Jêh rnôk nchrăp ăp ntil ndơ jê̆ n'hanh ăp mblâm katap săm ƀŭt  jê̆ uĕh âk màu, Thiếu tá Lại Văn Đạt ƀĭt ndeh leo mpôl hên hăn ta ntŭk. Gĭt oh nô hăn ndrel lah nuĭh Jarai, jêng nô tâm ngơi ma nău Jarai dâl: "Nar aơ, he sĭt khâl ƀon Ksing. Aơ lah ƀon lan hŏ krêp dêh đah năm deh gâp. Kônh wa Jarai ta aơ gŭ rêh dŭt dăch dêh n'hanh nău rŏng; bôl nău rêh bah âk rnăk wâl hôm e âk jêr jŏt".

 Deh n'hanh têh kuăng ta nkual neh aơ, Thiếu tá Lại Văn Đạt lĕ geh nău dơi mâp đah ƀon lan Jarai bah jêt. Tâm rnôk pah kan, way mâp, nkoch trêng, rgŏ jă, păng nti tay, dŏng nău ngơi Jarai âk lơn.

 Ăp tơ̆ sĭt ta ntŭk đah ƀon lan, Thiếu tá Đạt n'hanh mpôl hên hôm nha ndơ̆ ăp nklâm ndơ đŏng. Nĕ lah ăp nklâm ndơ an kon hoc geh nău rêh jêr jŏt. bâh nău rgŏ jă nuĭh bên, băl mpôl n'hanh Hội chữ thập đỏ xã, 500 mblâm katap săm ƀŭt lĕ geh pă an ăp oh ta năp năm nti mhe. Tâm nĕ, geh oh Ksor H'Yang ta ƀon Ksing kon đơi me bơ̆, oh rêh ndrel đah u Siu Got: "Săk gâp nơm dŭt ŭch mêr đah cán bộ Đạt. Nô lah du hê nuĭh dăch dêh, way nchrăp ndơ kơl ăp mon geh nău rêh jêr jŏt kơt ăp oh mon nơm tâm rnăk wâl. Ta năp khai giảng năm nti mhe, rnăk wâl ăp mon ta aơ hôm e âk jêr jŏt, yơn bâh geh nău ntop kơl ngăch bah đồng chí Đạt đah ăp bôk năp sam ƀŭt n'hanh ndơ dŏng nti, ăp mon lĕ geh tay nău nsrôih tâm nău hăn nti".

Nău uĕh bah nuĭh ƀon lan ta ntŭk đah Thiếu tá Lại Văn Đạt mô knŭng lah nklâm ndơ, ma lah nău mât uănh, dăch dêh. Năm 2021, tâm du tơ̆ hăn kan tâm rnôk nuh srê COVID-19 geh jêr jŏt, Thiếu tá Đạt ndrel mpôl kan saơ du hê bu ur bŭn dôl nchrăp deh kon. Mô kâp mĭn, nô ndrel rmôt kan ndơ̆ bu ur tât Ngih dak si xă Phú Thiện. Me bŭn deh kon đăp mpăn, Thiếu tá Đạt ntơ săk an oh bê lah Hạ Vy, đah nău ŭch "jur bah cô-vít". Amĭ Em, i u bâh  oh an gĭt, năm aơ Hạ Vy hăn nti mẫu giáo, lŏ dơi dơn nklâm ndơ bah cán bộ Đạt đŏng. "Ăp nŭih kŏ gĭt nô Đạt bah năp nơh tă rêh tâm ƀon aơ ndrel lah kon bah amĭ Biên. Ăp tŏ sĭt khâl ƀon, nô vay njôt nkre ăp  ndrôm săm ƀŭt gay ma pă ân ăp kon se. Tâm rnoh ăp kon se geh nô kơl nĕ geh nô Hạ Vy. Aơ lah nau kan ueh ngăn ndrel tâm di rnôk. Tât rnôk aơ, nô hôm ƀư âk nau kan kơl an, pă ndơ dŏng nti ân ăp kon se."

Ntơm bah ăp rơh hăn sĭt ƀon, Thiếu tá Lại Văn Đạt ndâk njêng kênh Facebook "Công an sĭt ƀon", nchih nkoch ăp rup gui cán bộ, tahen sĭt ƀon lan, nkoch bri đah kônh wa, joi gĭt nău rêh n'hanh ntop kơl nuĭh ƀon lan. Jêh bơi tât pe pơh, bơi tât 60 clip dơi nchih nkoch, wăch rgum bơi tât 9.000 nuĭh uănh. Du đêt clip geh bơi tât 500 rbăn tơ̆ uănh. Thiếu tá Lại Văn Đạt mĭn lah, rup gui nuĭh công an dôl dŭt dăch dêh đah ƀon lan, gŭ ndrel ƀon lan, ngơi nău bah ƀon lan, djăt ƀon lan n'hanh tâm pă đah ƀon lan.  "Mpôl Công an mpôl hên ri geh "6 Nău Wa Hồ ntĭm Công an ƀon lan". Tâm nê, đă mpôl hên ân way uănh khlay n'hanh rŏng nuĭh ƀon lan, dŭt n'hâm nsing nơm đah Đảng, Ngih dak; đah nuĭh ƀon lan, mpôl hên ân rŏng, uănh khlay. Aơ lah du nău na nê̆ ăp nău ntĭm nti bah Wa đŏng, tâm ban kơt ntrong leo tâm rlong "Pe nău dơn kan" bah Bộ Công an, tâm nê geh "dăch ƀon lan ngăn".

Hăn ndrel đah ntrong ƀư "Công an sĭt ƀon" lah bu ur druh Jarai Rah Lan Wĩ, ta Plei Kte Lớn A, xã Phú Thiện, n'gor Gia Lai. Lah ngoăy tâm ăp nuĭh mĭn njêng nkô̆ nău "rkeh măt nuĭh uănh" bah ƀon lan, Rah Lan Wĩ lĕ kơl Lại Văn Đạt nchih nkoch ăp rup gui ngăn, uĕh: "Nô Đạt lah nuĭh cán bộ Công an ƀon lan dŭt dăch dêh đah kônh wa gay nkoch trêng, rgŏ jă ƀon lan tĭng ƀư nău ntrŭnh, trong kơl bah Đảng n'hanh Ngih dak. Tâm trong hăn nê, nô Đạt way geh ôp gâp ăp nău ngơi Jarai gay tâm ngơi đah kônh wa uĕh lơn. ăp tơ̆ sĭt ƀon, kônh wa dŭt ŭch rŏng nô Đạt; hăn tât ntŭk, kônh wa way ƀư ndơ sông sa an nô sa ndrel đŏng. Nơm geh nău nsrôih jăp gơih nti nău ngơi Jarai jêng nô Đạt dŭt gĭt wât nău mĭn ŭch rŏng bah kônh wa".

Bâh ăp nău kan dơh, dăch bên đah ƀon lan, Thiếu tá Lại Văn Đạt n'hanh mpôl kan Công an xã Phú Thiện, n'gor Gia Lai dôl ƀư na nê̆ nău Wa Hồ ntĭm Công an ƀon lan: ryơk rnê, dăch dêh đah ƀon lan, tâm dăch dơh đah ƀon lan. Nti nău ngơi ƀon lan, sĭt đah ƀon lan, djăt n'hanh tâm pă ndrel đah ƀon lan, gay ma rup gui nuĭh tahen Công an nar lơ dăch ƀon lan, gĭt ƀon lan n'hanh yor ƀon lan kơl kan. \

Quốc Học – Siu Đoan