Nhih nti Phổ thông Nội trú Tiểu học n’hanh Trung học cơ sở Buôn Đôn n’gôr gră nchrăp năm nti lor bôk năp ta nhih nti mhe. Ăp rot jrô nti, nkual nội trú, jay sa, jay tâm rlong, ndrĭch chưng play mini… hŏ nchrăp wơt kon se nti. Đah oh H Sinh Nhị Kbuôr, kon se nti jrô 8, nău rhơn dŭt têh lah ntơm bah aơ mbra dơi gŭ nti nội trú ta ntŭk he nơm dĭl. Ntơm nơh, oh tă ŭch lăp tâm Nhih nti Phổ thông Dân tộc nội trú n’gor Dak Lak ta phường Buôn Ma Thuột, yơn trong hăn ngai rlău 60 km n’hanh rnăk wâl jêr jŏt ƀư nău ŭch rŏng nê mô hŏ jêng ngăn ngăn. Aƀaơ, nhih nti mhe hŏ nsĭt geh trong kơt nti nê tât dăch jay lơn đah oh H Sinh Nhị.

“Năm nti mhe dja, gâp lăp nti ta nhih nti nội trú rep gưl geh ký túc xá têh uĕh, ăp tŏng ndơ ntrŭp dŏng đah máy lạnh, rvah sial máy. Gâp gŭ rêh ta aơ mô hôm rvê đêt. Rlău ma nê, ăp jrô nti tơm ăp tŏng ndơ ntrŭp dŏng, âk rlău đah nhih nti ơm ntơm nơh đŏng. Gâp mbra nsrôih kơt nti jăp gơih, nsrôih tât nău ŭch jêng ngăn ngăn bu ur Công an ƀon lan.”

Đah Buôn Si Sa Núc Lào, rnoi Lào, ta buôn Trí, xã Buôn Đôn, năm aơ nti jrô 6, Nhih nti Phổ thông Nội trú Tiểu học n’hanh Trung học cơ sở Buôn Đôn, nhih nti mhe pơk luh an du ntŭk kơt nti dơh uĕh lơn, nkre nta trong dơh gay an oh tiăr nti thể thao, tĭng nău nđơr.

“Nhih nti mhe gâp lăp nti geh jay tâm rlong, geh ndrĭch chưng play jêng nti thể dục dah ma rŏng ngăn. Mpôl hên mô kâp nti ta bih dih nar duh krŭl kơt ntơm nơh. Ăp kêng măng, gâp mbra chưng play đah băl mpôl mô klach prêh ji kơt chưng ta neh dăch kêng jay. Gâp mbra jăp gơih kơt nti an uĕh. Gâp geh nău ŭch jêng cầu thủ chưng play n’hanh mbra tâm rlong gay ƀư jêng ngăn nău ŭch dja.”

Ăp nău rgâl nê êng geh nkô̆ khlay ta Buôn Đôn, ngoăy tâm 4 xã n’har bri bah n’gor Dak Lak. Xã geh bơi 6.700 nuĭh, rnoh nuĭh rnoi mpôl đê̆ âk rlău 75%. Năm nti 2026-2027, Nhih nti Phổ thông Nội trú Tiểu học n’hanh Trung học cơ sở Buôn Đôn geh 1.138 kon se nti bah jrô 1 tât jrô 9. Lĕ rngôch kon se ta nhih nti n’hanh geh trong kơl tĭng nău way an kơt siƀŭt giáo khoa, gŭ, sa, ndơ nsoh, mŭng phôi, nsưng mbêl.

Nhih nti an ƀư bôk nău kan ntĭm nti phổ thông rƀŏng tât hun hao uĕh lŏng nuih n’hâm, nău gĭt blău bah kon se nti. Đah kon se rnoi mpôl đê̆ ta ntŭk hôm âk jêr jŏt, nău ŭch dja mô dơn lah n’hao rnoh điểm ma hôm kơl ăp kon se geh tay nău blău, nău nsing nơm n’hanh nău dơi bên di đah ntŭk gŭ nti mhe.

Tĭng wa Phạm Thị Loan, Groi Hiệu trưởng nhih nti, tă bah năm lor bôk năp lăp kan, nhih nti nchrăp ăp dăp bah drăp ndơ tât rdâk njêng trong leo ƀư ntĭm nti n’hanh mât uănh kon se nti tâm di đah trong leo ƀư nội trú rep gưl.

“Đăp mpăn pah kan ntĭm n’hanh nti geh nău dơi âk, nhih nti hŏ lor nchrăp ăp kôp ăp bôk nău ntĭm nti đah ăp gưl nti gay mbluh rloh lhăt đah kơt nti n’hanh tiăr nti bah kon se nti. Mpeh pah kan leo gŭ nti bán trú, nội trú, nhih nti hŏ an ƀư ơm ntơm bah bôk năm nti gay ăp nai ntĭm, nuĭh pah kan rƀah gĭt trong nchrăp, nsan nuih n’hâm mât uănh kon se nti bán trú, nội trú.”

Drăp ndơ dŏng mhe, bôk nău kan ntĭm nti mhe n’gluh nău ŭch geh mhe đah rmôt nai ntĭm nti. Bơi 60 nai ntĭm bah nhih nti hŏ râng ăp jrô kơi năp ntĭm nti phổ thông 2018, nkre ƀư bên đah ndơ dŏng têh uĕh mhe dơi ntuh kơl an ăp jrô nti. Đah nai ntĭm Phan Thúy Hằng, nai ntĭm Tiếng Anh, màn hình cảm ứng n’hanh ăp ndơ ntrŭp dŏng ntop kơl mô dơn ƀư an jrô nti ăp tŏng lơn ma hôm pơk tay trong leo ƀư bài ntĭm.

“Ntĭm Tiếng Anh tâm jrô nti têh uĕh mhe geh màn hình cảm ứng n’hanh điều hòa, aơ lah ndơ dơh uĕh gay gâp dŏng công nghệ, leo ƀư ăp nău djăt – ngơi, pâl rlưn n’hanh tâm dâl nău khuh n’gôr lơn, kơl kon se nti nđơr n’hanh nsrôih kơt nti lơn. Gâp gĭt lah aơ lah rnôk dơh geh, nău dơn kan gay săk nơm rgâl mhe trong ntĭm nti, mât dŏng geh nău tam ăp ndơ ntrŭp dŏng gay n’hao săk blău ntĭm nti môn Tiếng Anh lah êng, ăp môn nti êng lah nsum.”

Đah nău mât uănh bah Đảng, Ngih dak, bah năm nti mhe, rlău 1.100 kon se xã n’har bri Buôn Đôn (n’gor Dak Lak) dơi kơt nti, gŭ sa n’hanh gŭ rêh ta nhih nti têh uĕh. Mô dơn n’hao geh âk ndơ kơt nti, nhih nti hôm lah “jay gŭ nsum”, ntŭk mât ăp nău nđơr, tiăr nti n’hanh chăt nar mpăr gay kon se nkual n’har bri nsing nơm têh jêng, nău rêh let năp tay sĭt rgop rdâk njêng ƀon tơm, mât njrăng mpêr n’har neh dak.