Tâm ntŭk ƀư nau kan bah nkuăl Công nghiệp Hoà Tâm ndrel ndâm Bãi Gốc, n’gor Dak Lak, âk jêt bôk ndeh rdeng têh, ndeh chuah ndrel âk bôk ndeh êng dôl ma uih ngăn neh, pơk trong ƀư kan, jêh nau kan ntrơn leo gay ma pă neh kan, ntŭk kan công nghiệp Hoà Tâm hŏ jêh, ân manh rlau 215 ha neh. Wa Đỗ Văn Khánh, Groi Giám đốc Công ty Cổ phần ntuh kơl ndrel Hun hao ntŭk ƀư nau kan công nghiệp Hoà Tâm mbơh, êng ndrâm Bãi Gốc, dĭng lĕ 64,9 ha neh geh jao, pơk nau ueh gay nau kan geh ƀư ăp ntil ndơ tâm khay 9 tât:

“Đồng chí Kruanh n’gor kŏ kơt lah ăp rđau kan bah Uỷ ban n’gor kŏ ndâk jêh du rmôt ƀư nau kan ngăch ndal, dŏng ân nau kan ntrơn leo ntŭk gay pă neh kan kơt lah mhe nơh kŏ nsôih âk ngăn. Ton tâm bôk khay 9 mra geh ntrŭnh, đăp mpăn tŏng nau dơi mpeh pháp lý ndrel ntŭk ntu geh tơm ntuh kơl gay ma ntơm leo ƀư nau kan ngăn”.

Du ntŭk kan ntơm geh nchuăt đah máy kŏ lah rnôk ma tơm prăk dơi geh lăp tâm jâng văng sa. Aơ mơ lah mânh veh khlay ngăn rnôk ăp nkuăl ndŏ luh nau hun hao bar rnoh mrô. Tâm rơh rƀŭn ntơm ƀư nau ntuh kơl năm 2026, Gia Lai geh tơm prăk đăng ký ndrel nchrăp geh nklăp 850 rbăn rmen ntơm bah 273 nau kan.

Hôm tâm n’gir Dak lak kŏ pă nau ntrŭnh ndơn nau ntrŭnh ntuh kơl ân 25 nau kan, rnoh prăk lau 40 rbăn rmen. Ăp rnoh mrô aơ kŏ ân saơ n’hâm leo lăp ƀư nau kan bah ntŭk hun hao mhe. Yơn tơm prăk đăng ký ndrel ton ri mhe knŭng lah pơk bôk ƀư; nau khlay lơn đŏng nê lah njêng ăp nau ton nê ân jêng nau kan ngăn ngên. Kruanh UBND n’gor Dak Lak Đỗ Hữu Huy, mbơh, n’gor hŏ ndâk rmôt ƀư kan mêt uănh, kơl an bư ăp nau kan jêh rnôk leo ntuh kơl:

‘Ân geh ndal lơn ƀư ân jêh ăp nau nchrăp ntrŭnh ƀư ăp nau ntrŭnh mpeh ntuh kơl, săm ƀŭt kơp dơn ntuh kơl ndrel dĭng lĕ ăp nau nchih nkah tâm boh hŏ geh pă mbơh tâm rơh rƀŭn. Rmôt ƀư nau kan mêt uănh lŏ ntrŭnh nkre tơm prăk gay ƀư nau kan tâm rnôk nau ntrŭnh geh ndâk. Tâm pă kloh nŭih, kloh nau kan, kloh nau ngăch, kloh nau ƀư ndrel kloh ăp nau kan ân tât nar bôk nau kan geh ƀư ngăn ngên. Mô ân tơm ntuh kơl ƀư êng du hê lôch nau ndâk nau kan nê”.

Yơn lah, leo tơm prăk lăp tâm nau kan nê ê geh di lah nau kan dăch dŭt. Nau hun hao hôm nsing tâm nau geh dơi dŏng ndrel rnoh dŏng ân tam bah tơm prăk. Du nau kan bol ma prăk âk, yơn mô tŏng neh kan, mô tŏng nau ƀư, ndơ dŏng mô lah ntŭk ntu ƀư kan ri ê geh dơi njêng jêng nau khlay geh.

Ndri ma, ndrel ma nau rgum ntuh kơl, ăp nkuăl ân ƀư rhuăt gleh nau kan, ntơm bah nau ntrŭnh tât ntŭk ƀư, ntơm bah ntŭk ƀư tât ntŭk ê nkra ndrel leo tăch. Tĭng Groi kruanh UBND n’gor Lâm Đồng Nguyễn Ngọc Phúc, ăp tơm ntuh kơl ân geh nau tâm nthoi đah ăp ntrong tâm boh n’hêl:

‘Lâm Đồng geh âk nau dăng mpeh nau kan tuch tăm prêh mhe, nau ê nkra ndơ tuch tăm, ŭnh nar kloh. Nau kan khlay lah nơm ân nthoi ăp tu tơm kan gay njêng jêng ăp nau kan tâm boh n’hêl, njêng luh ăp ntil ndơ mhe, nau kan prêh mhe, nau kan ê nkra mhe, leo tât ăp rnoh geh ngăn ngên ân ƀon lan, ntŭk kan tăch rgâl ndrel jâng văng sa bah n’gor hun hao bar rnoh mrô, n’hao rnoh geh ntulr rlong bah gưl n’gor”.

Kơt nê, nau nkoch mbơh mpeh nau rgum ntuh kơl mô hôm lah nau nkoch mbơh mpeh tơm prăk, ma lah săch tơm prăk ân tâm di trong, njêng nau geh hao khlay ndrel rêng nuih n’hâm kan. Tâm Khánh Hoà, jêh rnôk tâm rnglăp ma Ninh thuận, n’gor geh trong dak lêng bơi tât 500 km, ndrel trong ndrâm dak ndrel ăp ntŭk kan logistics geh rgum ƀư.

Wa Trương Văn Tiến, Giám đốc ntŭk ƀư nau kan ntuh kơl, tăch rgâl ndrel pâl n’aih Khánh Hoà ân lah, nau kan mbơh luh lah nthoi dơi ăp ntŭk ntu ƀư kan aơ đah ăp ndoh ndơ bah TâyNguyên ndrel Nam Trung Bộ:

‘Mhâm ƀư ân geh dŏng dơi ân săk tam ngăn ăp ndrâm dak lêng bah ăp nau kan tâm nthoi ma ăp nkuăl geh ndoh ndơ tam mpeh ba lơ Tây Nguyên. Mhâm ƀư gay jă ăp tơm ntuh kơl leo pă ăp ndoh ndơ nchuăn rdeng, logistics, njêng luh ăp nau dơi ueh ngăn ân ăp ntŭk ƀư nau kan tăch rgâl. Tă bah nê, njêng jêng ntŭk ƀư nau kan nchuăn rdeng ndoh ndơ geh nau dăng têh ngăn’.

Đah Tây Nguyên-Duyên hải Nam Trung Bộ, ndâk tơm prăk kơt nê mô êng lah nau nkoch mpeh nau rgum ntuh kơl. Nê lah nau đă njêng nau ntrŭnh, tơm prăk jêng nau dăng dơi gay hun hao, njêng nau dăng dơi jêng nau kan, jêng ntil ndơ geh, jêng prăk ndrel n’hâm ntul rlong bah jâng văng sa. Ndrel nê kŏ lah nau ma cử tri ŭch geh dơi saơ jêh ăp nau ntrŭnh: Ntrong ƀư ân geh hăn lăp tâm nau rêh, tu tơm kan ân geh n’hong hoch, gay nau jêng jêng hun hao ngăn./.