor Gia Lai an gĭt:

“N’gor n’gluh an dŏng dŭt âk trong kơl mpeh wăch rgum yơn dŭt đêt bác sĩ ŭch sĭt. Aƀaơ, rnoh kơl wăch rgum tơm nuĭh kan dŭt âk bah mpôl hên lah 600 rkeh prăk an du bác sĩ n’hanh ntop kơl prăk manh jay gŭ. Mpôl hên hŏ ƀư trong nchrăp gay rgum đă, tâm pleh bác sỹ jŭr xã pah kan đŏng."

Aƀaơ lam n’gor Gia Lai geh 135 nhih dak si xã đah 369 ntŭk nhih dak si, rhŏ dŏng an rnoh âk nuĭh rlău 26.800 nuĭh/nhih dak si. Yơn lah, tơm bác sĩ tâm pă mô hŏ tâm ban. N’gor hôm 76 ntŭk nhih dak si mô hŏ geh bác sĩ pah kan. Tĭng trong nchrăp, tâm năm aơ n’gor Gia Lai tâm pleh 38 bác sĩ bah ăp nhih dak si, ntŭk rgum kan dak si n’hanh ntŭk but săm ji sĭt ntop kơl 30 xã, phường geh nău ŭch an ƀư lor.

Trong nchrăp n’hao âk bác sỹ sĭt tâm dâng pah kan bah n’gor Gia Lai tĭng ƀư ntơm bah năm 2026 tât năm 2030. Ăp bác sỹ sĭt pah kan ta xã dŭt đêt jŏ 6 khay n’hanh dŭt âk jŏ 12 khay, mbra ƀư tĭng âk rơh yơn ân đăp mpăn tŏng lĕ rngôch nar khay tĭng nău way an. Nsing lôch geh an ƀư n’hanh nô nău sơch geh tơm nuĭh kan dak si, Sở Y tế mbra nsŏng kơl UBND n’gor Gia Lai n’glêh an rnoh âk bác sĩ n’hanh ntŭk kan an tĭng ƀư dơi ntop kơl tâm ăp năm bah kơi tay.